Read Konkomba Lug 12 Bible Online

Lug 12 - Konkomba bible

Lug 12

¹Bininfob tuturil nan lagin tab ki dan ki nan mug Yisa ban hali ki ni nan taan tab a talangbin, le Yisa nan chinn pag nin u bɔɔnɔɔb ki ke, “Ni li nyi Farasii yaab nan nin bi danyugbeel nan bu man, bi ye bilinlarib le.

²Tibɔr tiba li kaa be ki woo wee kaa na li nya npaan ni ni; bee baah na li biɛ ti.

³Mambu, tibɔr tan wee ni pag libunbɔnlin nan, see ke ti nan nyan npaan ni; tan mu wee ni lɔɔg ki pag tidirin kaa ban uninfo a tuli n gbir nan, bi wo li ta ti mɔɔn npaan ni wee bininfob biɛn n gbir.

⁴“N jɔtiib, n bei ni le, ni laa san bininfob bijawaami, bi lee li fir ku ni gbanann a binba le; amaa le kaa ji li fir ŋa ni niba.

⁵Amaa n li wɔɔn ni naah li san wan. Ni li san Uwonbɔr man, wan li fir ku tigbanann, ki ji jɔɔ npɔɔn man li fir ta ŋa nŋmi man kaa jɔɔ njunim nan yaan. Ibamɔn le n bei ni nan, ni li san waah man.

⁶“Naa ye ijiɛn iŋmu le bi kɔɔr koobu bilee, amaa Uwonbɔr kaah tam bi ni uba bu.

⁷Ni laa san bijawaami man, ke Uwonbɔr nyi ni yukper a kanl, mambu, ni jɔɔ tinyɔɔr ki jon ijiɛn takpem ma.

⁸“N bei ni le, uninfo wan lig kan min bininfob a nintogil, min Uninfosaal a Big mu na li lig kan u Uwonbɔr a malakam ban,

⁹amaa wan mu ke waa nyim bininfobin ke, min Uninfosaal a Big mu na li ke maa nyi wi Uwonbɔr a malakam ban.

¹⁰Wan pag limɔbonl ki bii min Uninfosaal a Big ke, Uwonbɔr li jiɛn u bir ki per u; amaa wan pag ki sugir Kasi a Naaŋin ke Uwonbɔr kaa li jiɛn u daan a bir ki per wi.

¹¹“Ni ye bi choo ni ki ta ni dan tiwonjiɛndirin, bee ntim a ninkpeeb ni tininkper a pɔɔm ban, bee bibɔjib ban ki ke, bin pag ni bɔr ke, ni laa baan ni sufu ni ke ti yin pag ke nii wee ki nyan tiba tibɔrin ni.

¹²Nan bu-n n-yonn nmɔn foon ke, Kasi a naaŋin li wɔɔn ni naah li pag man.”

¹³Uja uba nan be kuninfogbaluŋ nmɔn yaan le ki bei Yisa ke, “Wan wɔɔn, bei n kpel nan wee u bɔgir ti baa a faalin ki seim ni.”

¹⁴Le Yisa bei u ke, “N jɔ ŋma seim npɔɔn ke, n ji ni tibɔr ki bɔgir ni baa a faal ki sei naa?”

¹⁵Mambu le Yisa nan mann pag kuninfogbaluŋin yaan ke, “Ni li nyi kujaŋuuŋ bu man, naa ye njɔɔm takpem bu li yin che uninfo nkan limiɛl lan kaa jɔɔ ndiɛmi.”

¹⁶Ni ma bu le u nan gaa bi libɔŋal ke, “Ujɔɔndaan uba a kpaab li nan naan tijiir takpem;

¹⁷le u nan tiɛr u sufu ni ke, ‘N lee ni yin ŋa nii, tɔ maa ji jɔɔ npaan man wee n li ta n jiir nan biɛn ki ŋa.’

¹⁸“Ni bɔɔn bu le u ke, ‘N yin ŋa nan le, n yin worin n naapɔr nan biɛn le, le ki mann tii tinaapɔr takpen. Ni yaan le n li ta n dii nin n jikaar biɛn ki ŋa.’

¹⁹Le ki nin bei n ba ke, ‘A jɔɔ tijiir tan li kpaan ibin takpem a poolin; li dɔ foora, ki ji ki nyu ki li jɔɔ npopeen.’

²⁰“Le Uwonbɔr bei u ke, ‘Lijajaril nan! Kunyiɛg nan a li kpo. Wee n lig n jee a jɔɔm nan ŋma nin ye maa?’

²¹“Wan lagin njɔɔm ki tenn uba, wee kaa sin jɔɔ njɔɔm Uwonbɔr ban ke, u mu nann kujajɔrug nan le.”

²²Le Yisa nan bei u bɔɔnɔɔb ke, “Ni laa che ni mugir ni, nin binbemin nin naah li ji niwann nan ni, ki mu laa che ni mugir ni, nin naah li yee tiwann yɔɔr tan ni,

²³limiɛl jon tijiira, le tigbanann mu jon tiwann yeewann na.

²⁴Ni lig nnɔɔm: Baa bu tijiiri, ki mu kaa chiɛ, ki mu kaa jɔɔ tinaapɔr bee tinanbonn ni, amaa, Uwonbɔr li jinn bi, naa jɔɔ tinyɔɔr takpem ki jon nnɔɔm maa?

²⁵Ni ŋma li fir fɔbig u miɛl ni wann nan wee u potiɛl mugir u nan buu?

²⁶Ke naah kaa li fir tun ki wan nyinyirig nan, ba ŋa wee ni che ni mugir ni nan gurin buu?

²⁷Ni lig nmɔɔpuum nin mi ŋam, maa tun itoon iba bee min loo ikinken ki sei mi ba; amaa n bei ni le nan, nin ubɔr Solomɔnn kaah nan jɔɔ u wan yɔɔr ŋan tan nan, waa laa nyi ki yee tiwann yɔɔr wee ti ŋan ke nmɔɔpuum kaah ŋan man ni gbaa.

²⁸Timɔɔr tan be dinan, wee won ke bin nyɔɔ ti nŋmi nan, le Uwonbɔr mann ŋaŋir ti le kaa li fir yeen nim maa? Nim ban a yada waar nan!

²⁹“Le ni laa gbaar ban naah li ji nan bee naah li nyu nan ni, ki mu laa mugir ni potiɛli,

³⁰nan bu-n, ban kaa jɔɔ Ween gu nɔɔ tiwann nan le, amaa nim ma, ni Baa Uwonbɔr pii nyi ke ni ban tiwann nan le.

³¹Amaa ni li ban Uwonbɔr a naamin na, wee un ta tiwann yɔɔr nan biɛn ki sei ni.

³²“N ninfob ban kaa yab nan, ni laa san bijawaami, ni Baa Uwonbɔr jɔɔ npopeen nin waah yin jin ni nnaam n bu.

³³Ni kɔɔr ni wan yɔɔr tan wee ni jɔɔ-n ki ta ni ligi ki sei bilanjiim ma, ni ban ilig a bɔɔlim man kaa li chari, ki ban lifaal lan kaa jɔɔ diɛmi ki be Uwonbɔr a niin ni. Nan yaan wee unaayig kaa li fir kɔɔ ki tan su, wee ikootug mu kaa li fir mɔɔ ki bii i.

³⁴Mambu nan yaan wee a faal be nan, a potiɛl mu be niin le.

³⁵“Ni yeem ni wan yɔɔr ki ŋa sili nin itoon na, ki che ni filaam li gaan na,

³⁶ki li be ke bitoontum kaah ti guu bi yudaau wan jon lipiikɔɔnl a jiir a jim kaah li foon man ni, wee ki nan kpaar linaanganl wee bi loor weem man ni.

³⁷Bitoontum ban wee bi yudaau li foon ki miin bi guu u kunim nan npopeen ye bi yaan le. N bei ni ibamɔn le, u li ŋa sili ni itoon, ki che u toontum nmɔn kal le un yuur tijiir ki nan sei bi, le bin ji.

³⁸Ni ye bi yudaau nmɔn nan foon kunyiɛgtasiig bee kikojamɔɔŋ, ki miin bi la guu u ke npopeen yin ye bi yaan le.

³⁹Amaa ni biɛm ni nan man: Ni ye u niin daan nyi n-yonn man wee unaayig li kɔɔn ki nan su u ke, waa yin chee un kɔɔ; u yin guu le.

⁴⁰Ni mu ŋaam sili ki li guu, min Uninfosaal a Big nan yin jiirin n-yonn man wee naa nyi bu n le.”

⁴¹Le Piita baan Yisa ke, “Uyudaau, a gaa tim le libɔŋal nan bee bininfob biɛn naa?”

⁴²Le Uyudaan jiin ke, “Utoontunn u la baa jɔɔ nlam ki tun ke u baa kaah ke u tum man naa? U ma ye wan wee u baa yin che u ŋa bitoontum nmɔn a ninkpelu, wee ki li lig u toontum ban biɛn be u niin nmɔn, ki li tenn bi tijiir n-yonn man kpaan nin bin ji.

⁴³Ni ye u yudaau n nan kun ki miin u la tun man ke, npopeen yin ye utoontunn nmɔn yaan le.

⁴⁴N bei ni ibamɔn le, u yudaau nmɔn yin ta u jɔɔm biɛn le ki ta ŋa utoontunn nmɔn a nɔɔn ke u li liga.

⁴⁵Amaa ni ye utoontunn nmɔn yii ki ke u yudaau nmɔn kaa yin jiirin weemin, wee ki piin ki boo u toontunn tab, bijab nin bipiib, wee ki ji ki nyu ndaam ki gbeeg ke,

⁴⁶u yudaau nmɔn nan yin jiirin lidaal lan, nin n-yonn man wee utoontunn nan kaa yin nyi le. U yudaau nmɔn na li dar u tul pam, ki ŋa u ke baah ti ŋaan tukangbir dam man nin.

⁴⁷“Utoontunn wan nyi u yudaan kaah ban un tun man, ki mu kaa ŋaa sili, ki mu kaa ji tun ke, bi li boo inɔɔkul takpem.

⁴⁸Utoontunn wan kaa nyi u yudaan kaah ban un tun man, wee ki tun nan kaa bi ye un tun ke, see ke bi boo u wama, le ki ta u jaa. Wan wee bi sei u wee ni yab nan, u ma le bi na yin baan ki gaa nan yab; amaa wan wee bi sei u wee ni yab takpem nan u ma mu le bi na yin baan ki gaa nan yab takpem.

⁴⁹“N dan n nan nyɔɔ nŋmi le dulinya nan yaan. N bi ban ke na mi pii gaan le!

⁵⁰Amaa n jɔɔ nnyum a fum n gaa, ni yin ŋaam npoobiin le hali nin naah na li diɛ.

⁵¹Ni tiɛr ke n dan n nan sei dulinya nposɔɔn lee? Aai, n bei ni le, amaa nbɔgirim.

⁵²Naah nyan dinan ki chaa, bininfob biŋmu lagin ki be iniin iba a poolin ke bi na li yiɛr, le bita nan bii bilee, le bilee-n mu li bii bita nmɔn.

⁵³Bibaam na li bii bi buwaab, le nbuwaab mu na li bii bibaam, binam na li bii bi bisiɛm, le nbisiɛm mu na li bii binam; yaabisiɛm na li bii bi chapinyam, le chapinyam mu na li bii bi yaabisiɛm.”

⁵⁴Le Yisa nan pag bei kuninfogbaluŋin ke, “Naah ti nan kan kitilangbɔŋ do liwonlul paam min, ni ti pag le weem ke utaal yin nu le, le un sin nan nu.

⁵⁵Ni ti nan kan ntafaam daar ki nyan nnɔɔgan paam ke, ni bei le ke kutuntoŋ le be, le nin sin nan toŋ.

⁵⁶Nim bilinlarib nan, ni ŋaa nii ki biɛr utaal nin kutuntoŋ ki bɔgir wee kaa sin li fir biɛ isaŋ nan ma a bɔgirim maa?

⁵⁷“Ba ŋa wee naa li fir ji nitɔɔl a bɔr ki gann nan ŋan ki sei ni baa?

⁵⁸Fin nin uba jɔɔ tibɔr, wee u ban un ta ti ki jo ibɔrniin ke, naah la be nsan bu ki chaa nan, choo u dunl weema, wee un laa ta ti ki jo, naa ye man ke u yin dar ti foo bibɔjib ban le, le bibɔjib mu li taaŋ ki sei wan guu kuloondiigin, le wan guu kuloondiigin taaŋ ki loon.

⁵⁹N bei ni le, ŋaa li nyi nya, see ke a nan yɔn ilig yaan wee bi ke a yɔ-n biɛn hali koobu kaa yin guri.”