Read Konkomba Jɔnn 4 Bible Online

Jɔnn 4 - Konkomba bible

Jɔnn 4

¹Farasii a ninfob nan gbir ke Yisa nan ga bɔɔnɔɔb le ki jon Jɔnn le ki fu bi Uwonbɔr a nyunful,

²ni mu kaa nan ye Yisa le sin nan fu bi, amaa u bɔɔnɔɔb le nan fu bi.

³Uyudaan kaah nan gbir baah pag man u bu-n, le u fii Judiya le ki ji jir Galilii.

⁵Mambu u nan nan fo Samariya a tiŋ kiba bi yi ki ke Saikar, ki nan mal kukpakpiig kan wee ti yaaja Jekɔb nan ta sei u bija Josef nle.

⁶Jekɔb a nyunbuŋ nan be niin, le Yisa kaah nan nyan lisanchonl ki bagin, le u nan kal ki mal kinyunbuŋ nmɔn. Ni nan ye nween a kur piig nin tilee le.

⁷Samariya a pii win kaah nan dan u nan luun nnyumin, le Yisa nan bei u ke, “Ŋaa li seim nnyunyukaamaa?”

⁸(Ki miin u bɔɔnɔɔbin nan jon kitiŋ poolin bin tan da tijiira.)

⁹Le Samariya a pii win bei u ke, “A ye Juu a ninfou le n ye Samariya a piiu. Ni ŋa nii a miɛm nnyumaa?” (Nan bu-n Juu yaab nin Samariya yaab kaa lagin tabi.)

¹⁰Le Yisa jiin u ke, “Ni ye ke a nyi Uwonbɔr a piin nin wan miɛŋ nnyunyukaam nan ke, a bi li baan u le u bin seiŋ limiɛfol a nyum.”

¹¹Le upii-n baan u ke, “Uninkpel, ŋaa jɔɔ nan li gbil nnyumi, le kinyunbuŋ nan mu nyɔɔ le. A yin kan limiɛfol a nyum nmɔn laa?

¹²A yab jon ti baa Jekɔb, wan nan sei ti kinyunbuŋ nan wee ubaantɔɔl nin u naachim nin u wankor nan nyu niin ni waa?”

¹³Le Yisa jiin ke, “Wan biɛn nyun nnyum nan ke nnyunyum ji li choo u,

¹⁴amaa wan biɛn nyun nnyum man wee n tenn win ke nnyunyum kaa ji li choo wi. Ibamɔn, nnyum man wee n tenn win yin kpann nnyunbunkaam le ki bun u poolin ki sei u limiɛfol lan kaa jɔɔ diɛmi.”

¹⁵Le upii-n bei u ke, “Uninkpel, seim nnyum nmɔn ni wee nnyunyum laa ji jɔɔm wee n gbaa chaan do ki nan lu nnyumi.”

¹⁶Le u bei upii-n ke, “Li chaau, tan yin a chal wee fin nin uma ndan.”

¹⁷Le u jiin ke, “Maa jɔɔ chali.” Le Yisa bei u ke, “A jɔɔ ibamɔn nin ŋaah ke ŋaa jɔɔ chali.

¹⁸Ŋaah beim man nin ye ibamɔn le, a pii nan kan chiɛb biŋmu-u, le uja wan wee fin nin uma nin be-n kaa ye a chali. Ŋaah le len man nin ye ibamɔn le.”

¹⁹Le upii-n ke, “Uninkpel, n kan ke a ye ulinlenn le.

²⁰Ti baam nan jiɛn Uwonbɔr lijɔɔl nan a paab le, amaa nim Juu yaab len ke ni kpaa le nin ti li jiɛn U Jerusalam.”

²¹Le Yisa pag npaan ni ke, “Ŋa maah len man nin yadau, upii, n-yonn chaan le naa nan yin jiɛn Baa-n lijɔɔl nan a paab bee Jerusalami.

²²Nim Samariya yaab jiɛn nan wee naa nyi le; tim jiɛn nan wee ti nyi le, nan bu-n feegab nyann Juu yaabin le.

²³Ni ma biɛn nan n-yonn chaan le ki pii foon na le ban ye ibamɔn a wonjiɛmin li jiɛn Baa-n kinaaŋin nin ibamɔn nin, nan bu-n bi ma ye biwonjiɛm ban wee Baa-n ban.

²⁴Uwonbɔr ye kinaaŋ le, le ni kpaa le ban jiɛn Win li jiɛn U kinaaŋin nin ibamɔn.”

²⁵Le upii-n ke, “N nyi ke Masiya nmɔn chaan. U nan dan ke, u li mann pag ni biɛn ki wɔɔn ti.”

²⁶Tɔ le Yisa pag npaan ni ke, “Min wan pag tenniŋ nan li ye u.”

²⁷Libol nmɔn yaan le u bɔɔnɔɔb nan nyan kitiŋ poolin ki jirin ki nan kan u ma nin upii kaah be pag le ni gar bi. Amaa uba kaa nan baan ke, “A ban baa?” bee “Ba ŋa wee fin nin u ma pagaa?”

²⁸Le upii-n jiɛn u nyunbool le ki jir kitiŋ poolin ki tan bei bininfob ke;

²⁹“Dan man, ki nan lig uja wan beim niwann nan biɛn wee n nan nyi ŋa. Ni li fir ye Masiya nnaa?”

³⁰Le bi nan nyan kitiŋin a poolin ki chaan u ban.

³¹Ki miin u bɔɔnɔɔbin gbeer u le ki ke, “Wan wɔɔn, jim nibau.”

³²Amaa le u bei bi ke, “N jɔɔ tijiir tan n yin ji ke naa nyi ti bu.”

³³Le u bɔɔnɔɔbin nin baan tab, “Ke uba li ta tijiir ki nan sei u bee?”

³⁴Le Yisa len ke, “N yaa jiir ye n tun wan nan tunim kaah ban man le ki sin diɛ itoon yan wee u seim ke n tun nin.

³⁵Libɔŋal kaa ke, ‘Iŋmal ina li gur nin lidichiɛlaa’? N bei ni le, ni ligir ni numa wee ki lig tikpaann ni! Idi beer ki foo nchiɛma.

³⁶Hali nin daandaan nan udichiɛrin gaan u yɔr le, hali daandaan nan u chiɛ idi-n nin limiɛfol lan kaa jɔɔ diɛm bu le, wee nin che wan bu tiburin nin wan chiɛ idi-n nlagin kan nmɔn.

³⁷Mambu bininkpeeb kaah ke, ‘Uba bu le utɔ chiɛ-n,’ ni ye ibamɔn le.

³⁸N tuŋ a tan chiɛ idi yan wee ŋaa kon a baantɔɔl le. Biba li nan tun itoon pɔɔr, le fin nan jin bi tuntoŋin a nyɔɔr.”

³⁹Samariya yaab takpem ban nan nyan kitiŋ nmɔn yaan nan ŋaa Yisa yada upii-n a siɛra bu, waah len ke, “U beim niwann biɛn nan wee n nan nyi ŋa.”

⁴⁰Mambu Samariya yaab kaah nan dan u ban nin, le bi balin u ke un paar ki li be bi ban, le u nan be bi ban iweehn ilee.

⁴¹Le u mɔboi bu bi takpem nan ŋa biwonjiɛm.

⁴²Le bi bei upii-n ke, “Naa ye ŋaah len man nin a binba bu le ti ŋa yada; daandaan nan ti baantɔɔl gbira, le ki nyi ke uja nan sin ye dulinya nan a Feeru le.”

⁴³Iweehn ilee daal a bɔɔn le u fii niin ki jon Galilii.

⁴⁴(Yisa baantɔɔl pii nan wɔɔn npaan nin ke ulinlenn kaa jɔɔ jilima u baantɔɔl a tiŋin ni.)

⁴⁵Waah nan foo Galilii n, le Galilii yaab nan gaa u kuchɔŋ. Bi nan kan nan biɛn wee u nan ŋa Jerusalam yuglagir a chiigin yaan na, nan bu-n bi baantɔɔl nan be niin.

⁴⁶U ji nan gɔɔn Kena kan be Galilii n ki kpiɛ, nan yaan wee u nan chinn taa nnyum ki kpann ndaamin. Le Kapeniɛm a bɔrniin a gbansɔbiru uba a bija dɔ bun.

⁴⁷Uja nan kaah nan gbir ke Yisa pii nan nyann Judiya ki foon Galilii n, le u jon u ban ki tan balin u ke un dan ki nan teb u bija wan nan mal nkumin.

⁴⁸Le Yisa bei u ke, “Naa ye ni nan kan ligaril a siɛram nin ijenjee a toon ke, naa jɔɔ ni ŋa yada.”

⁴⁹Le ibɔrniin a gbansɔbir win ke, “Uninkpel, jiirin[3] weem, ke naa ye man ke n bija nmɔn li kpo.”

⁵⁰Le Yisa jiin ke, “A ban ke a li chaau. A bija nmɔn li pɔɔg.” Le uja-n ŋa Yisa kaah pag man nin yada le ki fɔɔr u ban.

⁵¹Waah la nan be nsan bu-n, le u toontunnu too u le ki bei u ke u bija-n pɔɔga.

⁵²Waah nan baan n-yonn man wee u bija-n nan pɔɔgin, le bi bei u ke, “Kugbanantuntoŋ nmɔn won jaa u nweehn a kurug kuba le.”

⁵³Tɔ le baa-n biɛ ke n-yonn nmɔn totob li yen, man wee Yisa won bei u ke, “A bija-n li pɔɔgin.” Mambu le u ma nin u niin yaab biɛn nan ŋa Yisa yada.

⁵⁴Ni ma ye ligaril a siɛra lan kpiɛ milee wee Yisa nan ŋa, waah nan nyann Judiya ki jon Galilii n.