Read Konkomba Lug 1 Bible Online

Lug 1 - Konkomba bible

Lug 1

¹Binib takpem nan pɔɔn bi ba ki sɔb kugbɔŋ nan a poolin tibɔr tan nan ŋa ti sisiigin.

²Binib ban kan tibɔr nan a piinim nin tidiɛmin nan mɔɔn ti le ki wɔɔn tim le ki ye ban tun tibɔr nmɔn a tooi.

³Mambu, Min Lug, n baantɔɔl kaah biɛ tibɔr nan a piinim a bamɔn, ki tan kpaa ti diɛmin ni. Ni ma le n tiɛr ke ni ŋan n mu n sɔb ti taah piin ki tan sir man, ki sei fin, n ninkpelu Teofilu,

⁴wee a mu n biɛ baah wɔɔniŋ tibɔr tan nan a dede.

⁵N-yonn man wee Herɔd nan ye Judiya a tingbɔŋ a bɔrninkpelu nan, le Uwonbɔr a minmanu uba nan be le bi yi u ke Zakariya. U nan nyan Abija a paabim ni le. U poo a yinl nan ye Elizabef. U mu nan ye Uwonbɔr a minmanu Arɔnn a maalim ni uba le.

⁶Zakariya nin u poo biɛn nan ye bininfoŋam le Uwonbɔr ban, ki nɔɔ u kaal nin u siim biɛn.

⁷Amaa baa nan jɔɔ kibigi. Elizabef nan ye upiiŋɔɔb le, bi biɛn mu nan pora.

⁸Man le weemba daal Zakariya nin u paabim a toontun yonn nan nan foo le u nan ke un tun u toon ki sei Uwonbɔr, ke waah pii ti tun ki tenn u man nin.

⁹Le bi nan tɔn inaa[1], ke bin gann wan li kɔɔ iwonjiɛn niin nin yaan ki li nyɔɔr nnyɔgkusim. Baah nan tɔn inaa-n nin, le Zakariya nan jin. Ni ma bu le u nan kɔɔ iniin ni yaan

¹⁰le bininfob n biɛn nan par ki si nkaafiin ki miɛ Nween, n-yonn man wee u nan nyɔɔr nnyɔgkusimin.

¹¹Iyaayoo le Uyudaan a malaka nan degir Zakariya bu, ki sir baah nyɔɔr nnyɔgkusim libinbinl lan bu-n nnɔɔjiim paam.

¹²Zakariya kaah nan nan kan u n-yonn man ni, le u lam nan yug, le bijawaam choo u.

¹³Le Uwonbɔr a malaka nmɔn bei u ke, “Zakariya laa san bijawaami. Uwonbɔr pii gbir a miɛma, le a poo Elizabef li maa kibijag ki seiŋ, le a li yin u yinl ke Jɔnn.

¹⁴Le ni na li mɔŋiŋ le a pool n penn u bu, le bininfob takpem mu a pooi na li penn u maalim bu.

¹⁵U nan yin ye lininfo gbingbemil le Uwonbɔr a nintogil, kaa biɛ nan yin nyu ndaam a booli biɛn ni[2]. U na yin gbee nin Kasi a Naaŋ le u maalimin na.

¹⁶Le u na li che Iziral yaab takpem n jir bi Yudaau Uwonbɔr ban.

¹⁷U li chinn Uyudaan, ki li jɔɔ Elaja a naaŋin a pɔɔm, U li kpenn baam a sufu ki jiin bi buwaabin nin binib ban kaa jɔɔ limɔcheel n kan bibuchim a lam, ki ŋa bininfob sili ki sei Uyudaan.”

¹⁸Le Zakariya baan malaka n ke, “N yin ŋa nii ki biɛ ke ŋaah len man nan sin li ŋaa? “N pora, le n poo mu pora.

¹⁹Le malaka nmɔn bei u ke, “N ye Gabiriɛl le, min le be Uwonbɔr a nintogil le u tum a ban, ke n nan pag tibɔŋann nan ki wɔɔniŋ.

²⁰Le daandaan nan a li bir ki tan kpaa lidaal lan wee tibɔr nan na li ŋa ibamɔn. Ŋaah kaa ŋa n bɔr tan wee n pagin yada-n, tan na li ŋa ibamɔn n-yonn man kpaan.”

²¹Tɔ, bininfob ban nan paar si iniin ni, ni nan ŋa bi ligaril le, waah nan yuur iwonjiɛn niin a poolin nin.

²²Waah nan nan nyan n-yonn man nin, waa nan fir pagi, u nan pag libir le ki tenn bi, le bi biɛ ke u kan lijinjeel a wan le kudiig nmɔn yaan.

²³N-yonn man wee u toon nan nan diɛ iwonjiɛn niin nmɔn yaan nin, le u nan jir kun u niin.

²⁴Ni bɔɔn bu le u poo Elizabef nan choo lipool, le ki woon uba ndiin ki tan kpaa iŋmal iŋmu,

²⁵le ki nan nan bei ke, “Ni niɛ nan le Uwonbɔr tun seim, ki sam kunyunyunbaag ki nyam ifa-n.”

²⁶Elizabef kaah nan choo lipool a ŋmal iloob, le Uwonbɔr nan tun u malaka Gabiriɛl ke un jo kitiŋ kan be Galilii a tingbɔŋin, wee bi yi kitiŋ nmɔn ke Nazarif nan,

²⁷ki tan pag sei usapɔɔn wan kaa nyi uja[3] wee bi yi u ke Meri nan. Usapɔɔn nmɔn nan ye uja uba a jakpeŋ le, le u yinl ye Josef. Josef nan ye ubɔr Defid a yaabil le.

²⁸Le malaka nan tan foo Meri ban ki bei u ke, “N pooriŋ. Fin wan wee Uwonbɔr a nyɔɔr be a bu takpem nan, Uyudaan be niŋ.”

²⁹Waah len man nan, le ni gar Meri. Le u ni nan tiɛr tibɔr nmɔn bu.

³⁰Amaa le malaka ji bei u ke, “Meri, laa san bijawaami. Uwonbɔr a nyɔɔr be a bu.

³¹A li choo lipool ki maa kibijabig, ki yin u ke Yisa.

³²U na yin ye lininfo takpenl le, le bi li yin u ke Uwonbɔr wan be paab nan a Bija. Uyudaan Uwonbɔr li che un ji u yaaja Defid a naam.

³³Le u na li ŋmag Jekɔb a niin hali nin n-yonn man kaa jɔɔ ndiɛmi; le u naam kaa li nyi diɛ.”

³⁴Le Meri nan baan Malaka n ke, “N ye usapɔɔn wan kaa nyi uja le, ni yin ŋa nii wee n choo lipool laa?”

³⁵Le malaka n bei u ke, “Kasi a Naaŋ li jiirin a bu, Uwonbɔr wan be paab nan a pɔɔm li biin a bu. Ni ma bu ŋaah li maa kibig kan nan yin ye kasi daan le, le bi li yin u Uwonbɔr a Bija.”

³⁶Le ki bei u ke, “Lig a nabig Elizabef, u mu jɔɔ kibijabig a pool le. Baah nan yi u ke upiiŋɔɔb nan, u jɔɔ iŋmal iloob a pool le.

³⁷Niba li kaa be ki pɔɔ Uwonbɔr ban ni.”

³⁸Le Meri bei malaka nmɔn ke, “N ye Uyudaan a yomu le. Che nin ŋa ke ŋaah len man nan.” Le malaka-n nan fɔɔr ki jiɛn u.

³⁹Iyaayoo le Meri nan ŋa sili ki fii weem ki jon Judiya a yagil lan jɔɔ ijɔɔ nan a tiŋ kiba ni,

⁴⁰Nan yaan wee u nan kɔɔ Zakariya a niin ki poor Elizabef.

⁴¹N-yonn man wee Elizabef gbir Meri a poori, le u big dam dam u poolin. N-yonn nmɔn le Kasi a Naaŋ gbeen Elizabef.

⁴²Le u pag nin nmɔpɔɔn ke: “Uwonbɔr a kaar be a bu ki jon bipiib biɛn na, ki be kibig kan be a poolin nan mu bu.

⁴³Amaa ba ŋa wee Uwonbɔr ŋaam tinyɔɔr man naa, ki che n Yudaau a na dan ke un nan gɔnnimaa?

⁴⁴Maah gbir a poori n-yonn man nin, le kibig kan be n poolin nin yug nin npopeen.

⁴⁵Tikaar be wan ŋa yada ke Uyudaan kaah bei u man nin le gbeen nin bu!”

⁴⁶Le Meri len ke: “N pagir Uyudaan n sufu ni le.

⁴⁷Le ni mɔ n naaŋ, Uwonbɔr wan ye n feeru win ban.

⁴⁸Nan bu-n u potiɛl be n ni min U yomu wan jɔɔ kunyunyunbaag. Lig! Naah nyan dinan ki chaa, n-yonn biɛn a ninfob li yim ke tikaar.

⁴⁹Nan bu-n npɔɔndaan nan tun litoonl takpenl le ki seim. U yinl ye kasi le.

⁵⁰U san bininfob ban biɛn san u nan kunyunyunbaag, naah nyan daandaan nan a ninfob ki jɔɔ chaa bi yaabili nin yaabisagira sagira.

⁵¹U ta u nɔɔ ki tun itoon gbingbem; ki worin kalanbaanidam baah tiɛr man bi sufu ni!

⁵²U nan jiin bibɔrtiib bi naangbann bu, amaa le ki don ban jiin biba tumin paab!

⁵³Binib ban wee nkom jɔɔ nan, U sei bi tijiŋann, le bi jin ki gbee. U che bijɔɔndam kun nin linɔɔpiɛŋmiɛl!

⁵⁴U ter u toontum Iziral yaab, ki tiɛr bi bu ki san bi kunyunyunbaag.

⁵⁵Abiraham nin u yaabili nin n-yonn man kaa jɔɔ diɛmin hali nin waah nan pag ki sei ti baamin.”

⁵⁶Meri nan be Elizabef ban le iŋmal itaa paam le ki nan jir kun.

⁵⁷Le isaŋ nan foo nin Elizabef nmaa, le u nan ma kibijag.

⁵⁸Le u kunkɔɔn tab nin u ninfob nan gbir Uwonbɔr kaah san u kunyunyunbaag man takpem, le bi biɛn nan lagin ki por u mɔm nmɔn.

⁵⁹Ni ween iniin daal le bi nan dan ke bin jii kibigin a punl, le ki nan ban bin ta u baa Zakariya a yinl ki yin u.

⁶⁰Le u na kaa chee, ki bei bi ke, “Aai, u yinl yin ye Jɔnn le.”

⁶¹Le bi bei u ke, “Uninfo uba kaa jɔɔ liyinl nmɔn a bosu ni maalimin ni.”

⁶²Le bi nan pag kibig nmɔn a baa libiril ki baan u ke u ban bi yin u bigin nii?

⁶³Le u bei bi ke bin sei u kugbɔŋ ni. Le bi ta kugbɔŋ sei u, le u sɔb ke, “U yinl ye Jɔnn le.” Ni nan gar bi biɛn pam.

⁶⁴Libol nmɔn yaan le Zakariya a mɔb yaar le u lanbil lɔgir. Le u piin ki pag, ki pagir Uwonbɔr.

⁶⁵Le bijawaam choo u kunkɔɔn tab biɛn, Le Judiya a tim man biɛn be igungon ni nan a ninfob nan pag tibɔr nmɔn.

⁶⁶Ni nan ŋa bininfob ban biɛn nan gbir nan ipotiɛ pam. Le bi baan ke, “Kibig nmɔn yin ye ninfo bolin baa?” Nan bu-n Uyudaan a nɔɔ paa u bu.

⁶⁷Le Kasi a Naaŋ nan gbeen Jɔnn a baa Zakariya, le u pag ilinlen leen ke,

⁶⁸“Ndom ye Uyudaan wan ye Iziral yaab a Wonbɔr u nan yaan le. Nan bu-n U dan ki nan sei u ninfob nkpenim a manuga,

⁶⁹ki nan pee feeja a naatuŋ[4] u toontunn Defid a niin a loob

⁷⁰(ke Uwonbɔr kaah nan che u kasi a linlem nan pag man, n-yonn man nan jon nin.)

⁷¹Ke u li nyan tim ti dataam a nɔɔn, nin ban biɛn nan ti nan a nɔɔn.

⁷²Ke u li san ti yaajam kunyunyunbaag, ki li tiɛr waah nan poo u kasi a poor tan nin bu.

⁷³Man le u nan poo tipoor ki sei ti yaaja Abiraham,

⁷⁴ke u li nyan tim ti dataam a nɔɔn, wee ti li nɔɔ u ki laa san bijawaami,

⁷⁵ki li be kasi ki li jɔɔ nbuchin binben u ban iyoo biɛn.

⁷⁶“Fin, n big, bi li yiŋ ke Uwonbɔr wan be paab nan a linlenu. A li liin Uwonbɔr a sam, ki mann u sam ki sei u,

⁷⁷ki bei u ninfob baah li ŋa man ki kan nŋmarim waah jiɛn bi bir ki per bin bu.

⁷⁸Nan bu-n tim a Wonbɔr u a nyunyunbasanl bu, u li dan ti ban ke liwonpɔɔnl kaah nyann bɔɔn man nin.

⁷⁹Ni na li wonn bininfob ban be libunbɔnlin ki san nkum a jawaam nan bu, Ni ma wɔɔn ti nsan man li sei tim nposɔɔn nan.”

⁸⁰Le kibig nmɔn nan yabig ki gbee nin kinaaŋ, ki don kukunkɔɔg bu ki tan be hali ki nan kpaa iyoo kaah nan nan foo nin un kpiir u ba Iziral yaab bu.