Read Konkomba Lug 16 Bible Online

Lug 16 - Konkomba bible

Lug 16

¹Le Yisa bei u bɔɔnɔɔb ke, “Ujɔɔndaan uba le nan jɔɔ u toontunnu, le bi nan nan bei ujɔɔndaan nin ke, u toontunnu win bii u faal le.

²Le ujɔɔndaan nin nan yin u ki baan u ke, ‘Ba a bɔr yen wee n gbir a bu man naa? Wɔɔm ŋaah ŋmag lifaalin man, nan bu-n ŋaa ji li fir ŋa utoontunn ninkpel jigin ni.’

³“Le utoontunn ninkpelin ni nan tiɛr u sufu ni ke, ‘N yudaau ban un ŋɔɔrim n toon nan yaan le. N ni yin ŋa nii? Maa jɔɔ npɔɔn ki li fir ko, le ki mu sin san ifa nin n li miɛ,

⁴n nyi maah li ŋa man wee bininfobin gaam bi niin, n-yonn man wee n yudaau nan nan yii mi.’

⁵“Le ki yin uyudaau a pɔndamin ubaba ubaba. U nan baan chinchinn a pɔndaan win ke, ‘A jɔɔ n yudaau a pɔnl iŋaa?’

⁶“Le u jiin ke, ‘Olif a siigi a kpam galam kobiniin.’ “Le utoontunn ninkpelin bei ke, ‘Yuurim a pɔnl a gbɔŋ, ki tan kal ki sɔb galam kobina.’

⁷“Le u ji baan wan pa-n ke, ‘A mu jɔɔ lipɔnl iŋaa?’ “Le u jiin ke, ‘Idi botu turil.’ “Le u bei u ke, ‘Yuurim a pɔnl a gbɔŋ wee ki sɔb idi botu piniin.’

⁸“Le utoontunn ninkpelin a yudaau pag u, ki ke u jɔɔ nlam. Nan bu-n Uwonbɔr a ninfob kaa jɔɔ nlam nin bin ter tab Uwonbɔr a toon yin ke dulinya yaab kaah jɔɔ nlam nin bin ter tab man ni.

⁹N bei ni le, ni ta dulinya nan a jɔɔm ki ban jɔtiib, wee ni nan diɛ ke, ni li kan nkikaa ŋan man be Uwonbɔr a niin kaa jɔɔ ndiɛmin.

¹⁰“Uninfo wan tun kitoonbig nin yada-n, uma mu le li fir tun litoonl takpenl nin yada. Le uninfo wan mu kaa li fir tun kitoonbig nin yada ke, waa li fir tun litoonl takpenl mu nin yada.

¹¹Mambu ni ye baa ŋaaŋ yada nin ŋaah ŋmag dulinya nan a faal ke, ŋma li ŋaaŋ yada nin ibamɔn a faalin yaan naa?

¹²Le ni ye baah ŋaaŋ yada nin a ŋma uba a faal ke, ŋma yin ta a tɔɔl a faal ki sei ŋaa?

¹³“Uyom uba kaa li fir tun ki tenn biyudam bilee. U yin nan uba le ki sin ban wan gurin; bee u yin ŋaan uba le tiŋann le ki sin yin wan guri yɔli. Ŋaa li fir nɔɔ Uwonbɔr ki sin ji nɔɔ iligi.”

¹⁴Le Farasii yaab, ban ban ilig takpem nan gbir Yisa kaah len man ni, le ki laa u.

¹⁵Le u bei bi ke, “Nim ban wɔɔnn ni ba ke ni ye bibuchim bininfob ban nan, amaa Uwonbɔr nyi ni sufu ni. Nan wee uninfosaal tiɛr u sufu ni ke ni ye niwann ŋann tan kagin, amaa Uwonbɔr ban ni ye yɔli le.

¹⁶“Bi nan mɔɔn Nsiimin nin Bilinlem a bɔr le hali nin Jɔnn kaah nan nan foon. Naah nan nyan iyaayoo ki nan kpa daandaan nan, bi mɔɔn tibɔŋann tan pag ki jiin Uwonbɔr a niin a naam npaam le, le bininfob mugir biba ke bin nan kɔɔ Uwonbɔr a niin a naam nmɔn yaan.

¹⁷Papaab nin tum na li bor amaa Uwonbɔr a siim man sɔb dɔ-n a wan big kaa yin nyi bori.

¹⁸“Uja wan biɛn yii u poo wee ki ji kɔɔn upii uba ke u tun iwanchɔgin toon na, uja wan mu taa upii wan a chal yii u ke u mu tun iwanchɔgin toon na.

¹⁹“Ujɔɔndaan uba le nan be, ki yee itan ŋan iyoo biɛn, ki ŋaan waah ban man idaa biɛn nin npopeen.

²⁰Le bi nan ti jɔɔn ulanjiin wan miɛ wee bi yi u ke Lazarusi, ki chaan ki nan kaan ujɔɔndaan ni a niin a timansanmɔnn. Umimiɛr nmɔn nan jɔɔ ibiɛ le u gbanann biɛn

²¹le ki ban ke u li pii isaabul yan nya ujɔɔndaan nin a jibol ki ji. Hali ibɔ mu nan ti chaan ki nan liɛ u biɛ yin le.

²²“Le faladaan nin nan kpo, le malakam nan ta u jon Abiraham ban. Le ujɔɔndaan nin mu nan kpo, le bi pii u.

²³Waah nan be nŋmi-n nton nin ni, le ki nan nan waan lig ki kan Abiraham nan fɔg, le Lazarusi be u ban.

²⁴Le ujɔɔndaan nan yin u ki ke, ‘Ti Baa Abiraham, sam kunyunyunbaag ni wee ki tun Lazarusi un tan ta u nɔɔbil ki bɔ nnyumin ki nan ma n lanbil wee lin sɔŋ, nan bu-n n be limugilin le nŋmi nan yaan.’

²⁵“Amaa le Abiraham nan jiin u ke, ‘N big, li tiɛr ŋaah nan be a miɛfolin ni a nan gaa a wan ŋann na, le Lazarusi mu nan gaa nan kaa ŋan na, amaa daandaan nan u ni be lifooril ni le a mu be limugil ni.

²⁶Nan kpiɛ li ye libogil lan nyɔɔ li dɔ tim nin fin a sisiigin le uba kaa li fir nya ti ban ki jo a ban ni, le uba mu kaa li fir nya a ban ki dan ti ban ni.’

²⁷Le ujɔɔndaan nan jiin ke, ‘Man ke n balin le, baa, tum Lazarusi n baa a niin,

²⁸nan bu-n n jɔɔ watiib biŋmu le. Che un tan kpaan ba wee bi mu laa nan dan nan yaan wee n be ki ji fala nan ni.’

²⁹“Le Abiraham jiin ke, ‘Bi jɔɔ Moziz nin Bilinlem; che bin pel bi bɔr.’

³⁰“Le u ke, ‘Aai baa Abiraham, amaa ni ye uba li bi fii nkumin ki jon bi ban ke, ni ma le bi bi li kpenn bi binbem.’

³¹“Le Abiraham bei u ke, ‘Ni ye baa pel Moziz nin Bilinlem a bɔr ke, uninfo fii nkumin wee ki tan pag sei bi ke baa le yin chee u mɔbi.’ ”