Read Konkomba Lug 11 Bible Online

Lug 11 - Konkomba bible

Lug 11

¹Nweehn nba daal le Yisa nan be niba yaan ki miɛ Uwonbɔr. Waah nan miɛ diɛ n-yonn man, le u bɔɔnɔɔb n-yaa ni uba bei u ke, “Uyudaau, wɔɔn ti ta li miɛ Uwonbɔr man ni, ke Jɔnn kaah nan wɔɔn u bɔɔnɔɔb man nin.”

²Le U bei bi ke, “Ni yin miɛ Uwonbɔr ke, ni len ke: ‘Ti Baa, che a yinl le be kasi, che a naam n foon.

³Sei ti lidaal biɛn a jiir.

⁴Jiɛn tibir ki per ta ke ti mu kaah jiɛn ban bii ti a bir ki per bi man nin ki laa liin ti ki kɔɔn libiginlin ni.’ ”

⁵Le U bei bi ke, “Ni ye ni ni uba jɔɔ u jɔ, wee ki jon u jɔ nmɔn ban kunyiɛgtasiig, ki tan bei u ke, ‘N jɔ ni ye a jɔɔ kisaabaag ke, a seim ni,

⁶nan bu-n n jɔ uba le nyan lisanchonl ki foon n niin le n mu kaa jɔɔ tijiir tiba n sei wi.’

⁷“Le a jɔ wan be ndiin ni beiŋ ke ‘Laa mugirimi. N kpal linaanganla. Min nin n buwaab dɔ jiɛn le, maa ji li fir fii ki seiŋ niba.’

⁸N bei ni ibamɔn le, waa yin fii ki sei u tijiir nmɔn waah ye u jɔ-n bu, amaa waah kaa san ifa wee ki miɛ win, see ke u le nan fii ki sei u waah ban man.

⁹“Mambu n bei ni le: Ni li miɛu ke u li sei ni; Ni li ban na ke ni li kan naah ban nan, ni li kpaar linaanganla ke li li loor ki sei ni.

¹⁰Nan bu-n wan biɛn miɛ ke u li gaa, le wan biɛn ban mu li kan, wan mu kpaar ke, linaanganl li loor ki sei u.

¹¹“Nim bibaam, ni ye ke ni bija miɛ ni ujan ke ni ŋma li ta liwaalabil ki sei waa?

¹²Bee ŋma wee u li miɛ lijenl wee un ta unɔɔn ki sei waa?

¹³Ke ni ye nim tibirdam nyi naah li sei ni buwaab liwanŋanl man ke, ni Baa Uwonbɔr wan be papaab nan man kaa ni li ta Kasi a Naaŋ nan ki sei bininfob ban miɛ win naa?”

¹⁴[15] Yisa nan ŋɔɔr kinaanbiig kan ye kuburug le nyann. Kinaanbiigin kaah nan nan nyan ni, le uja wan nan jɔɔ kinaanbiig wee ki birin nan pag, le ni nan gar kuninfogbaluŋin.

¹⁵Amaa le biba bei ke, “Nnaanbiim a bɔru Beelizebul a npɔɔn le U nyan nnaanbiim bininfobin.”

¹⁶Le biba mu nan mag Yisa, ki ban siɛra kan nyan paab.

¹⁷Le Yisa mu biɛ baa tiɛr man, le ki bei bi ke, “Nnaam a ninfob kɔn nin tab ke, nnaam nmɔn yin gab yɔli le; le iniin iba yaab mu kɔn nin tab ke, iniin nmɔn kaa yin siri.

¹⁸Ni ye Sintani mu bɔgir ki kɔn nin uba ke, u naam yin ŋa nii ki sir aa? Nan bu n len man ni ye naah ke n jɔɔ Beelizebul a pɔɔm le ki ŋɔɔ nnaanbiim

¹⁹Ni ke Beelizebul a pɔɔm le n nyan nnaanbiim bininfobin ke, ke ni mu, ŋma a pɔɔm wee ni ninfob jɔɔ nyann baa? Man ke bi ma li na li ye ni bɔjib.

²⁰Amaa ni ye n ta Uwonbɔr a pɔɔm le n nyan nnaanbiim bininfobin ke, man ke Uwonbɔr a naamin pii foon ni ban na.

²¹Lijawagidil ŋa u sili nin u jawann ki guu u niin ke, uba kaa li fir bii u wan yɔɔri,

²²amaa wan pɔɔ jon u nan kɔn ki nyaŋ u ke, u yin gaa u jawann tan wee u bi jɔɔ ter uba-n le, ki ji ta u wan yɔɔr ki tol bininfob.

²³Uninfo wan kaa nɔɔ n bɔɔn ke, u ye n dundaau le; wan mu kaa lagin bininfob ki tenn nim ke, u ŋɔɔ bi le.

²⁴“Ni ye kinaanbiig nyan uninfo ni ke, u choon yelin kukunkɔɔg a paab le, ki ban lifooril a bol, wee kaa kan ke, u ti nan bei u ba le ke, “N li jir iniin yan yaan wee n nan nyan nin.”

²⁵Ni ye u jir tan foo ki miin bi tigin iniin ni ki mann ni ke,

²⁶u jir le weem ki tan yin nnaanbiim milile ban bir ki jon u ma-n le ki nan kpiɛ u bu, le bi ni lagin be; le uninfo nmɔn a binbem li bii ki jo waah nan be man chinchinn nin.”

²⁷Yisa kaah pag man nmɔn, upii uba nan be kuninfogbaluŋin yaan le ki pag nmɔpɔɔn ke, “Tikaar be upii wan maŋ ki mɔɔŋ libiil nan.”

²⁸Le U jiin ke, “Tikaar be bininfob ban gbir Uwonbɔr a bɔr ki chee ti nan bu,”

²⁹Kuninfogbaluŋ nmɔn kaah nan kpiɛgin le Yisa len ke, “Daandaan nan a ninfob ban ye tibir dam kaa nɔɔ Uwonbɔr nan ban bin kan ligaril a toonl le ki ni ŋaam yada; amaa maa yin tun ligaril a toonl liba ki sei bi; see Uwonbɔr a linlenu Jona a garil a toonlin a binba.

³⁰Jona kaah nan ye limagil ki sei Ninefa a tiŋ yaab man nin, man le min Uninfosaal a Big mu yin ye limagil ki tenn daandaan nan a ninfob.

³¹Tibɔr a ji daal upiibɔr wan nan nyan nnɔɔjiin paam nan na li fii sir paab ki galin daandaan nan a ninfob ki bii bi, nan bu-n waah nyan nan yaan kutingbɔŋ nan ki dan u nan gbir ubɔr Solomɔnn a lam gɔr kaam a wɔɔm; amaa uba be do ki yab jon Solomɔnn na.

³²Tibɔr a ji daal, Ninefa a tiŋ a ninfob na li fii ki pag ki bii daandaan nan a ninfob; Jona kaah mɔɔn Uwonbɔr a bɔr ki sei bin bu, bi nan nyan bi toonbirin na; ke liga, daandaan nan wan jon Jona be do.

³³“U ba kaa yin nyɔɔ fila ki ta ki ŋa nan yaan wo, bee ki ta kiyiig chigin ki bu. See ke u ta ki siin le ki ween le bininfob ban kɔɔn nin kan ki wonweem.

³⁴A numbil li ye a gbanann a fila. A numbili ŋan ke, a gbanann biɛn yin gbee ni nween le, amaa a numbili kaa ŋan ke, a gbanann biɛn yin be libunbɔnlin le.

³⁵Ni li nyi man wee ki laa che nwonween man be ni gbanann nin nan n kpann libunbɔnli.

³⁶Ni ma bu ni ye a gbanann biɛn ween, wee niba yan kaa bɔɔn ke, ni yin wonn le nbamɔm ke fila kaah ti ween ki too binum man ni.”

³⁷Yisa kaah nan pag diɛn, le Farasii yaab uba nan bei u ke un nɔɔ u wee bin tan ji tijiir. Le u nan nɔɔ u jon ki tan kɔɔ kal ke un ji.

³⁸Amaa le li ŋa Farasii yaab a ninfo nmɔn ligaril nin Yisa kaah kaa nir wee ki sin yin ji tijiir.

³⁹Le Uyudaau nmɔn bei u ke, “Nim Farasii yaab nir tiyir nin nsam a bɔɔn a binba le, amaa le ni sufu ni gbee nin kujaŋuuŋ nin npooton.

⁴⁰Nim tininfojɔr nan! Naa ye wan nan naan ni bɔɔn nin, u ma naan ni poolin mu.

⁴¹Amaa ni ta nan be ni yirin nin ni samin ni ki sei faladam ma wee ni bɔɔn nin ni poolin biɛn le ŋan.

⁴²“Woo nim Farasii yaab, ni yagir tikpinfar tan kaa yabin gbaa, nfim piig a poolin nba le ki tenn Uwonbɔr, kaa sin ŋaan nan ŋan ni, kaa ban Uwonbɔr i. Ni ŋan ke ni li ŋaan nan ŋan, ki li nyann ni wan piig a poolin n nba ki tenn Uwonbɔr a.

⁴³“Woo nim Farasii yaab, Ni ban ni li ka ininfogbingbem a kikaabol le kuwonjiɛndiigin ki ban bininfob li poor ni nin jilima kinyaŋin.

⁴⁴“Woo ni nann tikar tan kaa daag wee bininfob choon ti bu kaa sin nyi nan le.”

⁴⁵Le ban nyi Uwonbɔr a siim nbamɔmin a ni uba jiin ke, “Wan wɔɔn, ni ye a len man ke a sug ti muu.”

⁴⁶Le Yisa jiin ke, “Nim ban nyi Uwonbɔr a siim nbamɔm nan, woo, nan bu-n ni ta nsiim man pɔɔ takpem nan le, ki ta kpiɛ Uwonbɔr a siimin bu ki ta wɔɔn bininfob ke bi li ŋmag nsiim nmɔn nbamɔma. Ki mu kaa sin yin kpiɛ bi bu wee bi ŋmagi.

⁴⁷“Woo, nan bu-n ni maa Uwonbɔr a linlem a kar nbamɔm le ki tenn bi; bi ma ye bilinlem ban wee ni yaajam nan ku-n.

⁴⁸Naah tun man nan, ni ye siɛra le ki wɔɔn ke ni chee ni yaajam kaah nan tun man na. Bi ma nan ku bilinlem nmɔn, le ni mu maa bi kar.

⁴⁹Mambu le Uwonbɔr nin U lamgɔrikaam bei ke, “N li tun n linlem nin n tooi bi ban, bi li ku bi bam le ki mugir bitab.’

⁵⁰Ni ma bu bi li galin n-yonn nan a ninfob bilinlem ban biɛn wee bi nan ku hali dulinya nan a piinim,

⁵¹baah nan ku Ebiɛl n-yonn man ki nan kpaa Zakariya, wan wee bi nan ku-n Uwonbɔr a manug a binbinl nin iwonjiɛn niin n-yaa sisiigin nin. N bei ni le, bi li galin n-yonn nan a ninfob bilinlem nan biɛn a kum bu.

⁵²“Woo, nim ban nyi Uwonbɔr a siim nbamɔm nan, naah nyan nyinyim a samin bu. Ni baantɔɔl kaa nɔɔ mi, le ki bii ban ban bin kɔɔ nan a sam.”

⁵³Yisa kaah fɔɔr niin nan, le ban wɔɔnn Uwonbɔr a siimin nin Farasii yaab a ŋuul nan fii takpem, le bi piin ki baan ibinbaan ki jiin u bɔr tan wee u pag takpem nmɔn paam,

⁵⁴bi nan pen u lam le ki ban u pag ni ba.