Read Konkomba Lug 8 Bible Online

Lug 8 - Konkomba bible

Lug 8

¹Ni bɔɔn bu le Yisa nan kɔɔ ntim takpemin nin ntim bumin ki mɔɔn Uwonbɔr a naamin kaah yin be man a bɔŋann, le u bɔɔnɔɔb piig nin bilee-n nan nɔɔ u.

²Bipiib ban wee u nan che nnaanbiim nyan bi ni nan nin waah nan teb ban a wiɛn nan mu nan be niin ki nɔɔ u, Meri nan ye u ba (wan nan nyan Magidalin[13] nan). Wan wee nnaanbiim milile nyan u ni nan,

³le biba mu ye Kuza a poo Joana nin Suzaana nin bipiib takpem. Kuza nan ye ubɔr Herɔd a niin a toontunn ninkpelu le, Le bi biɛn nan jɔɔ bi tɔɔl tɔɔl a wan yɔɔr ki tenn Yisa, ki ter u ma nin u bɔɔnɔɔbin biɛn.

⁴Bininfob nan nyan ntim ki dan Yisa ban. Baah nan nan yabig n-yonn man nin le Yisa gaa bi libɔŋal ke,

⁵“Ukpaar uba le nan jon bukpaabin ke u tan yaal idi. Waah nan yaal nan, le iba lu nsanpoolin, le bininfob taan i bu, le nnɔɔm mu ji pii ki jin.

⁶Le iba mu lu kutintiɛg bu, ki pan weem le ki ji kpo, nan bu-n nin yaan kaa nan sɔɔn ni.

⁷Le iba lu ikunkon a bol, ki lagin pan nin ikunkon nin, le i ŋuuri ku.

⁸Le iba mu lu ntanŋam bol, ki pan nbamɔm, ki yabig ki lon jon baah nan bun man ni nfim kokobig.” Yisa kaah nan gaa bi libɔŋal nan ki diɛ n-yonn man ni, le u bei bi ke, “Wan jɔɔ itul ke un gbirim.”

⁹Le u bɔɔnɔɔb nan baan u libɔŋal nan a taai.

¹⁰Le u ke, “Nim bu ke Uwonbɔr kpiir ki wɔɔn ni ki che nim biɛ tibɔr woon kaar ki jiin U naamin paam, amaa biba ma, n gaa bi ibɔŋal le, ‘ke bi li lig, kaa yin kan ni, ke bi gbir kaa yin biɛ ni taai yi.’

¹¹“Libɔŋal nan a taai ye nan le: Ndibimin li ye Uwonbɔr a bɔr.

¹²Le ndibim man lu nsan nan nann bininfob ban gbir n bɔr wee ulinlaril dan ki nan choo nyan bi sufu ni ke bi laa ŋaam yada wee ki nan kan fee jaa nan.

¹³Man mu nan lu kutintiɛg nan bu mu nann bininfob ban gbir n bɔr nin npopeen, wee ta laa jiir bi sufu ni nbamɔm n le; bi ŋa Uwonbɔr yada n-yonn wama nan le, tɔ, le nton pii bi ke, le bi yii n nɔɔm.

¹⁴Man mu lu ikunkon ni nan, nann bininfob ban gbir Uwonbɔr a bɔr wee ki sin ji che bi sufu be dulinya nan a njɔɔm nin linunchɔril bir lan be dulinya nan yaan ni, ti nyagin Uwonbɔr a bɔr n bu le bi sufu ni, le taa yin lo iloon ni.

¹⁵Amaa man mu lu ntanŋam a bol nmu nann bininfob ban jɔɔ gbir sei nin ban a sufu ŋan, ban gbir tibɔr, ki ŋmag ti kenken, ki jɔɔ nnyiginim le ki lo iloon.

¹⁶“Uba kaa nyɔɔ fila wee ki ta kiyiikpoŋ chigin ki bu, bee ki ta siin gadu a lɔŋin ni. See ke u taa tɔɔn niwann nan kper bu, wee bininfob ban biɛn kɔɔn ke, bi kan nwonween nin.

¹⁷Tibɔr tan biɛn woo nan, li nya npaan nin, le tiwann tan biɛn nan be libunbɔnlin li kpiir ki nya nwonween ni.

¹⁸Mambu, ni li nyi naah gbir man nin. Tɔ, wan jɔɔ ke, u li mann gaa ki kpiɛ, amaa wan kaa jɔɔ ke, u li lann nan wee u tiɛr ke u jɔɔ-n gbaa.”

¹⁹Iyaayoo le Yisa a watiib nin u na dan u ban, amaa le baa nan fir fo u ban ni, nan bu-n bininfob le nan yab.

²⁰Le uba nan bei u ke, “A watiib nin a na be nkaafiin ki ban bin kaŋ.”

²¹Le u jiin ke, “Ban gbir Uwonbɔr a bɔr ki chee wee ki tun nin ni samin bi ma ye n watiib nin n na.”

²²Weemba daal le Yisa nin u bɔɔnɔɔb nan kɔɔ kuŋaluŋin; le u bei bi ke, “Ni che ti lɔŋ limɔgil nan a nan bu a dool”, le bi piin bi sanchonl.

²³Baa nan piin ki chaa nan, le Yisa dɔɔn ki jiɛn. Le ntafapɔɔrim nan dan limɔgilin a poolin le nnyum ni fii ki kɔɔ kuŋaluŋin a poolin ki nan ban min gbee, ni nan ye bin kɔɔ kidaŋin le.

²⁴Le u bɔɔnɔɔbin dan u ban ki nan fiin u njiɛmin ki ke, “Uninkpel, uninkpel, ti li nɔɔ nnyum!” Le u fii ki tiɛn ntafaamin nin kunyungbɔŋ nbu ke min ŋmin na, le mi ŋmin chii.

²⁵Le u baan u bɔɔnɔɔbin ke, “Ni yadaa be laa?” Le ni gar bi, le bijawaam nan choo bi. Le bi baan tab ibinbaan ke, “Ninfo boliba yen naa? Wee u pag sei ntafaam nin kunyungbɔŋ wee mi chee u mɔb baa?”

²⁶Yisa nin u bɔɔnɔɔb nan tan foo Gereza, kitiŋ kan be Galilii a biɛŋ a doolin.

²⁷Le Yisa nyan kuŋaluŋ a poolin, le Gereza a tiŋ a jau wan nan jɔɔ nnaanbiim nan, nan kenn u. Ni nan yuur ke waa yee tiwann yɔɔri, u mu kaa ji nan be iniin ni, amaa le ki sin dɔɔ tikarin.

²⁸Waah nan kan Yisa nan le u yigin nmɔpɔɔn ki gbaan Yisa a nintogil, ki tiɛn ke, “Yisa wan ye Uwonbɔr wan be paabin a Bija, min nin fin babu? N baliŋ le, laa mugir mi!”

²⁹Nan bu-n Yisa pii nan pag nin tininkper a pɔɔm ki sei nnaanbiimin ke bi nya uja-n yaan na. Isaŋ takpem ni nan fii u bu le, hali nin baah nan lol u nɔɔi nin u taai nmɔn biɛn ni, u nan ti chinn tikulorin le, le nnaanbiim nmɔn nan ti taar u ki jo kukunkɔɔg bu.

³⁰Le Yisa baan u ke, “A yinl laa?” Le u ke, “N yinl ye Tiyaba,” Nan bu-n nnaanbiim takpem le nan be u ni.

³¹Iyaayoo le nnaanbiim nmɔn nan gbaa balin Yisa ke u laa che bin jiir kubonyɔɔŋ nan yaan ni.

³²Idool takpem li nan be ligungonl a paab ki ji, le nnaanbiimin nan balin Yisa ke un che bi tan kɔɔ idoolin; le Yisa nan sei bi nsan.

³³Nnaanbiim kaah nan nyan uja-n ni ki nan tan kɔɔ idoolin; le idoolin biɛn guun burburbur, ki nyan ligungonl a paab, ki jiir limɔgilin, ki nɔɔ nnyum.

³⁴Tɔ, bidookpaab nan kaah nan kan man nin, le bi nan guun libol nmɔn, ki tan mɔɔn tibɔrin nmɔn, kitiŋin nin kitingbaai.

³⁵Le bininfob dan ke bin nan lig niwann nan ŋa nmɔn. Baah nan foo Yisa ban, bi nan kan uja wan wee nnaanbiim nan nyan u ni nan kaah ka Yisa ban, ki pɔɔ, le u binbem nan ŋan, le ki yee tiwann yɔɔr, le bijawaam choo bininfobin biɛn.

³⁶Le bininfob ban nan kan nin binumbimin bei bi Yisa kaah ŋa man wee uja wan nan jɔɔ nnaanbiimin kan kutebug.

³⁷Le Gereza a tiŋ a ninfob biɛn dan Yisa ban ki nan balin u ke u nya bi tiŋin na, bijawaam kaah nan choo bin bu. Le Yisa nan jir kɔɔ kuŋaluŋin ki fɔr.

³⁸Uja wan wee nnaanbiimin nan nyan u ni-n nan balin ke un nɔɔ Yisa, amaa le Yisa nan ŋɔɔr u, ki ke,

³⁹“Li jir chaa kun a niin ki tan mɔɔn Uwonbɔr kaah tun nan seiŋa.” Le u nan jir ki jin ntim nmɔn biɛn, ki mɔɔn litoonl takpenl lan wee Yisa tun ki sei u.

⁴⁰N-yonn man wee Yisa nan labir jir ki tan don limɔgilin ki miin kuninfogbaluŋ li too u nin npopeen, bi biɛn pii nan guu ki nyi u dam bu.

⁴¹Uja uba nan be niin le bi yi u ke Jairu; u nan ye kuwonjiɛndiig a ninkpelu le; le u dan ki nan gbaan Yisa a nintogil ki ke un dan u niin

⁴²nan bu-n u bisiɛg gaŋ wan nan jɔɔ ibin piig nin ilee nan li bu, ki ban un kpo. Yisa kaah nan chaa-n, le kuninfogbaluŋ nan mug ki nin nan tir u.

⁴³Le upii wan nan kan tipiir ibin piig nin ilee wee naa diɛrin nan be niin. Uba kaa nan fir teb u pɔɔgi.

⁴⁴Le u dan ki nan sir Yisa a bɔɔn ki maa u daala a gbaam. Libol nmɔn yaan le u piirin diɛ.

⁴⁵Le Yisa baan ke, “Ŋma maam maa?” Le bininfob biɛn niɛ, le Piita bei u ke, “Uninkpel, bininfobin kaah yabin bu le bi tiriŋ.”

⁴⁶Amaa le Yisa ke, “Uba maa ma, n biɛ ke npɔɔn nyan ngbanann nin na.”

⁴⁷Ni nan che upii nan kaa ji nan fir ki woo uba Yisa ban ni, le ki nan nyan npaan nin ki sin jegil, ki nan gbaan Yisa a nintogil, ki bei u bininfob biɛn a numbilin nan bu wee u maa u, nin waah kan kutebug weem man.

⁴⁸Le Yisa bei u ke, “N bisa, a yada li che a kan kutebug. Li chaa nin nposɔɔn na.”

⁴⁹Yisa kaah la nan be pag man nin, le u ninfo uba nyan Jairu a niin ki ke, “A bisa-n kpo, laa ji che wan wɔɔnn ji fala ki chaan a niin ni.”

⁵⁰Le Yisa gbir waah pag man, le ki bei Jairu ke, “Laa san bijawaami. Fin len ŋam yada ke u li pɔɔg.”

⁵¹Yisa kaa nan foo Jairu a niin nin, waa nan chee uba n nɔɔ u ki kɔɔ, see Piita nin Jɔnn, nin Jemisi, nin kibigin a baa nin ki na.

⁵²Le bininfob biɛn nan be mɔr kibig nmɔn a kpemɔr. Le Yisa bei bi ke, “Ni laa mɔri man. Waa kpo. U jiɛn le.”

⁵³Le bi laa u ki nyi waah kpo.

⁵⁴Amaa le Yisa choo kibigin a nɔɔ ki ke, “N big fiim.”

⁵⁵Le u foorug nan jirin, le u fii sir libol nmɔn. Le Yisa bei bi ke bin sei kibigin tijiir wee un ji.

⁵⁶Le ni gar u baa nin u na takpem. Le Yisa kpaan bi ke bi li nyi bin bei uba nan tun nan bu.