Read Konkomba Mag 8 Bible Online

Mag 8 - Konkomba bible

Mag 8

¹Iyaayoo nmɔn, le kuninfogbaluŋ yaan ti nan lagin tab Yisa ban, baa nan jɔɔ tijiiri, le Yisa yin u bɔɔnɔɔb ki nan bei bi ke,

²“Kunyunyunbaag choom pam bininfob nan bu, iweehn itaa sɔ le bi be n ban, ki mu kaa jɔɔ tijiir ki ji.

³Ni ye n jaa bi ke bi li kun nin nkom ke, bi li fig nsan, bi ni bi bam a tim fɔga.”

⁴Le u bɔɔnɔɔbin baan u ke, “Ti yin kan tijiir la ban kukunkɔɔg nan yaan wee tin foo bi biɛn naa?”

⁵Le u baan bi ke, “Ni jɔɔ boroboro kon i ŋaa?” Le bi bei u ke, “I bilile.”

⁶Iyaayoo le u che kuninfogbaluŋ nmɔn kal tum. Le u ta boroboro kon ilile-n, le ki poor Uwonbɔr le ki war war boroboro ki sei u bɔɔnɔɔbin ke bin ta tol bininfobin na.

⁷Bi ji nan jɔɔ njanbum wama bi ban; le u ji poor Uwonbɔr i bu, le ki bei u bɔɔnɔɔbin ke bin ta tol ba.

⁸Le bininfobin nan jin ki gbee. Ni bɔɔn bu, le u bɔɔnɔɔb lagin tijiir tan gurin, le ti ji gbee tikachar tilile.

⁹Bijab ban nan be niin nan foo turina paama. Le u nin nan jaa bininfobin ke bi li kun na,

¹⁰amaa le u ma nin u bɔɔnɔɔb ŋa weem ki kɔɔ kuŋaluŋ ki jon Dalimanuta a tiŋin.

¹¹Ni bɔɔn bu le Farasii yaab biba nan dan Yisa ban ki nan baan u, ki mag u ki ke un ŋa ligaril a wan nibau wee bin biɛ ke Uwonbɔr sin nyi u bu.

¹²Le Yisa nan foor ki jaa u poolin, le ki baan bi, “Ba ŋa wee ni daandaan nan a ninfob ban n tun ligaril a toonl wee ni kan naa? Ibamɔn le n bei ni nan, min kaa yin tun ligaril a toonl ki sei ni daandaan nan a ninfob nan ni.”

¹³Le u jiɛn bi, le ki jiir kɔɔ kuŋaluŋin, ki lɔŋ limɔgil.

¹⁴Yisa a bɔɔnɔɔb nan tam kaa ŋmag boroboro takpemi, boroboro kon liba kpeŋileŋ le nan be bi ŋaluŋin.

¹⁵Le Yisa nan kpaan bi ke, “Ni li nyi man, wee ki li guu ni baa nin Farasii yaab nin ubɔr Herɔd a boroboro a nyɔgim n bu.”

¹⁶Le bi nin pag tab ban ke, “Taah kaa ŋmag boroboro n bu le u pag nan.”

¹⁷Amaa, le u biɛ baah pag nan, le ki baan bi ke, “Ba ŋa wee ni pag ke naah kaa ŋmag boroboro n naa? Naa le la biɛ nibaa? Ni potiɛl kaa le la ligiraa?

¹⁸Ni jɔɔ inunbil, ke ba ŋa wee naa gaa? Ni ji jɔɔ itul, ke ba ŋa wee naa gbiraa?

¹⁹Naa tiɛr n-yonn man wee n nan war boroboro kon iŋmu ki tol bininfob turiŋmu n naa? Tikachar ti ŋa wee ni nan lagin tijiir tan nan gurin naa?” Le bi jiin ke, piig nin tilee.

²⁰“Ke n-yonn man wee n nan war boroboro kon ilile-n ki jin bininfob turina-n, tikachar ti ŋaa wee ni nan lagin naa?” Le bi jiin ke tilile.

²¹Le u nin baan bi, “Ke le naa lee la biɛ nibaa?”

²²Le bi nan foo Befisada, le bininfob biba nan ŋmag ujajɔɔn uba ki dan Yisa ban ki nan balin u ke un ta u nɔɔ ki maa wa.

²³Le Yisa nan choo u nɔɔ ki ta u nyan kitiŋ nmɔn a gbaam, le ki sii timɔsann ki ŋa ujajɔɔn nin a numin, le ki ta u nɔɔi ki paan u bu, le ki baan u ke, “A gaa?”

²⁴Le uja-n nan goor ki lig, ki ke “Nn, n kan bininfob, amaa bi nann isiig le ki choon.”

²⁵Le Yisa ji ta u nɔɔi ki paan uja nmɔn a numbili bu, iyaayoo le uja nmɔn ni na lig soon ki miin u numbili n ligira, le u nin ga tiwann yɔɔr biɛn nbamɔm.

²⁶Le Yisa kpaan u ke u ji li nyi un jir kitiŋ nmɔn yaan, le ki che u kun u niin.

²⁷Yisa nin u bɔɔnɔɔb nan fɔɔr nin yaan ki jon Sizariya Filipi a tinbumin. Baah nan be nsan bu ki la chaa nan le u baan bi ke, “Ni beim ni, bininfob ke n ye ŋmiɛ?”

²⁸Le bi bei u ke, “Biba ke a ye Jɔnn Wan nan Fu Bininfob Uwonbɔr a Nyunfulin le, le biba mu ke a ye Elaja le, le biba mu ji ke a ye Uwonbɔr a linlemin a ni uba le.”

²⁹Le u baan bi, “Ke nim mu, ni ke n ye ŋmiɛ?” Le Piita bei u ke, “Fin le ye Masiya nmɔn.”

³⁰Le Yisa nan sei bi ikpaan ke bi li nyi bin bei uba tibɔr nmɔn.

³¹Le Yisa ni nan wɔɔn u bɔɔnɔɔb ke, see Uninfosaal a Big jin fala, le kitiŋ a ninkpeeb, nin kumanug a yudam, nin ban wɔɔnn Uwonbɔr a siimin na li yii u, ki ji ku u, amaa ni ween itaa daal le u li fii nkumin.

³²U nan pag ni niɛ nan ki wonn bi biɛn nan a num paam le nbamɔm. Le Piita yin u ki nyan ngbaan, ki tan fuun u bu ki ke u laa ji nyi ki len man ni.

³³Le Yisa gbiɛ lig u bɔɔnɔɔbin, ki mu fuun Piita bu ke, “Sintani nan, fɔɔr n ban do. Ŋaa tiɛr Uwonbɔr kaah tiɛr man ni, a tiɛr bininfosaalib kaah tiɛr man le.”

³⁴Le Yisa bei u bɔɔnɔɔb nin bininfob ban biɛn nan nɔɔ win ke, bin fɔɔr ki mal u ni, le ki bei bi ke, “Wan ban un nɔɔ min ke, see ke u yii u ba, wee ki yuur u kum a dapunpunl ki li nɔɔm,

³⁵wan kaa ban un weeh u sayiig n bu ke, u ma na yin lann ki, amaa wan weeh u sayiig min nin tibɔŋann n bu ke, u ma na yin kan limiɛfol nin ibamɔn.

³⁶Ke ni ye uninfo kan dulinya nan a jɔɔm biɛn wee ki sin lann u miɛfol ke, ba a nyɔɔr wee u kan naa?

³⁷Bee uninfo li fir ta baa ki daa limiɛfolaa?

³⁸Wan mu san ifa nin un ta n bɔr nan ki wɔɔn titoonbirdam nin tukangbirdam dulinya nan yaan ke, wee Uninfosaal a Big nan jiirin nin u Baa Uwonbɔr a pɔɔm nin u malakam ke, u mu na li san u ifa nin un ta u ki kpiɛ u ninfobin.