Read Konkomba Jɔnn 21 Bible Online

Jɔnn 21 - Konkomba bible

Jɔnn 21

¹Ni bɔɔn bu, Yisa ji nan degir u bɔɔnɔɔb bu Tiberiya a mɔgilin. Naah nan tun man sɔ:

²Simɔnn Piita, nin Tomasi (wan wee bi yi u ke kijaaŋin), nin Nataniɛl (wan nyann Kena kan be Galilii a tiŋin nin), nin Zebedi a naachimin, ki kpiɛ Yisa a bɔɔnɔɔb bilee bi biɛn nan lagin be le.

³Le Simɔnn Piita bei bi ke, “N chaa jan chool le.” Le bi jiin bei u ke, “Ti li nɔɔŋ jo.” Le bi nyan ki kɔɔ kubulunkpoŋin, amaa kunyiɛmuŋ nmɔn biɛn baa nan choo niba.

⁴Le njakpanyiɛn, le Yisa sir nnyum a gbaam, amaa bibɔɔnɔɔbin kaa nan biɛ ke Yisa le yen ni.

⁵Le u baan bi ke, “N jɔtiib, naa jɔɔ ijan naa?” Le bi jiin u ke, “Aai.”

⁶Le u bei bi ke, “Ni ta ni janlaaŋin ki jaa kubulunkpoŋin a jiim paama, wee ki choo ijan. “Baah ta bi janlaaŋin ki jaa nnyumin nin le kaa ji li fir daar ki kɔɔn kubulunkpoŋin yaan ni, nan bu-n bi nan choo ijan le takpem.

⁷Le ubɔɔnɔɔr wan wee Yisa jiɛ-n bei Piita ke, “Uyudaan le yen!” Piita kaah gbir ke “Uyudaan le yen” nin, le u yuur u kinkenl gab (u pii nan gabir li le bil) le ki yug lu nnyumin.

⁸Le bibɔɔnɔɔb bi miɛnin ta kubulunkpoŋ ki ŋɔɔr u taai, ki dar kujanlaaŋin ke ki gbee nin ijan, nan bu-n bi bol kaa nan fɔg nin likpengonli, ni nan ye itaadann kobig paam le.

⁹Baah nan don likpengonlin, le bi kan iŋmisakɔɔn a ŋmiim le ijan pul niin, nin boroboro.

¹⁰Le Yisa bei bi ke, “Ni li jɔɔn ijan yan wee ni choo-n iba ni.”

¹¹Le Simɔnn Piita don kubulunkpoŋin a poolin ki dar kujanlaaŋin donn likpengonl. Ki nan gbee nin ijan gbingbem le, i biɛn nan lagin ye ijan kobig nin piŋmu nin itaa le, amaa hali nin yaah le nan yab man nmɔn biɛn na kujanlaaŋin kaa nan chiɛ.

¹²Le Yisa bei bi ke, “Ni dan nan chann ni mɔb.” U bɔɔnɔɔb nmɔn a ni uba kaa nan baan u ke, “A ye ŋmiɛ?” Bi nan nyi waah ye Uyudaan.

¹³Le Yisa dan, ki nan yuur boroboro ki ta sei bi, ki ji yuur ijan nin mu ki sei bi.

¹⁴Ni niɛ nan le nan kpiɛ nfimitaa le Yisa degir u baa u bɔɔnɔɔb ban, waah nan fii nkumin a bɔɔn.

¹⁵Baah nan jin diɛ-n, le Yisa baan Simɔnn Piita ke, “Simɔnn Jɔnn a bija, a jiɛm ibamɔn ki jon bi niɛ waa?” Le u jiin ki bei u ke, “Nn n Yudaau, a nyi ke n jiɛŋ.” Le Yisa ke, “Li jinn n peebum nan na.”

¹⁶Le Yisa ji len ke, “Simɔnn Jɔnn a bija, a jiɛm ibamɔn naa?” Le u jiin ke, “Nn, n Yudaau, a nyi ke n jiɛŋ.” Le Yisa len ke, “Li guu n peei nan na.”

¹⁷Nan nan kpiɛ nfimitaa-n le u bei u ke, “Simɔnn Jɔnn a bija, a jiɛm maa?” Piita a sufu nan bii le nan bu-n Yisa kaah nan baan u ki tan kpaa nfimitaa ke, “A jiɛ maa?” Le u ke, “Uyudaan, a nyi niwann biɛn; a nyi ke n jiɛŋ.” Le Yisa ke, “Li jinn n peei nan na.

¹⁸N beiŋ ibamɔn le, ŋaah nan pɔɔn nin, a ti yee a wan yɔɔr a tɔɔl le ki jo ŋaah ban nan paam; amaa ni ye a por ke a yin tann a nɔɔi le, le uba n ta a wann yɔɔr ki yeeŋ ki taaŋ jo ŋaah kaa ban a jo nan paam.”

¹⁹Yisa nan len man ki wɔɔn nkum man a bol wee Piita yin kpo wee ki ta kupag sei Uwonbɔr nle. Le ki bei u ke, “Li nɔɔm ni!”

²⁰Le Piita gbiɛ lig ki miin ubɔɔnɔɔr wan wee Yisa jiɛ-n nɔɔ bi le. (U ma nan ye baah nan ka ji kujɔɔg a jiir wee wan nan ka den Yisa ki nan baan u ke, “Uyudaan ŋma yin nya a bɔɔn naa nin?”)

²¹Piita kaah kan win, le u baan u ke, “Uyudaan, ke u ma?”

²²Le Yisa jiin u ke, “Ni ye n ban u li be nin u miɛfol ki nan kpaa n-yonn man wee n li jirin ke, ni ye ba ki sei ŋaa? Ni kpaa le nin a nɔɔm.”

²³Ni niɛ nan bu, le tibɔr nan mɔɔn u bɔɔnɔɔbin a sisiigin ke ubɔɔnɔɔr uniɛ ma kaa yin kpo. Amaa Yisa kaa ke waa yin kpo; u len le ke, “Ni ye n ban u li be nin u miɛfol ki nan kpaa lidaal lan wee n na li jirin ke, ni ye ba ki sei ŋaa?”

²⁴Ubɔɔnɔɔr nmɔn le jin tiwann nan a siɛra le ki sɔb ni bil. Ti nyi ke u siɛra nmɔn ye ibamɔn le.

²⁵Daandaan nan, Yisa ji nan tun tiwann takpem tibama, ni ye ni biɛn bi sɔb dɔ ke, n tiɛr ke hali dulinya munl nan kaa bi li kan npaan man wee bi li ta tigbann tan wee bin sɔb nan ŋa.