Read Konkomba Lug 13 Bible Online

Lug 13 - Konkomba bible

Lug 13

¹Iyaayoo nmɔn le bininfob biba nan be, le ki nan bei Yisa Galilii yaab ban wee Palati nan kun ki ta bi cham ki ŋmarin kumanug a cham.

²Le Yisa jiin ke, “Galilii yaab nmɔn kaah jin fala man nan, ni tiɛr ke bi toonbir jon bi tab yaar le?

³N bei ni le, aai! Amaa naa kpenn ni binbem ke, ni biɛn mu na yin kpo man le.

⁴Bee ligonl fufɔbil kaah nan lu ki ku bininfob piig nin biniin Siloom a tiŋin ni, ni tiɛr ke bi galin nan yab jon ban biɛn nan be Jerusalam nlee?

⁵N bei ni le, aai! Amaa naa kpenn ni binbem ke, ni biɛn mu nan yin kpo man le.”

⁶Le Yisa gaa bi libɔŋal ke, “Uja uba le nan jɔɔ kiduusiig u kpaabin, weemba daal le u jon ke u tan laa tiduur, le kaa tan kan ni.

⁷Le ki bei u kpaguur win ke, ‘Ibin itaa sɔ le n gbaa chaan kiduusiig nan yaan ke n nan laa tiduur, le kaa ga niba. Ga ki gab ba! Ba ŋa wee ki si ki bii ntam yɔlii?’

⁸“Le u kpaguur win jiin ke, ‘Uyudaan, jiɛn na wee nin ŋa libinl liba ki kpiɛ, n li gbii ki tum ki piin nkpatam ŋam,

⁹Ni ye ki lon libinl daal ke, ni ŋan! Naa ye man ke, a gaa ki gaba.’ ”

¹⁰Juu yaab a kpakɔɔl daal le Yisa nan be wɔɔn Uwonbɔr a bɔr kuwonjiɛndiigin kiba yaan,

¹¹le upii uba nan be kudiig nmɔn yaan, le kinaanbiig nan che u ŋa kiwɔbig ibin piig nin iniin. U nan bɔɔ le kaa li fir naar kolibi.

¹²Yisa kaah nan kan win, le u yin u nyann nintogil le ki bei u ke, “Upii, a wiɛn nmɔn jaa ŋa.”

¹³Le ki ta u nɔɔ ki paan upii nmɔn bu. Libol nmɔn yaan le u naar u tɔɔl le ki pag Uwonbɔr.

¹⁴Yisa kaah nan teb upii-n nmɔn likpakɔɔl daalin bu le kuwonjiɛndiig a ninkpelu a ŋuul nan fii le u bei bininfob ke, “Iweehn iloob li be ki ye itoon a ween. Mambu ni li chaan iweehn loobin a sisiigin ki nan gaa kutebug, amaa ki laa ji chaan likpakɔɔl daal li.”

¹⁵Le Uyudaan jiin u ke, “Nim bilinlarib nan! Ni ŋma kaa loor ni naau bee ni boŋ ki ta jo nkpen ki tan nyun ki likpakɔɔl daal laa?

¹⁶Le upii wan ma ye Abiraham a yaabil nan, le Sintani ŋa u tiyomir ibin piig nin iniin, le naa bi kpaa nin n nyan u tiyomir nmɔn yaan likpakɔɔl daal laa?”

¹⁷Waah nan pag man n-yonn man nin, le u dataam biɛn nan jin ifa, amaa le kuninfogbaluŋin biɛn nan jɔɔ npopeen nin waah nan tun ligaril a toonl yan biɛn nin bu.

¹⁸Tɔ le Yisa nan baan ke, “Uwonbɔr a naangbɔŋ nann baa? N yin ta mi ki naŋ baa?

¹⁹Mi nann nnyiɛnbim man wee uninfo ta bun u kpaabin nin le. Le min yabig ki ŋa busub, wee nnɔɔm dan ki nan tiɛ bi tar ki bun le.”

²⁰Le U ji nan baan ke, “N yin ta Uwonbɔr a naangbɔŋ nan ki bigin baa?

²¹Uwonbɔr a niin a naam nann boroboro a nyɔgim man wee upii ta ŋmarin boroboro a yom man yabin wee min fugir ki do-n le.”

²²Le Yisa kaah nan be nsan bu ki chaa Jerusalam nan, u nan nɔɔ ntintakpem nin ntinbumin, ki wɔɔn bininfob Uwonbɔr a bɔr;

²³le uba nan baan u ke, “Uyudaan, bininfob wama le na yin kan feegabaa?” Le U bei bi ke,

²⁴“Ni pɔɔn ni ba wee ki nan kɔɔ linaanganl lan kaa yalin nan yaan. N bei ni le, bininfob takpem na li ban bin kɔɔ niin, le kaa yin fir kɔɔ.

²⁵Ni ye uniindaan nan fii ki loon linaanganl wee ni paar ki si nkaafiin ki kpaar linaanganl ki ke, ‘Uninkpel, loora wee ti kɔɔ ke.’ “Amaa u li ke, ‘Maa nyi ni; kaa nyi naah nyan nan yaan ni.’

²⁶“Le ni na li ke, ‘Tim nin fin nan lagin ki ji ki nyu na; ke a wɔɔn ti Uwonbɔr a bɔr ti timin na.’

²⁷“Amaa le u ji li jiin ke, ‘Maa nyi ni, kaa nyi naah nyan nan yaan ni. Nim ti toonbir dam nan biɛn, ni fɔɔr n ban na!’

²⁸“Ti mɔr na li be niin, nin inyin a ŋmam, n-yonn man wee ni na kan Abiraham, nin Azig nin Jekɔb nin bilinlemin biɛn kaah be Uwonbɔr a naam ni, amaa nim ma bi li ta ni ki gab nkaafiin.

²⁹Bininfob na li nya liwonpɔɔnl, nin liwonlul, nnɔɔjiin nin nnɔɔgan paam ki nan kɔɔ Uwonbɔr a naamin ki kal bi kikaabol ki ji tijiir.

³⁰Ibamɔn bibɔɔnpaab na li ŋa bisanliib, le bisanliib mu li ŋa bi bɔɔn paab.”

³¹Iyaayoo nmɔn le Farasii yaab biba dan Yisa ban, ki nan bei u ke, “Nya do ki li chaa niba paam ma, Ubɔr Herɔd ban un kuŋ le.”

³²Le U jiin ke, “Ni li chaa ki tan bei kuŋɔg nmɔn ke, ‘Dinan nin won le n yin nyan nnaanbiim bininfobin, ki che bibaarib n pɔɔg. Iweehn itaa daal le n toon yin diɛ.’

³³Ni le ye man ke, ni kpaa le nin n jo Jerusalam dinan, nin won, nin daalib. Nan bu-n ulinlenn kaa kpeg niba yaan ni see Jerusalam!

³⁴“Jerusalam, Jerusalam, nim ban ku Uwonbɔr a linlem, ki yɔgir ban wee u tun ni ban ni itangbag ki ku bi. Iyoo biɛn le n gbaar le ke n lagin ni nba, ke ukool kaah lagin u koobum ki ŋa u jiɛgin man ni, le naa ban man ni.

³⁵Ni lig man, Uwonbɔr jiɛn ni niin ki per na. N bei ni le, naa ji li kam mi nin naah na li ke, ‘Tikaar be uninfo wan choon Uwonbɔr a yinl bu-n.’”