Read Konkomba Lug 4 Bible Online

Lug 4 - Konkomba bible

Lug 4

¹Le Yisa nan nyan Jɔdann a mɔgil paam, ki gbee nin Kasi a Naaŋ le Kinaaŋ nmɔn nan ta u don kukunkɔɔg bu

²ki be niin iweehn pina, le ulinlaril nan bigin u. Waa nan jin niba iweehn nmɔn biɛn ni; le nkom nan nan choo u,

³Le ulinlaril nmɔn bei u ke, “Ni ye ke a sin ye Uwonbɔr a Bija ke, a bei litangbagil nan wee lin kpann tijiir.”

⁴Le Yisa bei u ke, “Ni sɔb Uwonbɔr a gbɔŋin ke: ‘Uninfosaal kaa be tijiir a binba bu le.’”

⁵Ni bɔɔn bu le ulinlarilin ji yuur u ki ta u don lijɔɔl lan kper a paab, ki tan wɔɔn u kutingbɔŋ nan a wan yɔɔr biɛn,

⁶ki bei u ke, “N li seiŋ tininkper a pɔɔm nin njɔɔm biɛn. Bi nan ta ni biɛn seima le n mu li fir ta sei wan wee n ban.

⁷Mambu a bi jiɛnim ke, ni biɛn nan bi yin ye a yaan le.”

⁸Le Yisa jiin ke, “Ni sɔb Uwonbɔr a gbɔŋin ke, ‘Li jiɛn Uyudaan Uwonbɔr a binba, ki sin tun tenn u a binba.’”

⁹Le ulinlaril ji nan yuur u ki jon Jerusalam, ki tan don iwonjiɛn niin a paab[7], le ki bei u ke, “Ni ye a sin ye Uwonbɔr a Bija ke a yug do ki lu tuma.

¹⁰Nan bu-n ni sɔb Uwonbɔr a gbɔŋin ke: ‘U li pag sei u malakam a bu wee bin guuriŋ nbamɔm.

¹¹Le bi li yuuriŋ bi nɔɔn, wee a taal laa gbiɛr litangbagili.’”

¹²Le Yisa jiin ke, “Ni len ke: ‘Uba laa bigin u Wonbɔru wi.’”

¹³Ulinlarilin kaah nan bigin Yisa diɛ n-yonn man nin, le u la fɔɔr ki sin jiɛn u ki guu iyoo yan kpaan.

¹⁴Yisa nan jir Galilii le Kinaaŋ pɔɔmin. Le u bɔr nan mɔɔn itingbaa biɛn.

¹⁵U nan mɔɔn Uwonbɔr a bɔr le bi wonjiɛndirin, le bininfob biɛn pag u.

¹⁶Le Yisa nan jon Nazarif, nan yaan wee bi nan wubiri u, u buwaan nin nan. Le likpakɔɔl daal nan foo, le u kɔɔ kuwonjiɛndiigin, ke waah pii ti kɔɔ man nin, ki nan fii ke un karin Uwonbɔr a gbɔŋ.

¹⁷Le bi ta ulinlenn Azaya a gbɔŋ kpabkaag ki sei u. Waah kpar ki-n, le u kan nan yaan wee ni sɔb ke:

¹⁸“Uyudaan a Naaŋ be nim, nan bu-n U ma kpaar nkpam jaa n bu, ke n mɔɔn u bɔr ŋan nmɔn ki sei bilanjiim. U tunim ke n pag feeja a bɔr ki sei biloondiikɔɔb, wee ki ligir bijɔɔm a num, ki nyan limugildam bi mugilin,

¹⁹ki sin mɔɔn libinl lan wee Uyudaan jiɛn.”

²⁰Le u kpab kugbɔŋin ki jiin sei kuwonjiɛndiig n-yaa toontunn uba, le ki sin kal. Le bininfob ban biɛn be kudiig nmɔn yaan nin lig u.

²¹Le u piin ki pag tenn bi ke, “Tibɔr tan wee n karin Uwonbɔr a gbɔŋin nan, dinan Uwonbɔr a mɔleen gbeen nin naah gbir yin na.”

²²Le bi biɛn pag u nin ligaril u nyunyunbasanl lan nyan u mɔnn ni. Le bi baan tab, “Waa ye Josef a bija nnaa?”

²³Le Yisa bei bi ke, “N pii nyi ke ni li gaam libɔŋal ke, ‘Utebir, tebim a ba! Ŋa a tiŋ nan yaan ke taah gbir ke a ŋa Kapeniɛm man nin.’ ”

²⁴Le u ji ke, “N bei ni ibamɔn le, baa cheel ulinlenn a mɔb u tɔɔl a tiŋin ni.

²⁵Ibamɔn le n wɔɔn ni, ipukɔɔ takpem le nan be Iziral n-yonn man wee Elaja la nan be-n. N-yonn nmɔn wee utaal kaa nan nun ibin itaa nin iŋmal iloob, le nkom nan lu kitiŋ nmɔn yaab biɛn bu,

²⁶Amaa Uwonbɔr kaa nan tun Elaja bi ni uba ban ni see lipukɔɔl lan nan be Zarifa n-yaa binba ban. Zarifa be Sidonn a tiŋin le.

²⁷Nkɔm takpem nan be Iziral a tiŋin ulinlenn Elasiya a yonn, amaa bi ni uba kaa nan kan kutebugi see Nemann a binba wan nan ye Siriya a ninfou nan.”

²⁸Le bininfob ban nan be kuwonjiɛndiigin a poolin kaah nan gbir Yisa a bɔr nmɔn nin, bi nan fiin bi ŋuui le u bu,

²⁹le bi fii ki ŋɔɔr u nyan kitiŋ nmɔn yaan, ki ta u jon ligungonl lan bu wee bi nan maa bi tiŋ nmɔn a gbaam, ke bin ta u ki jaa ligungonl nmɔn a tum.

³⁰Amaa le u bɔgir bi siigin ki choon jon.

³¹Le Yisa nan jir Kapeniɛm kan be Galilii a tiŋin nan. Le likpakɔɔl daal ke u wɔɔn bininfob Uwonbɔr a mɔleen;

³²le u wɔɔnim nmɔn nan gar bi, nan bu-n u wɔɔnim nmɔn kaah nan jɔɔ tininkper a pɔɔmin bu.

³³Le uja wan wee kinaanbiig nan be u ban nan, nan be kuwonjiɛndiigin yaan ki tann nmɔpɔɔn ke,

³⁴“Fin Yisa wan ye Nazarif a ninfo nan, a ban baa ti ban naa? Aah! A dan ke a nan bii tim lee? N nyi ŋa ye wan, a ye Uwonbɔr a kasi a toom le.

³⁵Le Yisa tiɛn kinaanbiig n bu ke, “Ŋmim tifur, ki sin nya uja nmɔn yaan na.” Le kinaanbiigin nyiɛ uja-n tum, bi sisiigin, le ki sin nyan u ni; waah nan nyiɛ u tumin, waa nan sei u kidaŋi.

³⁶Le ni nan ŋa bi biɛn ligaril, le bi baan tab ke, “Ba a wɔɔm ye naa? U jɔɔ tininkper a pɔɔn le nin npɔɔn ki bei nnaanbiim bimɔb le bi nyan bininfobin.”

³⁷Le bi nan mɔɔn Yisa a yinl kitiŋ nmɔn nin itingbaa biɛn.

³⁸Le Yisa nan nyan kuwonjiɛndiig nmɔn yaan ki jon Simɔnn a niin, ki miin kugbanantoŋ le jɔɔ Simɔnn a chɔɔpii, le bi nan bei Yisa upii nmɔn a wiɛn bu.

³⁹Le Yisa nan bɔɔn upii-n bu ki fuun kugbanantoŋin bu, le ku jaau; le upii-n paa nan fii ki ŋa bi kuchɔŋ.

⁴⁰Nween kaah nan nan yin lu n-yonn man ni, le ban biɛn nan jɔɔ bibaarib bi niin yin ni nan ta bi ki dan Yisa ban; bi nan bu iwiɛn a booli a booli le u ta u nɔɔ ki ma ma bi, le bi kan kutebug.

⁴¹U ji nan che nnaanbiim nyan bininfobin takpem. Baah nan nyan diɛ nan le bi tiɛn nmɔpɔɔn ke, “A ye Uwonbɔr a Bija le.” Amaa le u nan fuun bi bu kaa ji nan che bi pag jigin ni, nan bu-n bi nan nyi waah ye Masiya.

⁴²Naah nan won kutaagin le Yisa nan nyan kitiŋ nmɔn yaan ki kɔɔ kulɔŋin; le bininfobin nan choon ki ban ki tan kan u. Baah nan kan u nan, le bi nan gɔɔ u ki ke un laa yaar ki sin jiɛn bi.

⁴³Amaa le u ke, “See ke n jon ntim man gurin yaan ki tan mɔɔn tibɔŋann ki jiin Uwonbɔr a naam paam nan, ni ma bu le Uwonbɔr tunim.”

⁴⁴Ni ma bu le u nan jin Judiya a timin ki kɔɔ tiwonjiɛndirin ki wɔɔn bininfob tibɔr nmɔn.