Read Konkomba Lug 10 Bible Online

Lug 10 - Konkomba bible

Lug 10

¹Ni bɔɔn bu le Ti yudaau nan gann bijab pilile nin bilee, ki tun bi bilee bilee wee bin chinn choon ntimin man yaan biɛn wee u li jo,

²Ke bei bi ke, “Idi beer ki yaba amaa le bidichiɛb kaa yabi. Mambu, ni li miɛ Uyudaan wee Un kpiɛn bidichiɛb, wee bin chiɛ idi nmɔn.

³Ni li chaau man! N tun ni le, ke npeebumin igbingbel a sisiigin.

⁴Ni laa ŋmag ilig a pɔgi, bee lipɔgil, bee inaatagi, le ki laa poor uba nsan bu.

⁵“Ni yin kɔɔ iniin yan yaan ke ni chinn ki len ke, ‘Nposɔɔn li be iniin nan bu.’

⁶Ni ye nposɔɔn daan be iniin nmɔn ke, ni posɔɔm nmɔn li paar u bu, naa ye man ke ni nposɔɔn nmɔn ji li jirin ni ban.

⁷Ni kɔɔ iniin nmɔn ke, ni li ji ki nyu nan biɛn wee bi li sei na. U toontunn ŋan nin un gaa u yɔr. Ni laa lɔɔl iniin ki dɔɔ.

⁸“Ni foo kitiŋ kan wee bi gaa ni ki sei ni tijiir tan ke, ni li ji timau;

⁹ki che bibaarib npɔɔg kitiŋ nmɔn yaan, ki bei bi ke, ‘Uwonbɔr a naamin mal na.’

¹⁰Amaa ni ye ni foo kitiŋ kan yaan wee baa gaa ni ke, ni nya kitiŋ nmɔn a sanjal bu ki len ke,

¹¹‘Hali ti taai kaah tabin ni tiŋ nan a tann tan ni, le ti pir gabir ki chabir ni nan. Amaa ni li nyi ni nan: Uwonbɔr a naamin mala.’

¹²N bei ni le, lidaal nmɔn Sodom yaab yaal na li sɔ kitiŋ nmɔn a ninfob yaal.

¹³“Woo, Korazin yaab! Woo, Befisada yaab! Nan bu-n ni ye ligaril a toon biɛn nan nan bi tun Taya nin Sidonn yaab a sisiigin ke naah tun ni sisiigin man nan ke, bi bi li jiɛn bi toonbir weem, ki yee npoobiin a wan yɔɔr, ki pug bi gbanann nfatam, wee ni wɔɔn ke bi jiɛn bi toonbira.

¹⁴Amaa tibɔr a ji daal ke ni tudaril na li jo Taya nin Sodom a ninfob yaal.

¹⁵Nim Kapeniɛm yaab, Uwonbɔr li don ni papaab baa? Aai, u na yin jiin ni Kitakpiin tiŋ le.”

¹⁶“Wan gbir ni bɔr ke u gbir n bɔra; wan yii kaa gbir ni bɔr ke, u yii n mu a bɔra; amaa wan mu yii n bɔr ke, u yii Uwonbɔr wan tunim a bɔra.”

¹⁷Pilile nin bilee nan nan jirin nin npopeen le ki bei u ke, “Uyudaan; hali nnaanbiim chee sei ti le a yinl bu.”

¹⁸Le u jiin ke, “N kan Sintani kaah nyan papaab ki lunn ke utaal li nyagin ni.

¹⁹N sei ni tininkper a pɔɔm man wee ni li taa iwaa nin inɔɔn bu, ki nyaŋ kidataag Sintani a pɔɔm biɛn; niba kaa li ŋaa ni.

²⁰Amaa ni laa che ni mɔ ni nnaanbiim kaah chee ni mɔbin a binba bu, ni che ni li mɔ na ni yin kaah sɔb dɔ Uwonbɔr a niin nin bu.”

²¹Iyaayoo nmɔn, Kasi a Naaŋ kaah nan gbeen Yisa ni nmɔn ni, le u ke, “N Baa, paab nin tum a yudaau, n pagiŋ, nan bu-n ŋaah ta tibɔr nan ki woon bilandam nin bibiɛndam, amaa le ki sin kpiir wɔɔn nbuwaab finfim. Nn, n Baa, ŋaah ban nin tun man le yen.

²²N Baa le ta ni nan biɛn ki seim; uba kaa nyi Bija-n kaah ye wan ni see Baa nmɔn a binba, le uba mu kaa nyi Baa nmɔn kaah ye wan ni see Bija-n nin ban mu wee Bija-n gann ki kpiir ki wɔɔn ni.”

²³Le Yisa nan gbiɛ lig u bɔɔnɔɔb le ki woon bei bi ke, “Tikaar be inunbil yan kan nan wee ni ga nan bu.

²⁴Nan bu-n N bei ni le ke, bilinlem nin bibɔrtiib takpem nan ban bin kan tiwann tan wee ni kan nan le, amaa kaa kan ni. Bi nan ban bin gbir tibɔr tan wee ni gbir nan le, amaa le kaa gbiri.”

²⁵Kulaguŋ kiba ni le ban nyi nsiim chobchob nan a ni uba nan fii sir ki ban un mag Yisa, le ki baan u ke, “Wan wɔɔn, n yin ŋa niin wee ki kan limiɛl lan kaa jɔɔ ndiɛm maa?”

²⁶Le U jiin ke, “Ni sɔ siim a gbɔŋin ke nii? A karin ki nii?”

²⁷Le uja nmɔn jiin ke: “ ‘Li jiɛ Uyudaan Uwonbɔr, ki li jiɛ U nin a sufu biɛn, nin a pɔɔm biɛn nin a potiɛm biɛn’; ki ‘li jiɛ a kunkɔɔn tau ke ŋaah jiɛ a ba man nin.’ ”

²⁸Le Yisa bei u ke, “A jiim ŋan, li tun man na, wee ki nan kan limiɛfol nmɔn.”

²⁹Amaa uja nan nan ban un wɔɔn ke waa jɔɔ tibiri; le ki baan Yisa ke, “Tɔ ŋma lee nin ye n kunkɔɔn tau waa?”

³⁰Le Yisa jiin u ke, “Uja uba li nan nyan Jerusalam ki chaa Jeriko; le ban feen nan kenn u, le ki pir u wan yɔɔr ki fee u, ki boo u takpem, ki nan gur wama nin bin ku. Le ki jiɛn u.

³¹Ni bɔɔn bu le uminmann uba mu nan nɔɔ nsan nmɔn ki chaan ki nan kan uja nmɔn kaah dɔ, le u lɔg ki jon ki sin jiɛn u.

³²Man nmɔn jigin le Liifai a jau[14] uba mu nan kan u, ki mu lɔg ki jon ki jiɛn u bil.

³³Amaa le Samariya a jau uba mu nɔɔ nsan nmɔn ki chaan, ki nan kan uja nmɔn. Waah nan kan u n-yonn man ni, le kunyunyunbaag choo u takpem,

³⁴le u dan u ban ki nan ta nkpam nin nnyɔg ki ŋa u biɛi ki ta itan ki lol, le ki ta u paan u boŋ bu ki jon i chaan niin ki tan ŋmag u nbamɔm.

³⁵Le ni wonn kutaag le u ta ilig ki sei wan guu ichanniin nin ki ke, ‘Li lig uja nan wee n nan jiirin ke n ji li yɔ ŋaah jin nan ki kpiɛ u bu.’ ”

³⁶Yisa kaah pag man ki diɛ-n, le u baan wan wɔɔnn Uwonbɔr a siim nan ke, “Bininfob bi taa nan, u laba ye baah fee wan nan a kunkɔɔn tau waa?”

³⁷Le wan ŋma nsiim nbamɔmin jiin ke, “Wan san u kunyunyunbaagin li ye u kunkɔɔn tau.” Le Yisa bei u ke, “Tɔ li chaa ki mu ta li tun man na.”

³⁸Ni bɔɔn bu le Yisa nin u bɔɔnɔɔb nan chaa bi sam, ki nan tan foo kitinbig kiba ni, le upii wan bi nan yi u ke Maata nan, nan gaa Yisa tichann u niin.

³⁹U nan jɔɔ u naal uba, bi yi u ke Meri, le Meri nmɔn nan kal tum ki mal Uyudaan a taai paam ki pelig u bɔr.

⁴⁰Amaa le Maata ma be ki gbaar nin kuchɔŋ a ŋaam, le ki nan dan nan bei Yisa ke, “N yudaau, maah gbaar n ŋaaŋ kuchɔŋ n binba wee n naal nan kaa terim nan, a baga kaa be nii naa? Bei u wee u nan terim.”

⁴¹Le Uyudaan jiin ke, “Maata, Maata, n nyi ke a gbaar nin tiwann takpem n bu le, le ni mugiriŋ ki bii a sufu,

⁴²amaa niwann niba li kpaa talar. Meri ma gann ni wan nan ŋan le, le uba kaa li fir nyan ni u ban ni.”