Read Konkomba Lug 19 Bible Online

Lug 19 - Konkomba bible

Lug 19

²Le uja uba be niin u yinl ye Zakiusi; u nan ye bilanpogaab a ninkpelu le ki ye uwandaan.

³U nan ban un kan Yisa kaah ye wan le, amaa waah nan ye kininfogingeŋin bu waa nan fir kan wi, kuninfogbaluŋin bu.

⁴Ni ma bu le u nan chinn guun ki jon bi titogil ki tan don kikinkansiig ke un kan waah yin jo man, Yisa kaah nan nɔɔ man ki chaa-n bu.

⁵Yisa kaah nan foon kikinkansiig nmɔn yaan nin, le ki waan lig u ki ke, “Zakiusi jiirin weem ni. N yin n be a niin le dinan.”

⁶Le u jiirin weem ki gaa u nin npopeen.

⁷Bininfobin biɛn nan kan man le ki piin ki ŋulin ki ke, “U jon un tan ŋa uchaan le ‘tibir’ daan a niin.”

⁸Amaa le Zakiusi nan sir paab ki bei Uyudaan ke, “Lig, Uyudaan! Daandaan nan n li bɔgir njɔɔm a poolin biɛn ki sei faladam, le ni ye n nan jin uba dulim ke n li jiin udaan man a fim mina.”

⁹Le Yisa bei u ke, “Dinan feegab foon iniin nan yaan na, nan bu-n uja nan mu ye Abiraham a yaabil le.

¹⁰Nan bu-n Uninfosaal a Big dan ke u nan ban kan ban borin le, ki fee bi ki jaa.”

¹¹Baah nan pelig ni niɛ nan nin, le u nan gaa bi libɔŋal, nan bu-n u nan mal Jerusalam ma le bininfobin nan tiɛr ke Uwonbɔr a naamin paa yin foon le nba bu.

¹²Le u ke, “Ubuchin uba le nan jon kitiŋ kan fɔg, ke bin tan jin u nnaam wee un jirin.

¹³Le u yin u toontum piig ki sei bi salima kon piig. Le ki bei bi ke, ‘Ni ta ilig nan ki kpeŋa, hali nin maah na li jirin.’

¹⁴“Amaa u bɔɔn yaab kaa nan ban ubɔri le ki tun ntoon bin tan bei ke, ‘Taa ban uja nmɔn nŋa ti bɔru wi.’

¹⁵“Amaa u nan jin u naam ma ki jir kun. Le u nan tun ki yin u toontum ban wee u nan ta iligin ki sei bin ke un kan baah ta kpeŋ ki kan ti nyɔɔr tan.

¹⁶“Le chinchinn yaa win dan u ban ki nan bei u ke, ‘Uninkpel, a salima-n ŋa tinyɔɔr piig ki kpiɛu.’

¹⁷“Le u ninkpelu nmɔn jiin ke, ‘A ŋa choba, n toontunn ŋau! Ŋaah fir ki ŋmag niwann wama nbamɔm nan bu, gaam ntim piig a ninkper.’

¹⁸“Le wan paan milee-n mu dan ki nan len ke, ‘Uninkpel, a salima-n ŋa tinyɔɔr iŋmu ki kpiɛu.’

¹⁹“Le u ninkpelu nmɔn jiin ke, ‘Ŋaam ntim miŋmu a yudaau.’

²⁰“Le utoontunn uba dan ki nan bei u ke, ‘Uninkpel, a salima-n sɔ; N nan ta gbin n nunpirigin le ki ta woon.

²¹N nan saŋ bijawaam le, nan bu-n a ye uja wan a bɔr pɔɔ le. A yuur niwann nan ŋaa ta bil le, ki chiɛ niwann nan wee ŋaa bun ni.’

²²“Le u ninkpelu win jiin ke, ‘N li ta a baantɔɔl a mɔleen ki jiŋ tibɔr, fin utoontunn pootondaan nan! A nyi, bee ŋaa nyii, ke n ye uja wan a bɔr pɔɔ le, ki yuur nan wee maa ta bili, ki chiɛ nan wee maa bun naa?

²³Ba ŋa ŋaa nan ta n ligi nmɔn ki pen bininfob wee bi nan paan tinyɔɔr aa, wee maah jirin nan, maa bi li fir gaa nin tinyɔɔraa?’

²⁴“Le ki bei ban nan si nin yaan ke, ‘Ni gaa u salima nmɔn u nɔɔn na, ki ta kpiɛ wan jɔɔ piigin na.’

²⁵“Le bi ke, ‘Uninkpel u pii jɔɔ piig!’

²⁶“Le u nan jiin ki ke, ‘N bei ni le ke wan biɛn jɔɔ ke, u li gaa takpem, amaa wan kaa jɔɔ niba-n, hali nan wee u jɔɔ wama-n, bi li gaa ni.

²⁷Amaa ndataam ban kaa nan ban ke n ŋaa bi bɔru win, ta bi ki dan n nintogil ki nan ku ba.’ ”

²⁸Yisa kaah nan len mam ni a bɔɔn le u nan jon ki don Jerusalam.

²⁹Waah nan nan mal Befeg nin Betani a tim man be lijɔɔl lan wee bi yi li ke, Olif a Siigi a Jɔɔlin[17] a paab nan, le Yisa tun u bɔɔnɔɔb bilee ki bei bi ke,

³⁰“Ni li chaa kitinbig kan be ni nintogil nan, ni tan kɔɔ kitiŋ nmɔn ke, ni li kan kibonjabig[18] kaah lol, wee uba kaa la nyi jig ki, ni lor ki li jɔɔn n ban do.

³¹Ni ye uba baan ni ke ba ŋa wee ni nan lor kiboŋ nmɔn ke ni bei ke, ‘Uyudaan le ban ki.’ ”

³²Baah nan tun ban ni nan jon ki sin tan kan waah pii bei bi man ni le.

³³Baah nan be lor kiboŋ nmɔn n-yonn man nin, le kiboŋ nmɔn a daau kan ki baan bi ke, “Ba ŋa wee ni nan lor kiboŋ nmɔn naa?”

³⁴Le bi jiin ke, “Uyudaan li ban ki.”

³⁵Le bi taan kiboŋ nmɔn dan Yisa ban, ki nan ta bi wann yeewann ki paan kiboŋin bu le Yisa jig.

³⁶Waah nan jig kiboŋ nmɔn chaa-n le bininfob nan ta bi wann yeewann ki yar nsan bu.

³⁷Waah nan tan mal nan yaan wee nsan jon jir Olif a Siigi a Jɔɔl a paabin, le u bɔɔnɔɔb gbaluŋ nmɔn piin ki donn Uwonbɔr a yinl nin nkukɔpɔɔn nin npopeen baah kan ligaril a toonl lan ni.

³⁸Le ki ke: “Tikaar ye ubɔr yudaan wan dan Uyudaan a yinl bu!” “Nposɔɔn nin kupag be paab le nin ndom!”

³⁹Le Farasii ban nan be kuninfogbaluŋin yaan nin nan bei Yisa ke, “Wan wɔɔn, fuun a bɔɔnɔɔb nmɔn buu!”

⁴⁰Le u jiin ke, “N bei ni le, bininfob nmɔn ŋmin ke, itangbag li kuun paab.”

⁴¹Yisa kaah nan tan mal Jerusalam ki kan kitiŋin, le u nan mɔɔ kitiŋ nmɔn bu

⁴²Le ki ke, “Ni ye ke nim, hali nim, le bi nyi dinan, nan li taan nposɔɔn ki foon ni, amaa daandaan nan ni woo le ke ni numbil laa kan ni.

⁴³N-yonn chaan, le ni dataam na li dan ki nan ma ligonl takpenl ki gɔɔn ni ki loon ni tim ilog nan biɛn.

⁴⁴Bi na li tir nim nin ni buwaab ban be ni niin ki jaa tum. Hali litangbagil liba gbaa kaa na li guri ki paa li tɔ bu. Nan bu-n naa biɛ Uwonbɔr a damin a yonn ni.”

⁴⁵Le U nan tan kɔɔ iwonjiɛn niin, ki piin ki ŋɔɔr ban nan be niin ki kɔɔr tiwann ki nyan,

⁴⁶Le ki bei bi ke, “Ni sɔb Uwonbɔr a gbɔŋin ke, ‘N niin nan yin ye liwonmiɛl a niin le’; amaa ni ta ki ŋa ‘ban feen a kikaabola.’”

⁴⁷Idaa biɛn u nan be iwonjiɛn niin le ki wɔɔn. Amaa le kumanug a ninkpeeb, nin ban wɔɔnn Uwonbɔr a siim, nin kitiŋ nmɔn a ninkpeeb nan lolig le baah li ŋa man ki ku u.

⁴⁸Amaa baa nan kan baah li nɔɔ isan yan ki ŋa man ni, nan bu-n bininfob biɛn a num nan man le bin gbir u bɔr.