Read Konkomba Jɔnn 11 Bible Online

Jɔnn 11 - Konkomba bible

Jɔnn 11

¹Tɔ le uja wan bi nan yi u Lazarusi nan nan bun. U nan nyan Betani le, kitiŋ kan wee u ma nin u ninsiɛb Meri nin Maata nan nyan ni.

²Meri, wan a ninja bun nan, u ma nan ye wan nan kpaar tulaali ki jaa Uyudaan bu ki ji ta u tɔɔl a yukper ki ŋmir U taafar.

³Mambu le u ninsiɛbin nan tun bei Yisa ke, “Uyudaan, ŋaah jiɛ wan nin bun le.”

⁴Yisa kaah nan gbir man nin, le U ke, “Iwiɛn nan kaa li joor nin nkumi. Aai, ni ye Uwonbɔr a pag le wee nin che Uwonbɔr a Bija-n kan npagim ni ma bu.”

⁵Yisa nan jiɛ Lazarusi nin u ninsiɛb Maata nin Meri.

⁶Amaa waah nan nan gbir ke Lazarusi bun nin, u nan paar waah nan be nan yaan nin le ki tan kpaa iween ilee.

⁷Tɔ le ki nin nan bei u bɔɔnɔɔb ke, “Ni che ti jir Judiya.”

⁸Le bi nan bei ke, “Amaa wan wɔɔnn, naah laa yuuri, le Juu yaab nan ban bin gabiriŋ itangbag, le a ji ban a jir niin naa?”

⁹Le Yisa jiin ke, “Naa ye tikur piig nin tilee li be nweehn naa? Usaal wan chonn nween kaa gbiɛri, nan bu-n, u ga dulinya nan a wonweem le.

¹⁰U chonn kunyiɛg le ke u gbiɛr, nan bu-n waah jɔɔ nwonween ni.”

¹¹Waah nan len man a bɔɔn, le u ji nan piin ki wɔɔn bi ke, “Ti jɔ Lazarusi dɔɔn jiɛn le; amaa n chaa niin le n tan ligir u.”

¹²Le u bɔɔnɔɔbin jiin ke, “Uyudaan, ni ye u jiɛn li ke u li pɔɔg.”

¹³Yisa nan pag Lazarusi a kum le, amaa u bɔɔnɔɔbin ma nan nyi ke u len kuwonaaŋ a jiɛm le.

¹⁴Mambu le u nin bei bi npaan ni ke, “Lazarusi kpou,

¹⁵nim bu n pool penn nin maah kaa bi be niin ni, nan bu-n ni li ŋa yada. Amaa ni che ti jo u ban.”

¹⁶Le Tomasi (ni taai le ye kijaaŋ[6]), bei u bɔɔnɔɔtabin ke, “Ni che ti mu njo, wee ni tan ye tim nin u ma nkpo ke ti kpo.”

¹⁷Yisa kaah nan foon nin, le u nan gbir ke Lazarusi kaah kpo wee bi pii u kukaagin a ween inaa sɔ.

¹⁸Nya Batani ki chaa Jerusalam kaa nan foo maal ilee,

¹⁹le Juu yaab pam nan dan bin nan poor Maata nin Meri bi ninja kaah kpe-n a ninbɔŋ.

²⁰Maata kaah nan gbir ke Yisa chaan nin, le u nyan ki too u nsan bu, amaa Meri ma nan paar iniin le kaa nyan ni.

²¹Le Maata bei Yisa ke, “Uyudaan, ni ye ke a nan bi be ke, n ninja kaa nan bi li kpo.

²²Amaa n nyi ke hali daandaan nan a baan nan biɛn bu ke Uwonbɔr li ta ni ki seiŋ.”

²³Le Yisa bei u ke, “A ninja-n li fii nkumin jigin.”

²⁴Le Maata ke, “N nyi ke u ji li fii lidajoorikaal a kum a fiimin.”

²⁵Le Yisa bei u ke, “Min le ye nkum a fiim nin limiɛfol. Wan ŋaam yada li kan limiɛfol, hali nin waah le kpe-n biɛn na;

²⁶le wan biɛn jɔɔ limiɛfol wee ki ŋaam yada kaa jɔɔ un kpo. A ŋa ni nan yada waa?”

²⁷Le u bei u ke, “Nn, Uyudaan, n nyi ke a ye Masiya-n le, Uwonbɔr a Bija-n, wan nan ye un dan dulinya nan yaan nin.”

²⁸Waah nan len man diɛ-n, le u nan jir tan yin u waal Meri ki nyan ngbaan. Le ki bei u ke, “Wan wɔɔn nin be do, le ki baan a bu.”

²⁹Meri kaah nan gbir man nin, le u nan fii weem ki jon u ban.

³⁰N-yonn nmɔn Yisa kaa la nan kɔɔ kitiŋin a poolin ni, amaa u la nan si nan yaan wee Maata nan nan to win le.

³¹Juu yaab ban nan be Meri ban iniin, ki sar u sufu-n, kaah nan kan waah fii weem ki nyan man nin, le bi nyan nɔɔ u, ki tiɛr ke u nan chaa kukaagin yaan le un tan mɔɔ.

³²Meri kaah nan foo nan yaan wee Yisa nan be-n wee ki kan win, le u gbaan Yisa a taatum le ki ke, “Uyudaan, a nan bi be do ke, n ninja nan kaa nan bi li kpo.”

³³Yisa kaah nan kan Meri mɔrin, wee Juu yaab ban nan nɔɔ win mu nan mɔrin, le ni nan mug u kinaaŋin.

³⁴Le u baan ke, “Ni pii u laa?” Le bi jiin ke, “Uyudaan, dan ki nan lig.”

³⁵Le Yisa nan mɔɔ.

³⁶Le Juu yaabin len ke, “Lig waah jiɛ u man!”

³⁷Amaa le bibam ke, “U ma wan nan ligir ujɔɔn a numin kaa bi li fir guur uja nan wee u laa kpoo?”

³⁸Kinaaŋin kaah ji nan mug Yisa-n, le u dan kukaagin yaan. Ki nan ye libonl lan be litangbagilin, le litangbag takpenl loo ki mɔb.

³⁹Le Yisa len ke, “Ni yuur litangbagilin na.” Le Maata, wan ye utakpiirin a ninsa len ke, “Amaa, Uyudaan, n-yonn nan ni li nu pam, nan bu-n waah be niin a ween inaa sɔ.”

⁴⁰Le Yisa ke, “Maa beiŋ ke ni ye ke a ŋa yada ke, a li kan Uwonbɔr a pagaa?”

⁴¹Le bi loor litangbagilin. Le Yisa lig paab le ki ke, “Baa, N pooriŋ pam nin ŋaah gbir ki gaa n wonmiɛl.

⁴²N nyi ŋaah gbaa gbir n bɔr, amaa n len man le bininfob ban si do nan nbiɛ, wee ki ŋa yada ke fin le tunim.”

⁴³Waah nan len man ki diɛ-n, le Yisa yin nin nkukɔ pɔɔn ke, “Lazarusi, nyann!”

⁴⁴Le utakpiirin nan nyann, u nɔɔi nin u taai nan bon nkum a kinkenl le ki ji piin u num bu.[7] Le Yisa bei bi ke, “Ni nyan nkum a kinkenlin na wee ki che u li chaa kun na.”

⁴⁵Mambu Juu yaab pam ban nan dan bi nan poor Meri, wee ki nan kan Yisa kaah ŋa man nin, le bi ŋa u yada.

⁴⁶Amaa le bi ni biba nan jon Farasiim ban ki tan bei bi Yisa kaah ŋa man.

⁴⁷Le biminmanib a yudaau nin Farasiim nan yin Juu yaab a yudam a laguŋ. Le bi baan ke, “Ti ka ŋaan baa? Ni lig uja nan kaah ŋaan ligaril a siɛram takpem man.

⁴⁸Ni ye ke ti che u ŋaan man ke, uninfo biɛn li ŋa u yada, tɔ le Rom yaabin li dan ki nan fee ti kasi a bol nan nin ti ninfob.”

⁴⁹Le bi ni uba, wan a yinl nan ye Kayafasi, ki nan ye biminmanib a yudaau libinl nmɔn nin nan pag paab ke, “Naa nyi niba kolibi!

⁵⁰Naa nyi ke uninfo uba kpo bininfob bu ke ni ŋan sei ni ki jon Juu yaab biɛn kaah li bur!”

⁵¹Waa nan len ni nan u tɔɔl a wiibi, amaa waah nan ye biminmanib a yudaau libinl nmɔn nin bu le u nan pag ilinlen leen ke Yisa na li kpo Juu yaab bu,

⁵²le naa ye bi bol a binba bu, amaa Uwonbɔr a bum ban yaalin, ke un lagin bi bogil liba wee bi ŋa ninfo uba.

⁵³Mambu lidaal nmɔn le bi piin ki lolig ke bin nyan u miɛfol.

⁵⁴Mambu le Yisa kaa ji nan chonn kubabugin Juu yaab kaah be nan yaan nin. Amaa u nan nyan le ki jon kitiŋ kan bi yi ke Efiram, wee kaa fɔg nin kukunkɔɔgin ni, le ki nan tan be nin u bɔɔnɔɔb.

⁵⁵Juu yaab a Yuglagir a chiig kaah nan nan malin, le bininfob takpem nan nyan ntimin ki jon Jerusalam bin tan kan likaal a ŋunnim wee Yuglagir a chiig n nin foo.

⁵⁶Le bi nan be ki ban Yisa a bol, baah nan si iwonjiɛn niin nin paamin le bi baan tab, “Ni tiɛr ke niin? Waa chaan un nan ji kuchiig nan le bee?”

⁵⁷Amaa biminmanib a yudam nin Farasiim nan pag sei le ke wan ban kan Yisa kaah be nan yaan ke, ni ye un bei bi le wee bin tan choo u.