Read Konkomba Lug 9 Bible Online

Lug 9 - Konkomba bible

Lug 9

¹Ni bɔɔn bu le Yisa nan yin u bɔɔnɔɔb piig nin bilee ki lagin tab, le ki sei bi npɔɔn nin tininkper a pɔɔm man wee bi li fir nyan nnaanbiim biɛn, ki sin ji li fir teb iwiɛn biɛn.

²U nan tun bi ke bi li choon ki mɔɔn Uwonbɔr a naamin a bɔra, ki li teb bibaarib ba,

³ki ji bei bi ke: “Ni laa yuur niba ki ta choon nsan nmɔn ni, ni laa ŋmag njaangbiɛmi, ki laa ŋmag ipɔgi, ki laa ŋmag tijiiri, ki laa ŋmag iligi, ki laa ŋmag daala ilee mu.

⁴Ni kɔɔ iniin yan yaan ke ni li be niin na nin naah na li nya kitiŋ nmɔn yaan.

⁵Kitiŋ kan yaab kaa chee gaa ni wee ni yin nya ke, ni pir ni taai a tann ki jaa niin na wee nin wɔɔn bi kaa che a siɛra.

⁶Man le u bɔɔnɔɔbin sin nan nyan ki choon ntinbumin ki mɔɔn Uwonbɔr a bɔr ki sin teb bibaarib.

⁷Galilii a bɔrbig Herɔd nan nan gbir niwann nan tun ni biɛn, le u sufu nan ŋmarin, nan bu-n bi ba nan ke Jɔnn li fii nkumin.

⁸Le bi ba mu ke Uwonbɔr a linlenu Elaja le degir u ba npaan ni, le bi ba mu ke iyoo yan jon ni a linlem uba li fii nkumin.

⁹Amaa le Herɔd bei ke, N nan che bi tugir Jɔnn a yula, ke ŋma a bɔr wee n ji gbir nan naa? Le ki nan gbar un kan u.

¹⁰Ni bɔɔn bu le u tooi nan nan jirin ki nan bei u baah tan tun man. Le u nan ta bi le bi jon kitiŋ kan wee bi yi ki ke Befisada nan bi binba.

¹¹Amaa le kuninfogbaluŋin nan nan gbir man, le ki nɔɔ u ki jon. Waah nan kan bi ki miin bi chaan n-yonn man nin, le u gaa bi ki wɔɔn bi Uwonbɔr a naamin a bɔr, le ki che ban kaa nan pɔɔ kan kutebug.

¹²Nween kaah nan nan ban min lu-n, le U bɔɔnɔɔb piig nin bilee dan u ban ki nan ke, “Che kuninfogbaluŋ nan jo ntinbumin nin tikpaann nin ki tan ban tijiir ki ji nin didɔɔbol, nan bu-n taah be nan yaan nan ye kulɔŋ le.”

¹³Le u bei bi ke, “Ni tɔɔl n sei bi tijiir wee bin ji.” Le bi bei u ke, “Taa jɔɔ niba ki kpiɛ boroboro kon iŋmu nin ijan ilee nan bu, mambu ke ti li jo le ki tan daa tijiir ki nan jin kuninfogbaluŋ nmɔn.”

¹⁴(Bijab ban nan be niin nmɔn nan ŋa turiŋmuu.) Amaa le u bei u bɔɔnɔɔbin ke, “Ni che bininfob nmɔn n por ki kal piŋmu piŋmuu.”

¹⁵Le u bɔɔnɔɔb nmɔn nan che bi por ki kal ikur ikur.

¹⁶Le u yuur boroboro kon iŋmu-n nin ijan ileen le ki lig paab ki sei Uwonbɔr kunɔɔpoog, le ke war war ki sei u bɔɔnɔɔbin ke bi li tol bininfobin na.

¹⁷Le bi biɛn jin ki gbee. Le u bɔɔnɔɔbin nan lagin ti jiir tan wee bininfobin jin gbee ki gurin, ki gbeen tikachar piig nin tilee.

¹⁸Weemba daal le Yisa nan be miɛ Uwonbɔr u binba, le u bɔɔnɔɔb nan be u ban; le u baan bi ke, “Bininfob ke n ye ŋma?”

¹⁹Le bi jiin u ke, “Bi baa ke a ye Jɔnn Wan nan Fu Bininfob Uwonbɔr a Nyunfulin le, le biba mu ke Elaja le, le biba mu ji ke Uwonbɔr a linlem ban nan kpe-n a ni uba li fii nkumin.”

²⁰Le u baan bi ke, “Amaa nim ke n ye ŋma?” Le Piita jiin u ke, “A ye Uwonbɔr a Masiya le.”

²¹Le Yisa nan sei u bɔɔnɔɔbin ikpaan nbamɔm ke bi laa bei uba tibɔr nmɔn ni.

²²Le ki ji bei bi ke, “Ni kpaa le ke min Uninfosaal a Big n ji fala takpem. Le Juu yaab a ninkpeeb nin kumanug a ninkpeeb nin ban wɔɔnn Uwonbɔr a siim nan li yiim, ki ji kum, amaa iweehn itaa daal, Uwonbɔr li fiinim nkumin.”

²³Le u bei bi biɛn ke, “Uninfo wan ban un nɔɔ min ke, see ke, u yii u ba ki yuur u dapunpunl idaan biɛn ki li nɔɔm.

²⁴Wan jɔɔ u miɛfol ki debin nin, u na li lan li, amaa wan mu kaa debin u miɛfol min bu ke, u na li kan li.

²⁵Ni ye uninfo kan dulinya nan a wan yɔɔr biɛn wee ki sin lan u miɛl ke, ba a nyɔɔr wee u kan naa?

²⁶Wan sam ifa ki jiin n mɔboi nan paam ke, Uninfosaal a Big mu na li san u ifa lidaal lan wee u nan dan nin u pag nin u ba a pag nin kasi a malakamin.

²⁷N bei ni ibamɔn le, ban si do nan biba kaa li nyi kpo see ke bi nan kan Uwonbɔr a naamin.”

²⁸Waah nan pag man nmɔn, ni bɔɔn bu a ween iniin daal le u yuur Piita nin Jɔnn nin Jemisi, ki ta bi donn lijɔɔl a paab ke un tan miɛ Uwonbɔr,

²⁹waah nan be miɛ Uwonbɔr nan le u num paam nan kpenn. Le u wan yɔɔr nan penn ki nyagin ke nŋmi peen ni.

³⁰Le bijab bilee, Moziz nin Elaja,

³¹nan degir nin linungbeel a pag, ki pag nin Yisa ki jiin u kum paam, nin waah na li kpo Jerusalam ki gbeen Uwonbɔr a bam man.

³²Amaa njiɛm nan jɔɔ Piita nin u tabin pam, le bi jiɛn ki nan jee ligir ki kan waah pag nin bijab bilee ban lagin si u ban nin.

³³Bijab nmɔn kaah nan fɔɔr Yisa ban ni, le Piita bei u ke, “Uninkpel, ni ŋan nin ti li be do. Che ti ŋa tinanbonn titaa, kuba li ye a yaag, le kuba mu ye Moziz yaag wee kan guri mu li ye Elaja yaag.” (Piita kaa nan nyi nan wee u pag nmɔn ni.)

³⁴Waah la nan be pagin, le kitilangbɔŋ degir ki nan piin bi bu, le bijawaam choo Piita nin u tab nmɔn baah nan kɔ kitilangbɔŋin ni.

³⁵Le bi gbir likukɔl pag kitilangbɔŋin yaan ki ke, “N bija wan wee ngann win li yen ni gbirim u mɔb.”

³⁶Likukɔl nan kaah nan pag diɛ-n, le bi kan Yisa a binba kaah paar ki si niin. Le bi nan ŋmag tibɔr nmɔn bi binba kaa bei uba iyaayoo nmɔn baah kan nan ni.

³⁷Naah nan won kutaag wee bi nan nyan ligungonlin a paab ki jiirin ni, le kuninfogbaluŋin nan too u.

³⁸Uja uba nan be kuninfogbaluŋ nmɔn yaan, ki tiɛn ki yin Yisa ke, “Wan wɔɔn, n baliŋ le, nan lig n bija nan; u ma le ye n bigaŋ,

³⁹kinaanbiig le fii u bu ki che u kuun ki nan lur likpikpiil ki nan bir, le kumɔsangbugbalug nya u mɔnn, ni le ŋaan u man le kaa ban nin jaa wi, ni na li bii u.

⁴⁰N balin a bɔɔnɔɔb ke bin nyan kinaanbiig nmɔn, le bi walin gur.”

⁴¹Le Yisa jiin ke, “Ni daandaan nan a ninfob ban kaa jɔɔ yada ki jɔɔ kuŋmaruŋ nan, n yin yuur ni ban nii ki li jɔɔ limɔril ni naa?” Le ki nan bei uja-n ke, “Taa a bija nmɔn dan do.”

⁴²Hali kibigin kaah nan chaan Yisa ban n-yonn man nin, le kinaanbiig nmɔn nyiɛ u tum le u dɔ liɛr, iyaayoo le Yisa tiɛn kinaanbiig nmɔn bu, ki che kibigin kan kutebug, le u ta u ki sei u baa.

⁴³Ni nan gar bininfobin biɛn le nin Uwonbɔr a pɔɔm kaah yab man. Ni la nan gar bininfobin le waah tun litoonl lan nin bu, le Yisa bei u bɔɔnɔɔb ke,

⁴⁴“Ni loor ni tuli ki gbir nan wee n yin pag nan nbamɔm: Bi na li ta Uninfosaal a Big ki ŋubin bininfob a nɔɔn.”

⁴⁵Amaa baa nan biɛ naah ye man ni. Uwonbɔr le nan degin bi lam ke bi laa biɛ; le bi ji san bijawaam nin bi baan tibɔr nmɔn a taai.

⁴⁶Limɔkpel li nan dan u bɔɔnɔɔbin a sisiigin, le bi ke, ŋma ye wan jon ti biɛn ti sisiigin nan naa?

⁴⁷Le Yisa biɛ baa tiɛr man. Le ki yuur kibig ki siin bagin u ba.

⁴⁸Le ki bei bi ke, “Wan gaa kibig nan n yinl bu ke, u gaa min le; le wan mu chee gaam ke, u gaa wan tunim n muu. Nan bu-n wan ye ulanjiin ni sisiigin ni u ma ye wan jon ni biɛn.”

⁴⁹Le Jɔnn bei u ke, “Uninkpel, ti nan kan uja uba le u yi a yinl ki nyan nnaanbiim bininfobin, le ti bei u ke un jiɛn na, waah kaa ye ti ni uba-n bu.”

⁵⁰Le Yisa bei u ke, “Ni laa ŋɔɔ wi, nan bu-n wan biɛn kaa kɔnn ni ke, u si ni bɔɔn le.”

⁵¹N-yonn kaah nan nan mal nin Yisa nin do Uwonbɔr a niin nan, le u nan pɔɔn u ba ki gaa Jerusalam a sam ke un jo.

⁵²Le ki tun biba le bi liir nsan ki jon Samariya a tiŋ big kiba ni, bin tan ŋa sili ki guur u,

⁵³amaa kitiŋ big nmɔn a ninfob kaa nan gaa wi, nan bu-n u nan jo chaa Jerusalam le.

⁵⁴U bɔɔnɔɔb Jemisi nin Jɔnn kaah nan gbir man nan, le bi baan u ke, “Ti yudaau, a ban ti yin nŋmi le nya paab ki nan gaa baa?”

⁵⁵Le Yisa nan labir ki fuun bi bu,

⁵⁶le u ma nin u bɔɔnɔɔb nan jon kitiŋ kiba ni.

⁵⁷Baah nan be nsan bu ki chonn chaa-n, le uja uba nan bei Yisa ke, “N li nɔɔŋ ki jo nan yaan biɛn wee a chaan.”

⁵⁸Le Yisa bei u ke, “Tiŋɔgir jɔɔ ifal yan yaan wee bi kɔɔ, le nnɔɔm man laan paab nan mu jɔɔ titiɛr tan yaan wee bi dɔɔ, amaa Uninfosaal a Big kaa jɔɔ waah dɔɔ nan yaan ni.”

⁵⁹Le ki ji bei uja uba mu ke, “Li nɔɔm ni.” Le uja nmɔn bei u ke, “Uyudaan, che n chinn ki jo tan pii n baa wee.”

⁶⁰Le Yisa bei u ke, “Che bitakpiibin pii bitakpiib tab. Amaa fin li chaa ki tan mɔɔn Uwonbɔr a naam nan a bɔr.

⁶¹Le uba mu bei u ke, “Uyudaau, n li nɔɔŋ, amaa che n chinn ki tan chabir n niin yaab wee ki nin jirin nan nɔɔŋ.”

⁶²Le Yisa jiin ke, “Uba kaa li ta u nɔɔ ki paan linaakuul bu ki ko wee ki sin ji gbiɛ lig u bɔɔn ni. Ni ye wan gbiɛ lig u bɔɔn man ke, waa ŋan nin u ŋa Uwonbɔr a naam nmɔn a toontun wi.”