Read Konkomba Lug 2 Bible Online

Lug 2 - Konkomba bible

Lug 2

¹Iyaayoo nmɔn le ubɔr yudaan Siiza Agusitu nan siin nsiim u tingbɔŋin ke bininfob biɛn n kun ki tan sɔb bi yin wee un lig bi kanl kaah kpaa man.

²(Ni ma nan ye chinchinn a ninfokanl, n-yonn man wee Kiriniu nan ŋmag Siriya a tiŋ a ninkpelu win.)

³Le bininfobin biɛn nan kun bi tim, bin tan sɔb bi yin.

⁴Josef mu nan ye ubɔr Defid a maalim ni uba le. Ni ma bu, u nan nyan Nazarif, kitiŋ kan be Galilii a tingbɔŋin nan, le ki jon ubɔr Defid a tiŋ, kan wee bi yi ki ke Betiliham, kan be Judiya a tingbɔŋin nin.

⁵Le u kun ke un tan sɔb u ma nin u jakpeŋ Meri a yin; iyaayoo nmɔn ki miin Meri jɔɔ lipool le.

⁶Baah la nan be Betiliham nan, le nmarwiɛn choo Meri,

⁷le u ma usapɔnmal kibijag, le ki ta u pɔbin likinkenlin, ki ta u ŋa kubulunkpoŋ a poolin; npaan kaa ji nan be bicham a diig n-yaan bin kɔɔ.

⁸Bipeekpaab biba nan be kitiŋ nmɔn yaan ki kpaa ipee kunyiɛg kulɔŋ.

⁹Le Uyudaan a malaka nan degir bi bu. Le Uyudaan nmɔn a pag a weem wonn bi bu. Le bijawaam nan choo bi takpem.

¹⁰Le malaka nmɔn bei bi ke, “Ni laa san bijawaami. N dan n nan bei ni tibɔr ŋan le, tan li sei bininfob biɛn nmɔn.

¹¹Dinan nan Defid a tiŋin bi ma ufeerin na, U ma ye Uyudaan Masiya.

¹²Ni li kan kibig nmɔn kaah pɔb likinkenlin, ki dɔ tiwankor kaah ji kubulunkpoŋ kan yaan ni. Ni ma li ye limagil ki sei ni.”

¹³Iyaayoo nmɔn le malakam takpem nan nyan paab ki jiirin ki nan kpiɛ malaka n bu ki pagir Uwonbɔr ke,

¹⁴“Kupag ye Uwonbɔr wan be paab nan a yaan le. Nposɔɔn li be dulinya nan a ninfob ban bu wee U nyɔɔr be-n.”

¹⁵Le malakam nin nan fɔɔr bipeekpaab nan ban, ki jir don papaab. Le bipeekpaab nan bei tab ke, “Ni che ti jo Betiliham ki tan lig niwann nan tun, wee ti Yudaau Uwonbɔr bei ti nan.”

¹⁶Ni ma bu le bi nan fii weem weem ki jon tan foo ki kan Meri nin Josef; le kibiliɛg n mu dɔ kubulunkpoŋ n-yaan poolin.

¹⁷Baah nan tan foo ki kan u nan, le bi bei bininfob Uwonbɔr a malakam kaah bei bi man, ki jiin kibig nmɔn paam,

¹⁸le baah nan gbir bipeekpaab nan kaah len man nin, le ni gar bi biɛn.

¹⁹Amaa Meri ma nan tiɛr nan nan tun nmɔn biɛn, ki ŋmag ni u sufu ni.

²⁰Ni bɔɔn bu le bipeekpaab nan nan jir bi pee ban kulɔŋin. Baah nan chaa jir nmɔn le bi nan pagir ki donn Uwonbɔr a yinl, nin baah kan ki gbir nan biɛn nin bu; le ni sin ye le ke malaka kaah bei bi man nin.

²¹Baah nan ma u a bɔɔn a ween iniin daal le bi nan jii u punl le ki yin u yinl ke Yisa, liyinl lan wee malaka nan pur ke baa la choo u poolin.

²²Ni nan nan foo nin Josef nin Meri n tun ke Moziz a siim kaah nan wɔɔn man nin, bin mann kumanug ki ŋa biba kasi Uwonbɔr ban. Ni ma bu le bi ni nan ta kibigin ki jon Jerusalam, ke bin tan taa u ki sei Uwonbɔr,

²³(ke naah sɔb Uwonbɔr a siimin man nin, ke Kibininkpeeg kan ye kibijag biɛn ye Uyudaan yaau le.)

²⁴Le bi ji nan mann kumanug ke Uyudaan kaah siin man nin, ke Bin ban kulɔŋ a lanjel ilee bee iniin a lanjebum milee ki mann kumanug nmɔn.

²⁵Uja uba le nan be Jerusalam, bi nan yi u ke Simiɛn. U nan ye uninfo buchinn le ki sin ŋmag Uwonbɔr a siimin nbamɔm, le Kasi a Naaŋ nan be u bu, ki lig lidaal man wee Uwonbɔr na li fee Iziral yaab ki jaa.

²⁶Kasi a Naaŋ pii nan chinn ki kar wɔɔn u ke waa li kpo see ke u kan Uyudaan a Masiya.

²⁷Iyaayoo nmɔn le Kinaaŋin nan che Simiɛn kɔɔ iwonjiɛn niin n-yaan, ki kan Yisa a baa nin u na kaah ta u dan ke bin nan ŋa u nsiim kaah wɔɔn man nin,

²⁸le Simiɛn nan gaa kibigin u nɔɔ ki don Uwonbɔr ke,

²⁹“N yudaau, min wan ye a yomu nan, jaam nin nposɔɔn, Ke ŋaah pii nan siin limɔsiinl man nin.

³⁰Min tɔɔl a numbil kan a feegabin na

³¹Wan wee a ŋaau sili ki siin ki sei bininfob biɛn nin.

³²U li ye nwonween ki kpiir a samin ki wɔɔn ban kaa ye Iziral yaab nan, Ki ji ta kupag ki sei a tɔɔl a ninfob Iziral yaab.”

³³Simiɛn kaah pag bi ki jiin kibig nmɔn paamin, le ni gar kibig nmɔn a ba nin ki na takpem.

³⁴Le Simiɛn nan kaab jaa bi bu, le ki sin bei kibigin a na Meri ke, “Uwonbɔr gann kibig nmɔn ke u li che Iziral yaab takpem n lu yɔli u bu; le bininfob takpem mu li kan nŋmarim u bu. Uma nan yin ye limagil lan wee bininfob takpem li pag ki bii u nan;

³⁵ni ma le li kpiir naah tiɛr man ni sufu ni nan n nya npaan ni. (Amaa a sufu li bii ke takoobi kaaŋ kaah li jiiŋ man ni.)

³⁶Le upiininkpel uba nan be niin ki ye Uwonbɔr a linlenu, le bi yi u ke Ana, u nan ye Faniɛl a bisa le, ki ye Aser a bol a ninfou, u nan por takpema, ki be u chal ban ibin ilile a bɔɔn,

³⁷le u chal kpo ki jiɛn u lipukɔɔl le ki nan ye ibin piniin nin ina; amaa waa nan per iwonjiɛn niin n-yaa kɔɔm nween nin kunyiɛgi, ki jiɛn nween ki lolig bimɔb ki miɛ u.

³⁸Waah nan foon n-yonn man nni, le u sei Uwonbɔr kunɔɔpoog, ki nan pag kibigin a bɔr ki tenn bininfob ban biɛn nan guu n-yonn man wee Jerusalam yaab li kan nkpenim a manugin.

³⁹Josef nin Meri kaah nan tun Uwonbɔr a kaal kaah wɔɔn bi man ki diɛ nan, le bi nan jir kun bitɔɔl a tiŋ Nazarif kitiŋ kan be Galilii a tingbɔŋin nin.

⁴⁰Le kibigin nan yabig nin npɔɔn nin nbiɛm takpem, le Uwonbɔr a nyunyunbasanl li be u bu.

⁴¹Tɔ, ibin biɛn Yisa a baa nin u na ti chaa Jerusalam le ki tan jin yuglagir a chiig.

⁴²N-yonn man wee Yisa nan nan foo ibin piig nin ilee-n, le bi nan jon ke bin tan ji kuchiig ke bi kaal kaah wɔɔn man nin.

⁴³Kuchiig nmɔn a daai kaah nan nan diɛ n-yonn man ni, le bi nan piin n kum, le Yisa paar be Jerusalam, amaa u yaab kaa nan nyi ke u paari.

⁴⁴Bi nan tiɛr ke u be kuninfobabug n-yaan le, ki nan choon lidamunl nmɔn biɛn. Ni bɔɔn bu le bi nan ban u bi niin yaab ban nin bijɔtiib ban,

⁴⁵amaa le kaa kan wi. Le bi nan jir Jerusalam ki tan ban niin.

⁴⁶Ni ween itaa daal le bi tan kan u iwonjiɛn niin a poolin, ki miin u lagin ki ka nin ban wɔɔnn a ninkpeeb ki pelig bi bɔr le ki sin baan bi ibinbaan.

⁴⁷Le ni nan gar ban biɛn nan pelig u binbaan yin, nin waah ŋa man ki jɔɔ nbiɛm ki pag jiin bi.

⁴⁸U baa nin u na kaah nan kan u niin nin, ni nan gar bi pam, le u na baan u ke, “N big, ba ŋa a ŋa man naa? Ŋaa nyi ke min nin a baa kan npoobiin hali ki choon baŋ ŋaa?”

⁴⁹Le u jiin ki baan bi ke, “Ba ŋa wee ni bam maa? Naa nyi ke ni ye n li be n Baa a niin lee?”

⁵⁰Amaa baa nan biɛ u bɔr nmɔn a taai.

⁵¹Le u nan nɔɔ bi ki jir Nazarif a tiŋin, ki chee bimɔb. Le u na ta nan biɛn ŋa nmɔn ki ŋa u sufu ni.

⁵²Le Yisa nan yabirig ki kpiɛg nin nlam, le Uwonbɔr nin bininfob a pool nan sɔɔn u bu.