Read Konkomba Lug 23 Bible Online

Lug 23 - Konkomba bible

Lug 23

¹Le kulaguŋin biɛn nan fii ki ta Yisa jon Palati ban.

²Le bi nan piin ki galin u ke, “Ti kan uja nan le u be bei ti ninfob ke bi laa yɔ lampo ki tenn Siiza, ki ke u ma ye Masiya, ki ye ubɔr.”

³Le Palati baan Yisa ke, “Fin le ye Juu yaab a bɔru win naa?” Le Yisa jiin ke, “Nn, ni ye ŋaah len man nan le.”

⁴Le Palati mɔɔn ki bei kumanug a yudamin nin kuninfogbaluŋin yaan ke, “Maa kan nan wee n li ta galin uja nan ni.”

⁵Amaa le bi le yii ke, “U wɔɔnim nmɔn che Judiya yaab a sufu fii le. U nan piin Galilii le ki nan kpa do.”

⁶Palati kaah nan gbir man nin, le u baan ke u ye Galilii a ninfo lee?

⁷Waah nan nan biɛ ke Yisa nyan Herɔd a tinpaamin nin, le u nan che bi ta u jon Herɔd ban, wan mu nan be Jerusalam iyaayoo nmɔn ni.

⁸Herɔd kaah nan kan Yisa iyoo man, le u pool nan penn takpem, nan bu-n ni nan yuura le u ban un kan u. Waah nan gbir Yisa bu man nin, le u nan jɔɔ tama ke un kan waah yin tun ligaril a toon man.

⁹U nan baan Yisa ibinbaan pam; amaa le waa nan jiin u tiba.

¹⁰Kumanug a ninkpeeb nin ban wɔɔnn Uwonbɔr a siimin nan si niin, ki galin u nin inunman.

¹¹Le Herɔd nin u tɔtogib nan daar u nyɔɔrug. Le ki nan ta daala ŋaŋ kan peen ki nyagin ki yeen u ki ta u jiin Palati ban.

¹²Lidaal nmɔn le Palati nin Herɔd choo tab kujɔtiig, amaa bi la nan ye ndataam le nin tab.

¹³Le Palati nan yin biminmanib a yudam nin Juu yaab a yudam nin bininfobin,

¹⁴le ki bei bi ke, “Ni ta uninfo nan dan ki ke u lar bininfob le bi kɔnn bininkpeeb a bɔr. N baan u tibɔr ni numin na le kaa kan igalin yan wee ni ke u tun nmɔn ni.

¹⁵Herɔd mu kaa kan u galin yi. Ni ma bu le u jiin u ki tenn ti; ni kan ke waa ŋa niba, wee ni foo nin un kpo.

¹⁶Mambu n li dar u tul wee ki jaau.”

¹⁷[21] Yuglagir a chiig libinl biɛn nin ke, Palati ti nyann baah loon ban nin a ni uba le ki jaa.

¹⁸Le kuninfogbaluŋin tiɛn nmɔpɔɔn ke “Kum uja nmɔn na! Wee ki nyan Barabasi ki sei ti!”

¹⁹(Bi nan ta Barabasi ki jaa kuloondiigin u mɔyiil nin u ninfo kul kitiŋ nmɔn yaan bu le.)

²⁰Palati kaah nan ban un nyan Yisa jaa-n le u ji nan balin bininfobin.

²¹Amaa le bi le nan gbaa tann ke, “Kpaamu lidapunpunl bu! Kpaamu lidapunpunl bu.”

²²Le u ji nan pag kpiɛ nfim mitaa ke: “Ba ŋaa? Uja nan le tun igalin ila baa? Maa kan nan wee u tun wee ni foo nkum a tudaril li. Mambu n li che bin dar u tul wee ki jaau.”

²³Amaa le bi nan ta titintann ki yii ke bi le ban bin kpaa u lidapunpunl bu le, le bi tintann nmɔn nan nyaŋ Palati.

²⁴Le u nan chee ki ŋa baah ban man nin.

²⁵Le ki nan nyan uja wan bininfob nan ban nin, wan bi nan ta jaa kuloondiigin u limɔyiil nin uninfo kul nbu-n, ki sin nan jaa Yisa ki sei bi ke bin ŋa u baah ban man.

²⁶Baah nan jɔɔ u ki chaa-n, le bi nan choo Simɔnn wan nan nyan Sarene a tiŋin ki chaa Jerusalam nan, le ki ta Yisa a dapunpunl ki bugin u, le ki che u nɔɔ Yisa a bɔɔn.

²⁷Kuninfogbaluŋ mu nan nɔɔ Yisa a bɔɔn le, bipiib nan nɔɔ u ki mɔr tikpemɔr ki fabin u bu.

²⁸Le Yisa nan tan gbiɛ lig bi ki bei ke, “Jerusalam a bisiɛm, ni laa mɔr n bu, ni li mɔr ni tɔɔl nin ni buwaab buu.

²⁹Nan bu-n iyoo chaan le ni na li ke, ‘tikaar be bipiib ŋɔɔb, nin lipool lan kaa nyi ma kibig, nin ibii yan kaa la mɔɔn kibig bu!’

³⁰Le ‘bi ni na li bei ijɔɔ ke, “Ber ki lu ti bu ni!” ki bei igungon ke, “Piin ti bu ni!” ’

³¹Nan bu-n ni ye bininfob ŋaan nan busub nan kaah la sɔɔn nan ke, bi ni nan koor ke ba ni yin ŋaa?”

³²Bi nan ta bininfob bilee, ban nan ye bi naayigib, mu kpiɛ u bu ke bin tan ku bi.

³³Baah nan tan foo nan yaan wee bi yi ke, kuyukpabug nan, nin yaan le bi nan kpaa u ma nin binaayigibin lidapunpunl bu, uba be u nɔɔjiim paam le uba mu be u nɔɔgam paam.

³⁴Le Yisa ke, “N Baa, jiɛn bi bir ki per ba, nan bu-n baa nyi baah tun nan ni.” Le bi nan tɔn inaa ki por u wan yɔɔr.

³⁵Le bininfob nan si ki lig, hali ke biyudam daar u nyɔɔrug. Bi nan ke, “U nan fee biba jaau; ni sin ye ke u ye Uwonbɔr a Masiya, Uninfo gannkaa-n, ke un fee u bau.”

³⁶Le bitɔtogib mu nan donn ki nan daar u nyɔɔrug. Le ki sei u lidamunmɔŋil,

³⁷le ki ke, “Ni ye a ye Juu yaab a bɔru ke, a fee a ba ki jaau.”

³⁸Bi nan sɔb nsɔbim ki paan u yul bu, le ni karim ye: JUU YAAB A BƆR WIN SƆ.

³⁹Le binaayigib ban nan jɔn niin nin a ni uba sugir Yisa ki ke, “Ŋaa ye Masiya lee? Fee a baa jaau ki fee ti mu.”

⁴⁰Amaa le u kpiɛgin tiɛn ubu ki ke, “Ŋaa san Uwonbɔr aa? Nin taah be litudaril liba ni nan naa?

⁴¹Tim kan litudaril nin ibamɔn le, nan bu-n bi jiin ti toon kaah kpaan ti gaa man le. Amaa uja nan ma kaa tun tibir ti ba.”

⁴²Le ki ke, “Yisa, “Iyoo man a nan kɔɔ a naam ni ke a tiɛr n bu.”

⁴³Le Yisa jiin u ke, “N beiŋ ibamɔn le, dinan a li be n ban Uwonbɔr a niin.”

⁴⁴Ni nan ye nween a kurug piig nin tilee le, le libunbɔnl nan lu kitiŋ nmɔn biɛn bu ki tan kpaa kujɔɔg a kur titaa,

⁴⁵nan bu-n nween kaa ji nan jɔɔ nwonween ni. Le likinkenl lan nan jɔn iwonjiɛn niin nin, nan choo bɔgir nfim milee.

⁴⁶Le Yisa nan tiɛn nmɔpɔɔn ki ke, “N Baa, n ta n naaŋ ki ŋubin a nɔɔn na.” Waah nan len man ki diɛ-n le u foor u diɛm a foorug.

⁴⁷Bitɔb a sanliiru kaah nan kan ni wan nan tun nin, le u nan don Uwonbɔr a yinl ki ke, “Ibamɔn uja nan ye ubuchin le.”

⁴⁸Bininfob ban nan lagin bi nan ji siɛra-n biɛn kaah nan kan niwann nan sin tun nin, le bi jir chonn sulim sulim ki kun.

⁴⁹Amaa ban nan nyi win, nin bipiib ban nan nɔɔ u ki nyan Galilii, nan si nan fɔg le, ki lig ni niɛ nan biɛn.

⁵⁰Uja uba nan be le u yinl ye Josef, u nan ye Juu yaab a laguŋ a ninfo wan ye ubamɔndaan le,

⁵¹waa nan chee bi lol nin bi ŋaari. U nan nyan Juu yaab a tiŋ kan bi nan yi ki ke Arimatiya le, ki nan guu Uwonbɔr a naamin a foom le.

⁵²U nan jon Palati ban le ki tan gaa Yisa a gbanann.

⁵³Le ki ta ti jiirin ki pɔbin ti kikinkenpeŋin, ki ta piin kikaapɔŋ kan wee bi nan chib ki kutangbapiigin wee baa la nyi ta uba pii niin nin.

⁵⁴Ni nan ye sili daal le, le likpakɔɔl nan be piin.

⁵⁵Bipiib ban nan nyan Galilii ki nɔɔ Yisa dan nin nan nɔɔ Josef ki tan kan kukaagin nin baah pii u man.

⁵⁶Le bi nan jir kun ki tan ŋa sili ki ban tifar tan jɔɔ nbaam nin tulaali. Amaa le ki nan foor likpakɔɔl daal nmɔn, ke Uwonbɔr a siim kaah wɔɔn man nin.