Read Konkomba Mag 7 Bible Online

Mag 7 - Konkomba bible

Mag 7

¹Le Farasii yaab nin ban wɔɔnn Uwonbɔr a siimin nan nyan Jerusalam ki dan Yisa ban.

²Le ki kan ke u bɔɔnɔɔb biba ji tinɔɔjaginn le kaa nir bi nɔɔi.

³(Farasii yaab nin Juu yaab ti nɔɔ bi kaal le, bi yin ji ke see bi nir bi nɔɔi nbamɔm le ki nin ji.

⁴Ni ye bi nyan kinyaŋin ki foon ke, baa ji, see ke bi fun chinchinn wee ki nin ji. Bi biɛ nan ti ŋmag ikaa takpem le ki kpiɛ ni niɛ nan bu. Bi biɛ nan ŋmag nkaal man wɔɔn ke bi li nir bi yir nin bi binbom, ki sin li ŋunn bi wan dɔɔn wan na.)

⁵Le Farasii yaab nin ban wɔɔnn Uwonbɔr a siim nmɔn baan Yisa ke, “Ba ŋa wee a bɔɔnɔɔb nan kaa ŋmag ti yaaja a kaal nan wee ki pa ji tijiir nin tinɔɔjaginn naa?”

⁶Le Yisa jiin ke, “Uwonbɔr a linlenu Azaya kaah nan len man nin sin ye ibamɔn le. Ni ye tibɔkar dam le ke waah nan sɔb man nin. “Uwonbɔr len ke: ‘Bininfob nan, yim Uwonbɔr, ki tenn nim jilima bi mɔɔŋin le, amaa le bi sufu fɔg nim takpem.

⁷Bi jiɛnim yɔli le, bi jɔɔ bininfob a kaal le ki wɔɔn.’

⁸Le Yisa mann ki bei bi ke, “Nim n ta Uwonbɔr a siimin bil niba paama wee ki si li nɔɔ bininfosaalib a kaal kaah wɔɔn man nin na.

⁹Nim li le yii Uwonbɔr a siimin a nɔɔm le ki ŋmag ni baantɔɔl a kaal kaah ye man!

¹⁰Moziz nan siin ke, ‘Li tenn a baa nin a na jilimau; ni ye wan sug u baa bee u na ke, bin ku wa.’

¹¹Amaa nim ke, ni ye uninfo bei u baa bee u na ke, ‘Maah bi yin seiŋ nan sɔ amaa ni kpann Uwonbɔr yaan na’;

¹²ke le u nin jɔɔ npɔɔn kaa ji yin ter u baa bee u na.

¹³Naah wɔɔn bininfob nmɔn nkaal man nan, ni yii Uwonbɔr a bɔrin le nmɔn. Ni biɛ ŋaan tiwann tiba takpem le ti ye ni niɛ nan a tab.

¹⁴Le Yisa nan mann ki yin kuninfogbaluŋin u ban le ki bei bi ke, “Nim ban biɛn be do nan, ni pel nbamɔma wee ki biɛ maah yin pag tibɔr tan nan a taai.

¹⁵Niba kaa be ki li kɔɔ uninfosaal a mɔnn wee ki ŋa u tijaginn ni, amaa nan yin nya uninfo a mɔn nin, ni ma yin ŋa u tijaginn.

¹⁶[2] Wan biɛn jɔɔ litul ke un gbirim.”

¹⁷Waah bei bi man n-yonn man nin, le u jiɛn bi, ki jon ki tan kɔɔ iniin iba ni. Le u bɔɔnɔɔb baan u bɔŋal nmɔn a taai.

¹⁸Le u baan bi ke, “Ni mu ji ye tilankpiindam lee? Naa nyi ke ni wan nan biɛn wee uninfosaal ji-n, kaa ŋaan u tijaginn naa?

¹⁹Naa kɔɔ u sufu ni, u poolin le ni kɔɔ, le ki ji nyan u gbanann nin.” (Waah len man nan wɔɔn ke tijiir biɛn ŋan.)

²⁰Le u ji len ke, “Ni wan nan nya uninfosaal a sufu-n nin ni ma ŋaan u tijaginn,

²¹u sufu ni le u tiɛr niwann nan bir, nin iwanchɔgin toon upiibanlin nin ujabanlin, nin nnaayigim, nin lininfo kul, nin iwanchɔgin toon,

²²nin kujaŋuuŋ, nin kininaŋ, nin kularug, nin ijagɔɔr toon, nin lipiiponl, nin kutingbiig, nin kalanbaani ki kpiɛ ijɔr toon.

²³Ni niɛ nan biɛn nya uninfosaal a sufu ni le ki ŋaan u tijaginn.”

²⁴Ni bɔɔn bu le Yisa nyan niin ki jon Taya nin Sidonn a tingbɔŋin, ki tan kɔɔ iniin iba ni, kaa ban uba li nyi u bu niin ni, amaa waa nan fir woon u baa.

²⁵Le upii wan wee kinaanbiig nan be u bisiɛbig bu nan, nan gbir u bu, le ki dan u ban ki nan gbaan u nintogil.

²⁶Upii nmɔn kaa nan ye Juu a ninfou wi, bi nan ma u Fonisiya a tiŋ le, Siriya a tingbɔŋin. Le u balin Yisa ke u nyan kinaanbiig u bisa nmɔn a gbanann nin na.

²⁷Le Yisa bei u ke, “Che n jin nbuwaab bi jiir chinchinn na wee, naa ŋan nin uninfo n ta nbuwaab a jiir ki sei ibɔ.”

²⁸Le upii-n jiin ki bei u ke, “N yudaau, ni sin ye ibamɔn le, amaa ibɔ yan dɔ teebul a lɔŋin ni, mu pii nbuwaab a jibul yan lur tumin le.”

²⁹Le Yisa bei u ke, “A jiim nan bu, li kun na; a ta li foo iniin ki miin kinaanbiig n nyan a bisa-n a gbanann nin na.”

³⁰Le upii nmɔn nan fii ki kun ki tan foo ki miin u bigin dɔ u wan dɔɔn waŋ bu le, ki miin kinaanbiigin sin nyan na.

³¹Le Yisa nin jiɛn Taya a yagil nmɔn, le ki nɔɔ Sidonn a yagil, nin kitiŋ kan wee bi yi ki ke ntim piig nan yaan ki tan foo Galilii a mɔgilin.

³²Le bininfob biba dan u ban ki ŋmag uja uba le u ye kubirug, le bi balin Yisa ke un ta u nɔɔ ki paan u bu u.

³³Le Yisa ta u le bi nyan ngbaan, bi binba, le u ta u nɔɔbili ki bɔ uja nmɔn a tuli yin, le ki sii timɔsann ki ŋa uja nmɔn a lanbil,

³⁴Le ki waan lig papaab le ki foor jiin u poolin, le ki bei uja-n ke, “Efata”, ni taai le ye “Loora”.

³⁵Libol nmɔn le uja nmɔn nin gbir, ki ji fir pag nbamɔm.

³⁶Le Yisa nan kpaan bininfobin ke bi li nyi bin bei uba waah tun man nan bu; le bi dii ta tibɔr nmɔn ki mɔɔn.

³⁷Le ban biɛn gbir tibɔr nmɔn, ni ŋa bi ligaril takpem, le bi len ke, “Waah ŋa nan nan, ni ŋan, u che bitukpaab gbir, le nbirim pag.”