Read Konkomba Jɔnn 17 Bible Online

Jɔnn 17 - Konkomba bible

Jɔnn 17

¹Yisa kaah nan len man nmɔn, ni bɔɔn bu le U yaar lig paab le ki miɛ Uwonbɔr ke: “N baa, n-yonn nmɔn foo u. Che A bija n kan kupag wee A bija mu n pagiŋ.

²Nan bu-n fin le sei u tininkper a pɔɔm le u jon bininfob biɛn ke un sei ban biɛn wee A ta sei win limiɛfol lan kaa jɔɔ ndiɛm.

³Daandaan nan limiɛfol lan kaa jɔɔ ndiɛm nmɔn ye nan le: Ke bin biɛ fin wan ye ibamɔn a Wonbɔru win, nin Yisa Masiya, wan wee a tun nin.

⁴N ŋmagin kupag nan dulinya-n le n nan seiŋ maah diɛ litoonl lan wee A nan ta seim ke n tun nin.

⁵Le daandaan nan, n Baa, seim kupag A nintogil ni, kupag kan wee n nan kan A ban n-yonn man wee dulinya kaa la nan naan nin.

⁶“N kpiiriŋ ki wɔɔn bininfob ban wee A nan ta seim dulinya nan yaan nin na. Bi nan ye A yaab le; Fin le ta bi seim le bi chee A mɔleen.

⁷Daandaan nan bi nyi ke niwann nan biɛn wee A ta seimin nyann Fin ban le.

⁸Nan bu-n n ta imɔleen yan wee A ta seimin ki sei ba, le bi gaa i. Bi nyi ibamɔn ke n nyan Fin ban le, ki ŋa yada ke Fin le tunim.

⁹N miɛ le ki tenn bi. Maa miɛ tenn dulinya, amaa ban wee A ta bi seimin, nan bu-n bi ye A yaab le.

¹⁰Maah jɔɔ ban ye A yaab le, le Ŋaah jɔɔ ban nin biɛn ye n yaab. Le n kan kupag bi ban.

¹¹Maa ji yin be dulinya nan yaan ni, amaa bi ma la be dulinya nan yaan, min chaan A ban le. Baa wan be kasi, guur bi A yinlin a pɔɔm bu, liyinl lan wee A ta sei min bu, naah li ŋa man wee bin ŋa nba ke taah ye nba man nin.

¹²Maah la nan be bi ban nin, n nan guu bi le ki ŋmag bi A yinl lan wee A nan ta seim nmɔn a pɔɔm bu. Bi ni uba kaa bori see gab yɔli a ninfo win naah li ŋa man wee nin gbeen naah sɔb man Uwonbɔr a gbɔŋin nin.

¹³“N chaan A ban le daandaan nan, amaa n pag ni niɛ nan n-yonn man wee n la be dulinya nan yaan ni le, naah li ŋa man wee bin gbee nin n mɔmin bi sufu ni.

¹⁴Min le ta A mɔleen yin ki sei bi le dulinya yaab nan bi, nan bu-n baa ji ye dulinya yaab jigin ke maah kaa ye dulinya a ninfou man nin.

¹⁵N wonmiɛl kaa ye A nyan bi dulinya nan yaan ni, amaa n miɛ le ke A guur bi ki nyan bi tibir daan a nɔɔn.

¹⁶Baa ye dulinya yaabi, hali a li ke maah kaa ye dulinya a ninfou man nin.

¹⁷Ŋa bi kasi ibamɔn nin buu; A mɔleen yin ye ibamɔn le.

¹⁸Ŋaah nan tum dulinya-n man nin, man le n tun bi dulinya-n.

¹⁹Bi ma bu le n ŋa nba kasi, ke ni che bi mu n ŋa kasi ibamɔn.

²⁰“N wonmiɛl kaa tenn bi binba. N miɛ ki tenn ban mu la yin ŋaam yada bi mɔleen bu-n le,

²¹ke bi biɛn n ŋa nba; ke Ŋaah be nni wee n mu be A ni man nin. Che bi mu li be nin tima wee dulinya yaab n ŋa yada ke Fin le tunim ni.

²²N ta kupag kan wee A nan ta seimin ki sei ba, ke nin che bin ŋa nba ke taah ye nba man nin:

²³Le n li be nin bi wee A li be nim. Che bi li jɔɔ nmɔkpaa bamɔn na. Wee nin che dulinya yaab nbiɛ ke Fin le tunim le ki jiɛ bi hali ke ŋaah jiɛm man nin.

²⁴“N Baa, n ban bininfob ban wee A ta seimin na li be n ban le maah na yin be nan yaan nin. Wee bin kan npagim, kupag kan wee A nan ta seimin, nan bu-n Ŋaah jiɛm n-yonn man wee dulinya kaa la nan naan nin.

²⁵“N Baa Wan ye tibuchinn daan, hali dulinya yaab kaah kaa le nyiŋin, min nyiŋ, le bi nyi ke Fin le tunim.

²⁶N che bi biɛŋa, le ki li che bin mann biɛŋ naah li ŋa man wee Ŋaah jiɛm man nin li be nin bi wee n mu tɔɔl li be nin bi.”