Read Konkomba Jɔnn 3 Bible Online

Jɔnn 3 - Konkomba bible

Jɔnn 3

¹Uja uba le nan be ki ye Farasii a ninfou le u yinl ye Nikodimosi, u nan ye Juu yaab a yudam a laguŋ a ni uba le.

²Daal liba a nyiɛg le u nan dan Yisa ban le ki nan ke, “Rabbi, ti nyi ke a ye wan wɔɔnn le ki nyann Uwonbɔr ban. Nan bu-n uba kaa li fir ŋa ligaril a siɛram yan wee a ŋaan nan wee naa ye Uwonbɔr le be u ban ni.”

³Le Yisa jiin ki bei u ke, “N beiŋ ibamɔn le, uba kaa li fir kan Uwonbɔr a naami, see ke bi ji ma u.[2]”

⁴Le Nikodimosi baan u ke, “Bi yin ŋa nii ki ji maa uninkpelaa? Ibamɔn waah ji li fir jir kɔɔ u na a poolin wee bin ji maa wi!”

⁵Le Yisa jiin ke, “N beiŋ ibamɔn le, uba kaa li fir kɔɔ Uwonbɔr a naamin ni, see ke bi ma u nin nnyum nin Kasi a naaŋin.

⁶Tigbanann le maa tigbanann, amaa le Kasi a naaŋ mu maa kinaaŋ.

⁷Laa che nin gariŋ nin maah len ke, ‘Ni kpaa le ke bi maa ni jigin nni.’

⁸Kutafaag daar chaa kaah ban nan paam le. A gbir ki fur le, amaa ŋaa li fir biɛ kaah nyan nan paam bee kaah chaa nan paami. Man le ye ni ki sei ban biɛn wee bi maa bi Kinaaŋin ni.”

⁹Le Nikodimosi baan ke, “Ni li fir ŋaa nan naa?”

¹⁰Le Yisa ke, “A ye Iziral yaab a wan wɔɔnn le, le ŋaa biɛ ni nan naa?

¹¹N beiŋ ibamɔn le, ti pag taah nyi nan le, le ki ji siɛra taah nan kan nan bu, amaa ni ma biɛn nan yɔli naa ŋa ti siɛra nmɔn yada.

¹²N pag nan ŋaan dulinya nan yaan le ki seiŋ le ŋaa ŋa yada; ni ye n nin pag nan ŋaan papaab ke a yin ŋa nii ki ŋa yadaa?

¹³Uba kaa be ki nyi don paabi, sei uninfosaal a bija wan nan nyann paabin.

¹⁴Moziz kaah nan yuur liwaalabil paab kukunkɔɔgin man nin, ni kpaa le nin bi nan yuur uninfosaal a bija mu paab,

¹⁵wee wan biɛn ŋa u yada ke u li kan limiɛfol lan kaa jɔɔ ndiɛmi.

¹⁶Mambu Uwonbɔr kaah jiɛ dulinya nan kagin bu le u ta u bija gaŋ sei ti, ke wan ŋa u yada ke waa li kpo, amaa u li kan limiɛfol lan kaa jɔɔ ndiɛmi.

¹⁷Uwonbɔr kaa nan tunn u bija dulinya nan yaan ke un nan bii dulinya le, amaa u bu le dulinya yaab li kan feegab.

¹⁸Waa yin bii wan biɛn ŋaa u yada, amaa wan biɛn kaa ŋaa yada pii si nbiimin le nan bu-n waa ŋa Uwonbɔr a Bija gaŋin yada.

¹⁹Ni nan le ye Uwonbɔr kaah len man: Nwonween dan dulinya nan yaan na, amaa bininfob jiɛ libunbɔnl le ki jon nwonween, nan bu-n bi toon biɛn nan ye tibir le.

²⁰Wan biɛn tun tibir a toon ke u nan nwonween le, le kaa yin dan nwonween nin ni ki san ke u bir li nya npaan nin bu.

²¹Amaa wan biɛn be nin ibamɔn nin ke u chaan nwonween nin le, wee bin kan npaan nin ke waah ŋa man nin u ŋa Uwonbɔr a pɔɔm bu le.

²²Ni bɔɔn bu, le Yisa nin u bɔɔnɔɔb nan jon Judiya a tiŋ paamin, nan yaan wee bi la nan tan be nin bi, ki fu bininfob Uwonbɔr a nyunful.

²³Jɔnn tɔɔl nan fu bininfob Uwonbɔr a nyunful le Anon kan mal Salim a tiŋin, nan bu-n nnyum takpem le nan be niin, le bininfob nan ti chaan u ban le u fu bi Uwonbɔr a nyunful.

²⁴(Ni nan ŋa keh Jɔnn kaa la kɔɔ kuloondiigin ni.)

²⁵Limɔkpel le nan dan Jɔnn a bɔɔnɔɔb biba nin Juu a ninfo uba a sisiigin ki ta jiin liwonjiɛnl a kaal a ŋunnim paam.

²⁶Le bi nan dan Jɔnn ban ki nan bei u ke, “Wan wɔɔn, uja wan nan be a ban Jɔdann a kpendoolin, wan a siɛra wee a nan jin nin, lig u nin fu bininfob le Uwonbɔr a nyunful, le bininfob biɛn chaa u ban.”

²⁷Le Jɔnn jiin ki len ke, “Uninfo le li fir gaa nan nyan paab ki tenn u le.

²⁸Nim baantɔɔl le fir ji siɛra ke n nan len ke, ‘Maa ye Masiya-n ni, amaa Uwonbɔr nan chinn tun min le, le u nin ŋɔɔrin.’

²⁹Lipiichanil daan li ye upii wan wee bi chann ni. Lipiichanil daan a jɔ wan dan u ban nin si guu u le ki sin pelig, le ki nan gbir Lipiichanil daan a kukɔl ke u pool nsɔŋ. Nposɔɔn nmɔn ye n yaan le, mambu n gbee nin nposɔɔn na.

³⁰Ni kpaa le ke u yinl ndon; ki kpaa le ke n mu a yinl njiir.

³¹“Wan nyann paabin le jon ni biɛn; wan nyann tumin ye tum yaau le, le ki pag ke wan nyann tumin. Wan nyann paabin le jon ni biɛn.

³²U jin waah nan kan nan ki gbir nan a siɛra le, amaa uba kaa gaa u siɛra nmɔn ni.

³³Uja wan nan gaa siɛra-n u chee ke Uwonbɔr ye ubamɔndaan le.

³⁴Nan bu-n wan wee Uwonbɔr nan tun nin pag Uwonbɔr a mɔbonl le, nan bu-n Uwonbɔr gbeen u Kinaaŋ le.

³⁵Baa-n kaah jiɛ Bija-n bu le u ta niwann biɛn ki ŋa u nɔɔn.

³⁶Wan le ŋa Bija-n yada ke u li kan limiɛfol lan kaa jɔɔ diɛm, amaa wan yii Bija-n ke waa li kan limiɛfoli, nan bu-n Uwonbɔr a ŋuufiiŋ yin gbaa be udaan bu le.”