Read Konkomba Lug 3 Bible Online

Lug 3 - Konkomba bible

Lug 3

¹Ubɔr yudaan Tiberiya Siiza kaah nan jin u naam ibin piig nin iŋmu-n wee Pontiɛ Palati mu ye Judiya a bɔru win, le Herɔd mu ye Galilii a bɔru, le u naal Filib mu ye Ituriya nin Tirakoniti a bɔru, Lisaniɛ mu ye Abilene a bɔru,

²n-yonn man wee Anasi nin Kayafasi nan ye Uwonbɔr a minmanib a ninkpeebin, le Uwonbɔr a mɔleen foo Jɔnn wan ye Zakariya a bija-n kukunkɔɔg bu.

³Le u nan jin ntim man nan be Jɔdann ni biɛn ki mɔɔn ke bin jiɛn bi toonbira wee un fu bi Uwonbɔr a nyunful, wee bin kan tibir a jiɛn per.

⁴A li ke naah sɔb ulinlenn Azaya a gbɔŋin ke: “Uba a kukɔl le be kukunkɔɔg bu ki yi, ‘Mann Uyudaan a sama, mann u sam wee mi li tel ki sei u.

⁵Nfatam biɛn na li gbeen, ijɔɔ nin igungon biɛn na li ber ki naa tum, tisangɔnn biɛn na li naar, tisanbogir biɛn piin.

⁶Uninfosaal biɛn na li kan Uwonbɔr a feeja.’ ”

⁷Le Jɔnn bei kuninfogbaluŋ ban nan dan u ban ke un fu bi Uwonbɔr a nyunfulin ke, “Nim iwaalab a bum, ŋma kpaan ni ke ni nya kiŋuufiiŋ kan chaan nan naa?

⁸Ni li lo iloon yan wɔɔn ke ni sin kpenn ni binbema. Wee ki laa piin ki bei ni ba ke, ‘Ti jɔɔ Abiraham wan ye ti yaaja.’ N bei ni le, Uwonbɔr li fir che itangbag yan be nan n kpann Abiraham a yaabili.

⁹Lilajal pii be isiig a nyagin, ki li gaa busub ban biɛn kaa lo iloon ŋan ki jaa tum ki ta bi gab nŋmi ni.”

¹⁰Le kuninfogbaluŋ nmɔn nan baan, “Ke ti ni li ŋa nii?”

¹¹Le u bei bi ke, “Uninfo wan jɔɔ daala bilee ke, un nyan kiba ki sei wan kaa jɔɔu, le wan mu jɔɔ tijiir ke, un ŋa sei wan kaa jɔɔu.”

¹²Bilanpogaab[5] mu nan dan bi nan gaa Uwonbɔr nyunful u ban. Le ki baan ke, “Wan wɔɔn, ti mu yin ŋa nii?”

¹³Le u bei bi ke, “Ni laa gaan ki lagir naah ye ni gaa man ni.”

¹⁴Le bitɔtob mu baan u, “Ti mu yin ŋa nii?” Le u jiin ke, “Ni laa feen iligi, ki laa por tibɔkar ki paag bininfob bu; che ni num n gbee ni yɔr tan wee ni gaan nin.”

¹⁵Bininfobin kaah pii nan guu nin tama-n le bi tiɛr bi sufu ni ke Jɔnn le par ye Masiya nna.

¹⁶Le Jɔnn jiin bei bi biɛn ke, “Min fun ni nnyum le, amaa wan jom chaan, wan a naatagil ŋmim wee maa kpaan n gbinn ni. U na li fu ni Kasi a naaŋ nin nŋmi ki ŋunn ni jaginn.

¹⁷U ŋmag u dilenn yikpeŋin le u nɔɔn ke un lenn nbamɔm, ki nyan ndibimin ki ŋuun u binbolin, amaa le ki sin ta kufoŋin ki jaa nŋmi man gaan kaa jɔɔ njunimin yaan.”

¹⁸Jɔnn nan ta imɔbon le takpem ki mɔɔn tibɔŋann nin ki kpaan bininfob.

¹⁹Amaa jɔnn kaah nan fuun ubɔr Herɔd, u waal a poo Herɔdiya bu-n, nin titoonbir tan wee u nan tun nin,

²⁰Herɔd nan ta ni niɛ nan biɛn le ki kpiɛ: U nan loon Jɔnn le kuloondiigin.

²¹N-yonn man wee bininfob biɛn nan gaa Uwonbɔr a nyunfulin, le Yisa mu nan gaa Uwonbɔr a nyunful. Le waah nan be miɛ Uwonbɔrin le paab loor,

²²le Kasi a Naaŋ jiirin u bu nin tigbanann ki nann ulanjel. Le likukɔl nyan paab ki len ke, “Fin le ye n bija, wan wee n jiɛ; fin le n num gbee.”

²³N-yonn man wee Yisa nan piin Uwonbɔr a toon yin, u nan jɔɔ ibin pita le. U baa nan ye, ke baah nan tiɛr man nin, Josef le, le Josef mu nan ye Heli a big,

²⁴le Heli mu ye Matat a big, le Matat mu ye Liifai a big, le Liifai mu ye Meliki a big, le Meliki mu ye Janai a big, le Janai mu ye Josef a big,

²⁵le Josef mu ye Matatiya a big, le Matatiya mu ye Emosi a big, le Emosi mu ye Nahum a big, le Nahum mu ye Esili a big, Le Esili mu ye Nagai a big,

²⁶le Nagai mu ye Maaf a big, le Maaf mu ye Matatiya a big, le Matatiya mu ye Semiɛn a big, le Semiɛn mu ye Joseg a big, le Joseg mu ye Joda a big,

²⁷le Joda mu ye Joanann a big, le Joanann mu ye Resa a big, le Resa mu ye Zerubabel a big, le Zerubabel mu ye Sealitel a big, le Sealitel mu ye Neri a big,

²⁸le Neri mu ye Meliki a big, le Meliki mu ye Adi a big, le Adi mu ye Kosam a big, le Kosam mu ye Elimadam a big, le Elimadam mu ye Er a big,

²⁹le Er mu ye Josuwa a big, le Josuwa mu ye Eliɛzer a big, le Eliɛzer mu ye Jorim a big, le Jorim mu ye Matat a big,

³⁰le Matat mu ye Liifai a big, le Liifai mu ye Simiɛn a big, le Simiɛn mu ye Juda a big, le Juda mu ye Josef a big, le Josef mu ye Jonam a big, le Jonam mu ye Elayakim a big,

³¹le Elayakim mu ye Meliya a big, le Meliya mu ye Mena a big, le Mena mu ye Matata a big, le Matata mu ye Netann a big, le Netann mu ye Defid a big,

³²le Defid mu ye Jesi a big, le Jesi mu ye Obed a big, le Obed mu ye Bɔɔzi a big, le Bɔɔzi mu ye Salimonn a big, le Salimonn mu ye Nasonn a big,

³³le Nasonn mu ye Aminadab a big, le Aminadab mu ye Ram a big[6], le Ram mu ye Hezironn a big, le Hezironn mu ye Perisi a big, le Perisi mu ye Juda a big,

³⁴le Juda mu ye Jekɔb a big, le Jekɔb mu ye Azig a big, le Azig mu ye Abiraham a big, le Abiraham mu ye Tera a big, le Tera mu ye Naho a big,

³⁵le Naho mu ye Serug a big, le Serug mu ye Reu a big, le Reu mu ye Peleg a big, le Peleg mu ye Iber a big, le Iber mu ye Sela a big,

³⁶le Sela mu ye Kanann a big, le Kanann mu ye Afagzad a big, le Afagzad mu ye Sem a big, le Sem mu ye Nowa a big, le Nowa mu ye Lameg a big,

³⁷le Lameg mu ye Metusela a big, le Metusela mu ye Enog a big, le Enog mu ye Jarid a big, le Jarid mu ye Mahalalel a big, le Mahalalel mu ye Kanann a big,

³⁸le Kanann mu ye Adam a big, le Adam mu ye Uwonbɔr a big.