Read Konkomba Lug 17 Bible Online

Lug 17 - Konkomba bible

Lug 17

¹Le Yisa nan bei U bɔɔnɔɔb ke: “Tiwann tan li che bininfob ntun tibir li dan, amaa ni li bir ki sei naah dan wan bu.

²Bi bi ta linaal ki lol jɔn u sulum ki ta u jaa limɔgilin ke ni bi sɔ, nin un che nbuwaab nan a ni uba ntun tibir.

³Ni choom ni bau man! “Ni ye a nabig tun tibir ke, a kpaan mu; le ni ye u kpenn u binbem ke, a jiɛn u bir ki per wa.

⁴Ni ye u ŋaaŋ tibir itaa ilile lidaal a poolin, wee ki dan a ban itaa ilile ki ke, ‘n kpenn n binbem ma ke, a jiɛn per wa.’ ”

⁵Le itoon ni nin bei Uyudaan ke, “Kpiɛ ti yada ni.”

⁶Le u jiin ke, “Ni ye ni bi jɔɔ yada wee ki yaab foo nnyiɛnbim ke, ni bi li fir bei busub nan ke, ‘Ŋab ki tan ŋuun limɔgilin na,’ le busub nmɔn bi li chee ni mɔb.”

⁷“Ni ye ni ni uba jɔɔ uyom wee u ko bukpaab bee u kpaa ipee, wee uyomin nan nyan bukpaabin ki chaa kun ke, a li bei u ke, ‘Dan ni ki nan kal do ki ji tijiiraa?’

⁸Naa ye u yin len le ke, ‘ŋa n nyiɛg a jiir a, ŋa sili ki li guum maah ji ki nyu n-yonn man ni na; ni bɔɔn bu a ban ke a mu li ji ki nyuu’?

⁹U li chee sei u toontunnu nmɔn kunɔɔpoog waah chee ki tun nan wee u bei u ke un tun ni naa?

¹⁰Man li ye ni mu, n-yonn man wee ni tun Uwonbɔr a toon yan wee u ta sei ni nan diɛ ke, le ni ke ‘Ni ye ti toon le, taa kpaan ni uba n pag ti.’

¹¹Yisa kaah nan chaa Jerusalam n-yonn man ni, le u nan nɔɔ Samariya nin Galilii a tinpaam a sisiigin.

¹²Waah nan tan foon kitiŋ kiba ni-n, le bijab piig ban ye nkɔm nan to u. Bi nan sir nan fɔg le,

¹³ki yin nkukɔpɔɔn ke, “Yisa, Uninkpel, san ti kunyunyunbaag ni!”

¹⁴Yisa kaah nan kan bi n-yonn man ni, le u ke, “Ni li chaau, ni tan ta niba ki wɔɔn biminmaniba.” Baah nan chaa-n le bi nan kan kutebug nsan bu.

¹⁵Le bi ni uba kaah kan ke u kan kutebugin, le u nan jirin Yisa ban ki nan pag Uwonbɔr nin nkukɔpɔɔn.

¹⁶U nan gbaan Yisa a nintogil le ki sei u kunɔɔpoog. U nan ye Samariya a ninfou le.

¹⁷Le Yisa baan ke, “Bininfob piig le ma bi teb bin naa? Ke bininfob biwiɛ-n ma be laa?

¹⁸Uba kaa jirin ki nan sei Uwonbɔr kupag aa, ni paa ye uchaan nan a binba lee?”

¹⁹Le ki bei uja nmɔn ke, “Fii ki li chaau, ke a yada bu a pɔɔga.”

²⁰Farasii yaabin kaah nan baan Yisa n-yonn man wee Uwonbɔr a naam nmɔn yin fooni, le u bei bi ke, “Uwonbɔr a naam kaa yin foon naah maan ni ba ki dibirin bu,

²¹bee uba kaa yin bei ke ‘Lig, mi ma sɔ’, bee ‘Mi be nan do.’ Nan bu-n Uwonbɔr a naamin be ni ban.”

²²Le ki nan bei u bɔɔnɔɔbin ke, “N-yonn chaan le ni na li ban ni kan min Uninfosaal a Big a weehn yin a nba, amaa le kaa yin kan ni.

²³Bininfob na li bei ni ke, ‘U be niin! Bee,’ ‘U be do!’ Ni laa gu ki nɔɔ bi.

²⁴Nan bu-n Uninfosaal a Big a dam a daal na yin nann utaal kaah nyagin ki woon kitilangbɔŋ a yagi biɛn nin le.

²⁵Amaa ni kpaa le ke u na chinn ji fala niwann takpem ni, wee dulinya nan a ninfobin na yii u.

²⁶“Ke naah nan ye man Nowa a yoo ni, ni ji na yin ye man le Uninfosaal a Big a dam a yonn.

²⁷Bininfob nan ji le, ki nyu, ki kɔɔn bipiib ki jɔɔ bi buwaab ki tenn bijab, ki nan nan kpaa lidaal lan wee Nowa nan nan kɔɔ kuŋaluŋ. Le nnyum takpem nan dan ki nan jin bi biɛn.

²⁸“Ni nan ye man le Loti a yonn ni. Bininfob nan ji le ki nyu, ki daan ki kɔɔr, ki bu, ki maa.

²⁹Amaa lidaal lan wee Loti nan nyan Sodom nan, nŋmi nin lichabil le nan nyan paab ki nan lu tum ki gaa bi biɛn.

³⁰“Lidaal lan wee min Uninfosaal a Big na li kpiirin ni, ni na yin ye man le.

³¹Lidaal nmɔn, uninfo wan nan be u niin limɔɔpinl a paab, wee u wann yɔɔr be poolin ke u laa ji ke un jiir ki tan yuuri; le wan mu be bukpaabin ke, u laa ji kun ke un tan yuur niba.

³²Li tiɛr Loti a poo a bɔr!

³³Tɔ, uninfo wan ban un ŋma u miɛfol ke u li lann li, le wan lann u miɛfol ke u na li kan li.

³⁴N bei ni le, lidaal nmɔn a nyiɛg, bininfob bilee na li lagin dɔ gadu bu, bi na li yuur uba ki jiɛn wan gurin.

³⁵Bipiib bilee na li lagin be ki naan idi, le bi na li yuur uba ki jiɛn wan gurin.

³⁶[16] Bijab bilee mu na li be bukpaabin, le bi na li yuur uba ki jiɛn wan gurin.”

³⁷Le bi baan u, “Laa, Uyudaan?” Le u jiin ke, “Nan yaan wee tiwannkpiin be-n, ni yaan le tijuur lagin.”