Read Konkomba Jɔnn 10 Bible Online

Jɔnn 10 - Konkomba bible

Jɔnn 10

¹“N bei ni ibamɔn le, uja wan kaa nɔɔ ntimansanmɔnn ki kɔɔ ipee a kpinkpenlin ni, amaa ki yug lagir niba paam ki kɔɔ ke, u ye unaayig le nin wan feen.

²Uja wan nɔɔ ntimansanmɔnn ki kɔɔ-n le ye u pee yin a kpaaru.

³Wan dɔ guu-n li loor ntimansanmɔnn ki sei u, le ipee-n pelig u kukɔl. U yi u pee yin a yin le ki ta i nya.

⁴U nan ta u tɔɔl yaai nmɔn biɛn nyan ke, u liin bi sam le bi paa u bɔɔn, nan bu wee u pee yin nɔɔ win ye baah gbir u kukɔlin le.

⁵Amaa baa li nɔɔ uchaan ni; ibamɔn buu, bi li guun jiɛn u, nan bu-n baa biɛr uchaan nin a kukɔli.”

⁶Yisa nan pag nin ibɔŋal le, amaa baa nan biɛ waah nan bei bi man ni.

⁷Man bu le Yisa ji nan ke, “N bei ni ibamɔn le, min le ye ipee-n a diig a timansanmɔnn.

⁸Ban nan chinn dan nin min nin nan ye binaayigib le nin ban feen, amaa ipee-n kaa nan pelig bi bɔri.

⁹Min le ye ntimansanmɔnn; wan biɛn nɔɔm ki kɔɔ li kan feegab. U li nɔɔm kɔɔ ki nɔɔm nya, ki tan kan timɔɔr sɔɔn.

¹⁰Unaayigin dan le u nan su ki ku ki bii; min dan le ke bin kan limiɛfol, ki kan li nin linungbeel.

¹¹Min le ye upeekpaar ŋan nin. Upeekpaar ŋan nin le taa u miɛfol ki kpenn ipee.

¹²Wan kpaa ipee nmɔn ki gaan tiyɔr kaa ye upee daan ni. Mambu u nan kan ligbingbel chaan ke, u jaar ipee-n le ki guun. Le ligbingbelin nan leg ipee-n ki worin.

¹³Nan bu wee u guun nin, u ye wan kpaa ki gaan tiyɔr le mambu u poobil kaa wii ipee-n bu.

¹⁴“Min li ye upeekpaar ŋan nin; n nyi n pee le n pee yin mu nyim,

¹⁵a li ke Baa-n kaah nyim man nin wee n mu nyi Baa-n, le n ta n miɛfol kpenn ipee-n.

¹⁶N jɔɔ ipee iba yaa ye likpinkpenl nan a peei. Ni kpaa le n taan itɔɔl ni. I mu li pel n kukɔl, wee i nlabir ipee iba yan nɔɔ tab ki jɔɔ upeekpaar uba.

¹⁷Nan bu wee n Baa-n jiɛm ye maah ta n miɛfol ki kpenn, wee ki jin nan gaa li-n.

¹⁸Uba kaa fee n miɛfolin nmɔn n ban ni, amaa n tɔɔl a wiib le n ta bil bi. N jɔɔ tininkper a pɔɔm ki li fir taa ki bil nin tininkper a pɔɔm ki ji li fir gaa li. N nan gaa nsiim nan n Baa-n ban le.”

¹⁹Imɔbon nmɔn nan che Juu yaabin ji nan bɔgira.

²⁰Bi pam nan ke, “Kinaanbiig li jɔɔ u le u waar. Ba ŋa ni pelig u bɔraa?”

²¹Amaa le biba ke, “Ileen nan kaa ye kinaanbiig kaah jɔɔ wan a leen yi. Kinaanbiig li fir ligir ujɔɔn a numaa?”

²²Le Kuchiig kan tiɛr Jerusalam a wonjiɛn niin a yonn nan nan foo. Ni nan ye tiwar a yonn le,

²³le Yisa nan chonn ki jin iwonjiɛn niin a nan paam bi nan yi ki ke Solomɔnn a dɔŋin.

²⁴Le Juu yaab nan lagin ki jin u, ki bei u ke, “A ban ti li biɛnn ti potiɛlin ki tan kpaa ibayoo? Ni ye fin li ye Masiya-n ke, bei ti npaan ni na.”

²⁵Le Yisa jiin ke, “N nan bei na, amaa le naa ban ni ŋa yada. Ligaril a siɛram yan wee n ŋa n Baa a yinl bu-n li pag seim,

²⁶amaa naah kaa ye n pee yin bu le naa ŋa yada.

²⁷N yaa pee pelig n kukɔl le; n nyi i, le i nɔɔm.

²⁸N sei i limiɛfol lan kaa jɔɔ diɛm le, le yaa jɔɔ yin buri; uba kaa li fir fee i n nɔɔn ni.

²⁹N Baa, wan ta i sei mi, yab jon ni biɛn na; uba kaa li fir fee i n Baa a nɔɔn ni.

³⁰Min nin n Baa ye nba le.”

³¹Le Juu yaabin ji pii itangbag ke bin gabir u ki ku,

³²amaa le Yisa bei bi ke, “N ta ligaril a siɛram takpem yan nyan Baa-n ban ki wɔɔn na. Ke i la baa bu wee ni gabir itangbag ni ku maa?”

³³Le Juu yaabin jiin ke, “Taa gabiriŋ itangbag i ma bu, ŋaah sugir Uwonbɔr nbu, nan bu-n fin, usaal mu, nan ke fin ye Uwonbɔr.”

³⁴ Le Yisa jiin bei bi ke, “Naah sɔb dɔ ni siimin naa? ‘N nan len ke ni ye iween le.’

³⁵Ni ye ke Uwonbɔr yin bima ban wee U mɔboi foon nin iween ke, le Uwonbɔr a sɔbim mu kaa kpenn ke,

³⁶ke wan wee Baa-n nan gann wee u ye u yaa win ki tunn u dulinya nan yaan nin? Ba ŋa wee ni galim ke n sugir Uwonbɔr maah ke ‘N ye Uwonbɔr a Bija-n’ buu?

³⁷Ni laa ŋa min yada see ke n nan tun n Baa kaah tun man nin.

³⁸Amaa ni ye ke n ŋa ni ke, naah kaa le ŋa min yada nan, ni ŋa ligarilin yadau, wee ni mann biɛ ke Baa-n be n ni, le n be Baa-n ni.”

³⁹Le bi ji nan ban bin choo u, amaa le u nan ŋmar bi nɔɔn.

⁴⁰Tɔ le Yisa nan jir don Jɔdann a kpem ki jon nan yaan wee Jɔnn pii nan chinn fun Uwonbɔr a nyunfulin. Niin le u nan be

⁴¹le bininfob takpem nan dan u ban ki nan ke, “Nin Jɔnn kaah kaa le nan ŋa ligaril a siɛra liba-n gbaa, waah nan len man uja nan bu-n nan ye ibamɔn le.”

⁴²Nin yaan le bininfob takpem nan ŋa Yisa yada.