Read Konkomba Lug 14 Bible Online

Lug 14 - Konkomba bible

Lug 14

¹Likpakɔɔl liba daal, le Yisa nan tan kɔɔ Farasii yaab a yudaau a niin ke un ji tijiir; le ban nan be niin nmɔn nan dibir u.

²Iyaayoo le ubaar uba be u nintogil, u taai nin u nɔɔi li nan pugin.

³Le Yisa baan ban nyi Uwonbɔr a siimin nin Farasii yaabin ke, “Nsiim chee ke ti li teb bininfob likpakɔɔl daal be ti la teb aa?

⁴Amaa le bi ŋmin. Le Yisa choo uja-n ki teb u ki jaa u le u jon.

⁵Le ki baan bi ke, “Ni ye ni ni uba jɔɔ kibig bee u naa wee u nyan lu libonl a poolin likpakɔɔl daal ke, waa li nyan u weem likpakɔɔl daal nmɔn naa?

⁶Le baa nan fir len niba.

⁷Yisa kaah nan kan bichamin kaah kal bi jilima a kikaabol bin ji tijiirin le u gaa bi libɔŋal ke:

⁸“Bi yiŋ lipiichanil a jiir a jim ke, laa kal jilimadam a kikaaboli. Nba ke bi yin wan joŋa ke u chaan.

⁹Ni ye man ke, udindaan wan yin ni bilee nmɔn li dan ki nan beiŋ ke, ‘Ta a kikaabol ki sei uja nan na.’ Le ifa nchooŋ le a kal nan yaan kaa ye jilima a kikaabol li.

¹⁰Amaa ni ye bi yiŋ ke, kalim nan yaan kaa jɔɔ jilima a bol, wee ni ye udindaan ni nan dan ke, u li beiŋ ke, ‘N jɔ, fii ki tan kal nan yaan jɔɔ jilima a bola.’ Man le a chantab a num li gbeeŋ.

¹¹Uninfo wan biɛn don uba li jiir tum; wan mu jiin uba tum, li do paab.”

¹²Le Yisa nan bei wan yin u ke un nan ji-n ke, “A ŋaa tijiir ke, a laa yin a jɔtiib, bee a kpetiib, bee a maalim, bee a kunkɔɔn tab ban ye biwandamin ni, ni ye a ŋa man ke, bi mu li yiŋ ki yɔŋ.

¹³Amaa ni ye a yin yin bininfob tijiir a jim ke, a yim faladam, nin nwɔbim, nin ndiɛm, nin bijɔɔm,

¹⁴le Uwonbɔr a kaar li be a bu. Hali baah kaa li fir yɔŋ nan, Uwonbɔr li na yin yɔŋ, lidaal lan wee bibuchim na yin fii nkumin nin.”

¹⁵Ban nan lagin ki ka ji nin Yisa nan a ni uba kaah nan gbir man ni, le u bei Yisa ke, “Ban na yin ji tijiir nmɔn Uwonbɔr a niin nan, tikaar ye bi yaan le.”

¹⁶Le Yisa jiin ke, “Uja uba le nan be le ki nan ŋaan sili nin kuchiig takpeŋ a jim, le ki yin bicham takpem.

¹⁷Kuchiigin a yoo kaah nan nan foo-n, le u tun u toontunnu ke un tan bei bininfob ban wee u nan yin bi-n ke, ‘Ni dan ke tijiirin biɛn ŋa siliu.’

¹⁸“Amaa le bi biɛn nan piin ki ban isan yan wee bi li yii ki laa jo. Le chinchinn a ninfou win bei u toontunn nin ke, ‘N daa bikpapɔm le ki ban n jo ki tan lig baa be man, mambu n ŋa gafarau.’

¹⁹“Le uba mu bei u ke, ‘N daa inaaja kokaa piig le ki ban n tan bigin ki lig bukpaabin. N ŋa gafarau.’

²⁰“Le uba mu bei u ke, ‘N le la kɔɔn upii le daandaan nan, maa li fir dan ni.’

²¹“Le u toontunn nmɔn jir kun u yudaau n ban, ki tan bei u bi biɛn kaah len man. Le liŋuul choo u. Le u bei u toontum n ke, ‘Ni li chaa kitiŋ poolin a sambu ki tan yin bilanjiim nin nwɔbim nin bijɔɔm nin ndiɛm ke bin dan.’

²²“Le u toontunn nin bei u ke, ‘Uninkpel, n tan tun ŋa wɔɔnim man nin na, amaa npaan la be.’

²³“Le u yudaau ni bei utoontunn ke, ‘Nyam ki li chaa kitintakpeŋin a san bu nin n sanbumin, ki che bin kɔɔn, wee n niin nan ngbee.

²⁴N bei ni le, ban wee n nan yin ni a ni uba kaa li len n jiir nan ni.’ ”

²⁵Bininfob takpem le nan nɔɔ Yisa, le u nan gbiɛ lig bi ki ke:

²⁶“Ni ye uninfo dan n ban, wee kaa nan u baa nin u na, nin u piib nin u buwaab, nin u kpetiib nin u watiib nin u ninsiɛb, hali nin u tɔɔl a miɛfol ke, waa li fir ŋa n bɔɔnɔɔru wi.

²⁷Le uninfo wan mu kaa yuur u kum a dapunpunl ki nɔɔ min ke, waa li fir ŋa n bɔɔnɔɔru wi.

²⁸“Ni che ti len ke ni ye ni ni uba ban un maa ligonl lan fɔg ke, waa li chinn kal ki bon kudaag ki jee u ligi li foo bee yaa li foo?

²⁹Nan bu-n ni ye ke u fiɛ lifiɛl wee kaa fir maa diɛ wee wan biɛn nan kan ke u li laa u,

³⁰Ki ke, ‘Uja nan nan piin ki ma le kaa nan fir diɛ.’

³¹“Bee ti len ke ubɔr uba li chaa un tan to u bɔr kpiɛg bitɔb. Waah li chinn ki kal ki bon jee u li fir ta bitɔtogib turpiig ki nyaŋ ubɔr wan jɔɔ bitɔtogib turpilee nan naa?

³²Ni ye baa li fir to ke, see ke u tun ntoon le bin tan balin baah la be nan yaan fɔg nan.

³³Man li ye ni, ni ye ni ni uba kaa jiɛn waah jɔɔ nan biɛn ke, waa li fir ŋa n bɔɔnɔɔru wi.

³⁴“N-yaam ŋan; amaa ni ye mi mɔmin nan diɛ ke mi ji yin ŋa nii ki mɔɔ?

³⁵Mi ŋa yɔli le nmɔn. Maa ji yin jɔɔ niba a ter li. Maa ji yin ŋan ki sei titann ni, le kaa ji yin ŋan ki sei lifatanpol mu. Bi yin tami gab le. “Wan jɔɔ litul ke un gbirim.”