Read Konkomba Lug 6 Bible Online

Lug 6 - Konkomba bible

Lug 6

¹Juu yaab a kpakɔɔl liba daal, le Yisa nin u bɔɔnɔɔb nan nɔɔ kɔɔ bukpaab biba a poolin. Le u bɔɔnɔɔbin choon ki gen iyoo ki nug bi nɔɔn ŋma.

²Le Farasii yaab biba nan baan bi ke, “Ba ŋa ni tun nan wee ti siim kaa che ti tun likpakɔɔl daalaa?”

³Le Yisa nan jiin ki baan bi ke, “Naa nyi ki karin Uwonbɔr a gbɔŋin, nkom kaah nan choo Defid nin u tab wee u ŋa man nin naa?

⁴U nan kɔɔ iwonjiɛn niin ki yuur kasi a boroboro[8] ki ŋman, ki ŋa sei u tab, amaa nsiim kaa nan wɔɔn nin uba nŋman boroboro nmɔn ni see biminmanib a binba.”

⁵Le Yisa bei bi ke, “Uninfosaal a Bija-n le ye likpakɔɔl daal nmɔn a yudaau.”

⁶Juu yaab a kpakɔɔl liba daal jigin, le Yisa kɔɔ kuwonjiɛndiigin ki wɔɔn bininfob Uwonbɔr a bɔr. Le uja uba nan be niin le u nɔɔjiim kpo.

⁷Le ban nan wɔɔn Uwonbɔr a siimin nin Farasii yaab nan be niin, ki ban bin lig njee Yisa li teb bininfob likpakɔɔl daalaa. Bi nan ban bin kan nan wee bi li ta bii u yinl le ki ke u bii likpakɔɔl daala.

⁸Amaa Yisa nan nyi baah tiɛr man, le ki bei uja wan a nɔɔ kpo nan ke, “Fii sir bininfob nan a nintogila.” Le u fii ki tan sir niin.

⁹Le Yisa baan bi ke, “N baan ni le, ti siim wɔɔn ke nii likpakɔɔl daalaa: Ti ŋa nan ŋan bee nan biraa? Ti fee limiɛfol bee ti bii laa?”

¹⁰Le u nan lig bininfobin biɛn a num paam ki bei uja-n ke, “Tann a nɔɔ nmɔn na.” Le u tann ki miin mi jir pɔɔg biɛna.

¹¹Amaa le bi ŋuui nan fii Yisa bu takpem, le ki nan piin ki lolig baah li ŋaa Yisa man.

¹²Le weemba daal le Yisa don lijɔɔl a paab, un tan miɛ Uwonbɔr, le ki miɛ ki tan wonn kutaag.

¹³Naah nan wonn njakpanyiɛn ni, le u nan yin u bɔɔnɔɔb le ki gann binib piig nin bilee ki yin bi ke u tooi:

¹⁴U nan gann Simɔnn (wan wee u nan yi u ke Piita nan) nin Simɔnn a waal Anduru, nin Jemisi, nin Jɔnn, nin Filib, nin Batolomiu,

¹⁵nin Matiu, nin Tomasi, nin Jemisi wan ye Alifiu a bija nan; nin Simɔnn wan wee bi nan yi u ke Zealo[9];

¹⁶nin Judasi wan nan ye Jemisi a bija nan; nin Judasi Isikariya (wan nan nan kɔɔr Yisa nan).

¹⁷Le Yisa nin u bɔɔnɔɔb nan nɔɔ jiirin ki nan sir npaan nin. Le u bɔɔnɔɔb takpem mu nan be niin, le bininfob takpem nan be niin ki kpiɛ, bi nan nyan Judiya a tiŋin nin Jerusalam, nin nnyum takpem a timin Taya nin Sidonn a tingbaan yin le;

¹⁸ban nan dan bin nan gbir u bɔr le ki sin kan liwiɛn tebilin. Ban wee nnaanbiim nan nɔɔn nan kan kutebuga.

¹⁹Le bininfob biɛn nan ban bin maa Yisa a gbanann, npɔɔn kaah nan nya u gbanann nin ki che bininfob pɔɔgir n bu.

²⁰Le Yisa nan lig u bɔɔnɔɔbin ki bei ke: “Tikaar be nim ban ye bilanjiimin bu, nan bu-n Uwonbɔr a naam ye ni yaan le.

²¹Tikaar be nim ban wee nkom jɔɔ ni daandaan nan, nan bu-n ni na li ji ki gbee. Tikaar be nim ban mɔr daandaan nan, nan bu-n ni na li la.

²²Tikaar be ni bu, n-yonn man wee bininfob nan ni, n-yonn man wee bininfob wiɛr ni, ki sugir ni, kaa ban ni yin tibir bu-n, Uninfosaal a Bigin bu.

²³“Ni che ni li mɔn ni takpem lidaal nmɔn na, nan bu-n ni nyɔɔr tan be paabin yaba. Man a fala le bi baam nan jɔ ŋaan Uwonbɔr a linlem.

²⁴Amaa woo, nim bijɔɔndam, nan bu-n nim pii kan ni wiiba.

²⁵Woo, nim ban ji ki gbeeg daandaan, nan bu-n nkom na li choo ni. Woo, nim ban laa daandaan nan, nan bu-n ni na li mɔɔ tikpemɔr ki ji mɔɔ tinyinyinn.

²⁶Woo, nim ban wee bininfob biɛn pagir ni nan, nan bu-n man le bi baam nan pagir tibɔkar a linlem.

²⁷“N bei nim ban pelig n bɔr nan le: Ni li jiɛ ni dataam, ki li tun nan ŋan ki tenn ban nan ni.

²⁸Kaab ti kaar ki ŋa ban poog imɔɔŋ ki jaar ni bu nan ki li miɛ Uwonbɔr ki tenn ban bii ni.

²⁹Wan pebiŋ kitapag kiba ke, a labir kan gurin sei un peb. Wan yuur a daala takpeŋ ke, laa ke u laa yuur kuwan bigin ni.

³⁰Wan mu miɛŋ nan ke, a sei mu. Wan fee a wan yɔɔr ke, laa ji ban a gaa jiin ni.

³¹Ni li tun tenn bininfob ke naah ban bi li tun tenn ni man nin na.

³²“Ni ye ni jiɛ ban jiɛ ni a binba ke, ni ye ba a nyɔɔr ki sei naa? Hali ‘tibirdam’ tɔɔl jiɛ ban jiɛ bi-n le.

³³Ni ye ke ni tun nan ŋan ki tenn ban tun nan ŋan ki tenn ni nan a binba ke, ni ye ba a nyɔɔr ki sei naa? Hali tibirdam tɔɔl ŋaan man le.

³⁴Ni ye ke ni peŋ ban wee ni ji na li ga-n ke, ni ye ba a nyɔɔr ki sei naa? Hali ‘tibirdam’ tɔɔl peŋ man le ki tenn ‘tibirdam’, ki jin na gaa bi wan yɔɔr nmɔn a mɔb.

³⁵“Amaa ni li jiɛ ni dataama, ki li tun nan ŋan ki tenn ba, ki li peŋ ba, ki laa tiɛr ke bi li yɔ jiin ni. Ni nyɔɔr na li yab, le ki ji na li ye Uwonbɔr wan be paab nan a buwaab, nan bu-n u ma tun nan ŋan ki tenn ban a num kaa gbee niba nin bipootondam.

³⁶Ni li jɔɔ linyunyunbasanl ke ni Baa kaah jɔɔ linyunyunbasanl man nin na.

³⁷“Ni laa ji bininfob tibɔr wee bi nan laa ji ni tibɔri. Ni laa bii bininfobi wee bi mu laa nan bii ni. Jiɛn per bininfoba wee bi mu nan jiɛn per ni.

³⁸Ni li pu, wee bi mu npu ni nin nmag ŋam man, ki nyii nyii, ki dam dam, wee li nan gbee nin imɔgban, ki nin nan wur, ni pan bu. Nan bu-n kiyiikpoŋ kan wee ni jɔɔ magir tiwann yɔɔr ki pu bininfob nan, bi mu li ta kima le ki mag ki pu ni.”

³⁹Le Yisa ji gaa bi libɔŋal ke, “Ujɔɔn li fir da ujɔɔn kpiɛgaa? Bi biɛn kaa li lu libogilin naa?

⁴⁰Wan tinn kaa jon wan wɔɔnn ni, ni ye wan tinn biɛ diɛ ke, u ni yin nann wan wɔɔnn le.

⁴¹“Ba ŋa wee a kan lidabul lan be a kpiɛg a numbil ni, wee kaa sin kan lidagenl lan be a baantɔɔl a numbil ni nan naa?

⁴²A ŋa nii, ki bei a kpiɛg ke “N jɔ, che n nyan lidabul lan be a numbil ni nan, le kaa sin gar lidagenl lan be a tɔɔl a numbil ni nan naa? Fin ulinlaril nan, choo ki nyan lidagenl lan be a numbil ni, wee ki nin fir kan nbamɔm ki nyan lidabul lan be a kpiɛg a numbil ni.

⁴³“Kisiŋaŋ kaa lo tiloonbiri, le kisibiig mu kaa lo iloon ŋan ni.

⁴⁴Bisib a loon le bi jɔɔ biɛr bi. Baa ker ikinkan bikunkom bu ki mu kaa ker igbiin kigansiig bu.

⁴⁵Uninfo ŋan tun itoon ŋan le, nan bu-n u sufu ni ŋan le, le kuninfobiig mu tun titoonbir, nan bu-n u sufu ni kaa ŋan ni. Nan bu-n nan gbee uninfosaal a sufu ni, ni ma le u pag.

⁴⁶“Ba ŋa wee ni yim ‘Uyudaan, Uyudaan,’ kaa sin tun maah len man naa?

⁴⁷Wan chaan n ban ki pelig n bɔr ki chee ki tun maah ban man nin, n li wɔɔn ni waah nann man.

⁴⁸U nann uja wan nan maa u niin nan le. U nan gbii le jiir tum ki tan pii kutangbapiig, le ki bil lifiɛl tɔɔn li bu ki maa. Ni bɔɔn bu le utaal dan ki nan nun takpem, le nkpen gbee, le kunyunmaŋ don ki nan tel iniin nmɔn, amaa yaa nan lu, waah nan maa i timaaŋann nin bu.

⁴⁹Amaa wan gbir n bɔr nan wee kaa chee nan, u nann uja wan mu nan maa u niin litanbiiril bu wee kaa nan gbii jiir tum ki bil lifiɛl nan le, nnyum nan gbee ki don ki nan tel iniin nmɔn le i lu ki ber pelpel.”