Read Konkomba Lug 20 Bible Online

Lug 20 - Konkomba bible

Lug 20

¹Weemba daal waah nan be iwonjiɛn niin a loob ki wɔɔn bininfob ki mɔɔn Uwonbɔr a bɔr ŋann ni, le kumanug a ninkpeeb nin ban wɔɔnn Uwonbɔr a siim nin kitiŋ nmɔn a ninkpeeb donn u ban.

²Ki nan bei u ke, “Bei ti nan a ninkper a pɔɔm wee a jɔɔ tun ŋaah tun man nan, Ŋma seiŋ man a ninkper a pɔɔm maa?”

³Le u jiin ke, “N mu jɔɔ nbinbaan le ki yin baan ni, ni beim ni,

⁴Jɔnn a nyunfulin, ni nan nyan paab le bee uninfosaal ban naa?”

⁵Le bi nan nyan ngbaan ki tan gbeer tab ke, “Ni ye ti ke, ‘Ni nyan paab’ ke, u li baan ti ke, ‘Ba ŋa wee naa ŋa u yadaa?’

⁶Amaa ti ke, ‘Uninfosaal ban ke,’ bininfob ban biɛn be do nan li gabir ti itangbag, nan bu-n bi ŋa yada ke Jɔnn nan ye Uwonbɔr a linlenu le.”

⁷Mambu le bi nan jiin bei Yisa ke, “Taa nyi naa nan nyan nan yaan ni.”

⁸Le Yisa ke, “Tɔ, n mu kaa yin bei ni nan a ninkper a pɔɔm wee n tun maah tun man nan ni.”

⁹Le Yisa nan gaa bininfob nmɔn libɔŋal nan, “Uja le nan kon bukpaab, le ki ta bi ŋa bikpaakob biba a nɔɔn, le ki yaar jon niba paam ni yuur waah foon weemi.

¹⁰Le lidichiɛl a yonn nan foo le u tun utoontunn uba ke un jo ki tan bei bikpaabin ke bin sei u bukpaabin a kpajiir ni. Amaa le bikpaabin tan choo u ki boo ki jaa u kun linɔɔpiɛŋmiɛl.

¹¹Le u ji tun utoontunn uba, le bikpaabin ji tan boo u mu ki jin u ifa le u mu kun linɔɔpiɛŋmiɛl.

¹²Le ukpadaan nin ji tun uyom wan kpiɛ bita, le bi boo u ki nan sei u kidaŋ ki ta u gab.

¹³“Le ukpadaan nin ni bei ke, ‘N ni yin ŋa nii? N yin tun n bija le, wan wee n jiɛ; ni ba ke bi li sei u jilima.’

¹⁴“Amaa bikpaabin kaah nan nan kan win, le bi gbeer tab ke, ‘Ufaajirin nsɔ, ni che ti ku u, wee lifaalin ŋa ti yaal.’

¹⁵Le bi nan choo u, ki ta u nyan nkpagbaan ki tan ku u. “Tɔ, ukpadaan nan ni yin ŋa bikpaab nmɔn nii.?

¹⁶U le dan ki nan ku bikpaab nmɔn ki ta bukpaabin sei bikpaab biba.” Bininfobin kaah nan gbir man nin, le bi ke, “Uwonbɔr laa che man nŋa!”

¹⁷Le Yisa lig bi num paam chob le ki ke, “Tɔ ke nan sɔb Uwonbɔr a gbɔŋin ni a taai aa? ‘Kudaag[19] kan wee bitanmaab yii ki n ni, ki ma nan ye kijaantelig ŋaŋ’?

¹⁸Uninfo wan biɛn lu litangbagil nan bu ke u li genn genn, amaa litangbagil nan mu lu wan bu ke, see li mar u.”

¹⁹Ban wɔɔn Uwonbɔr a siim, nin kumanug a yudam nan biɛ ke Yisa gaa libɔŋal nan ŋa bi ma le, mambu le bi nan ban bin choo u libol nmɔn yaan. Amaa le ki sin san kuninfogbaluŋin bijawaam.

²⁰Baah ni nan guu win, le bi nan tun bininfob penkaab, ban nan ta biba ŋa ke bipopendamin. Bi nan jɔɔ tama ke bin choo Yisa u mɔboi bu, wee ki ta u ki sei tininkper a pɔɔm nin npɔɔn man biɛn be ban ŋma kitiŋin a nɔɔn.

²¹Le bininfob penkaab nmɔn baan u ke, “Wan wɔɔn, ti nyi ke a pag ki wɔɔn nan ye ibamɔn, le a mu kaa gann ni, amaa ki wɔɔn Uwonbɔr a bɔr tan ye ibamɔn.

²²Ni ŋan nin ti li yɔ lampo ki tenn Siiza bee ti laa yɔɔ?”

²³Le Yisa mu nan biɛ ke bi pen u lam le, le ki bei bi ke,

²⁴“Ni wɔɔm nligibim nmɔn ni. Ŋma a nunaŋ nin u yinl be nligibim nmɔn buu?”

²⁵Le bi jiin ke, “Siiza.” Le u bei bi ke “Man ke, ni li tenn Siiza nan ye Siiza yaan na wee ki mu li tenn Uwonbɔr nan ye Uwonbɔr yaan na.

²⁶Baa nan fir choo u waah nan len man kuninfogbaluŋin yaan ni, le u jiinim nan gar bi, le bi jir ŋmin.

²⁷Le Sadusi yaab, ban len ke uninfo kaa li fir fii nkumin nin, nan ta nbinbaan ki dan Yisa ban.

²⁸Bi nan baan ke, “Wan wɔɔn, Moziz nan sɔb nsiim sei ti ke, ni ye uja a kpel kpo ki jiɛn u poo wan kaa la jɔɔ kibig ke, ni kpa le nin uja nmɔn taa lipukɔɔlin ki maa nbum ki sei u kpel nmɔn.

²⁹Tɔ, bijab bilile le nan be, ki ye tinabir, le uninkpelin nan kɔɔn upii ki kpo kaa ma bigi.

³⁰Le wan paa nan taa upii-n, ki mu kaa ma le ki kpo

³¹le wan kpiɛ bita-n nan taah u, man le wan nan nan kpiɛ bilile-n nan kpo kaa ma kibigi.

³²Ni bɔɔn bu le upii nmɔn mu nan kpo.

³³Ke nkum a fii daal ke, ŋma nin na yin ye upii nmɔn naa, bilile nan biɛn kaah nan kɔɔn u nan?”

³⁴Le Yisa jiin ke, “Dulinya nan yaan bijab kɔɔn bipiib le bipiib mu kun bijab.

³⁵Amaa ban kpaan nin dulinya pɔŋin nin nkum a fiimin, bijab kaa na li kɔɔn bipiib le bipiib mu kaa li kun bijabi,

³⁶le baa ji na li kpo; nan bu-n bi na yin nann malakam le. Bi ye Uwonbɔr a buwaab le, baah ye nkum a fiim a buwaabin bu.

³⁷Amaa kimɔchiɛgin bu ke, hali Moziz nan wɔɔn ke bitakpiib li fii nkumin, nan bu-n u nan yin Uyudaan ke ‘Abiraham a Weem, nin Azig a Weem, nin Jekɔb a Weem.’

³⁸Waa ye ban kpo a Weemi, amaa ban fo a Weem, nan bu-n uma bu le bininfob biɛn be nin limiɛfol.”

³⁹Le ban wɔɔnn Uwonbɔr a siimin a ni biba jiin ke, “Wan wɔɔn, a len nan ŋan na!”

⁴⁰Le uba kaa ji fir baan ibinbaan ni.

⁴¹Le Yisa baan bi ke, “Nii wee bi len ke Masiya ye Defid a yaabil aa?

⁴²Defid baan tɔɔl nyan pag Ilan a gbɔŋin ke, ‘Uyudaan nan bei n yudaau ke: “Kalim n nɔɔjiim paam

⁴³hali nin maah na li che a dataam nkpann a taai a tɔɔnbol.” ’

⁴⁴Defid yin u ke ‘Uyudaan.’ Ke niin wee u ji ye u yaabil aa?”

⁴⁵Bininfobin biɛn kaah nan peligin, le Yisa nan bei u bɔɔnɔɔb ke,

⁴⁶“Ni li nyi ban wɔɔnn nsiimin bu. Bi ban bi li chonn yee daala fufɔgir le, ki jiɛ bi li poor bi nnyam ni, ki jiɛ bininkpeeb a kikaabol tiwonjiɛndirin nin jilima kuchiigin.

⁴⁷Bi feen ipukɔɔ a niin le paab, ki sin ji miɛ Uwonbɔr ki yuur ki wɔɔn biba. Man a ninfobol li kan litudaril lan yab.”