Read Konkomba Jɔnn 5 Bible Online

Jɔnn 5 - Konkomba bible

Jɔnn 5

¹N-yonn nba a bɔɔn, le Yisa nan jon don Jerusalam ke un tan ji Juu yaab a chiig.

²Tɔ le Jerusalam a poolin kubiɛŋ nan be ki mal ntimansanmɔnn man wee bi yi ki ke Ipee a Timansanmɔmin, kubiɛŋ kan wee Juu yaab a leen Aramayig bi yi ki ke Befesida wee ki jɔɔ nnaadam miŋmu man jin kubiɛŋin ki too-n.

³Doo le kuninfogbaluŋ ban ye bibaarib nan ti dɔɔ, bijɔɔm, ndiɛm nin nwɔbim.

⁴[4] N-yonn nba ke, Uyudaan a malaka jiirin le ki nan gbir nnyumin. Le wan chinn jiir nnyum n-yaan ke u li kan waah bu iwiɛn yan biɛn nin a tebug.

⁵Ubaar wan nan be niin ni nan ŋa ibin piita nin iniin kaa fir choon ni.

⁶Yisa kaah nan kan u dɔ niin wee ki sin gbir ke u binbem nmɔn yuurin, le u baan u ke, “A ban a kan kutebugaa?”

⁷Le ubaarin jiin ke, “Uninkpel, nnyum nan nan dam dam ke maa jɔɔ wan li terim wee n jiiri. N gbaar n jiir ke uba chinn jiirim le.”

⁸Tɔ le Yisa bei u ke, “Fii paaba! Yuur a wandɔɔnwaŋ ki li choon na.”

⁹Libonl nmɔn le uja-n nan kan kutebug; le ki yuur u wandɔɔnwaŋ le ki nan choon. Lidaal lan wee man nmɔn nan ŋa-n nan ye likpakɔɔl daal le,

¹⁰mambu le Juu yaabin nan bei uja wan nan kan kutebugin ke, “Ni ye likpakɔɔl daal le; nsiimin kaa chee nin a tu a wandɔɔnwaŋin.”

¹¹Amaa le u jiin ke, “Uja wan che n pɔɔgin beim ke, ‘Yuur a wandɔɔnwaŋ ki li choon na.’ ”

¹²Mambu le bi baan u ke, “Udaan ye ŋmiɛ wee ki beiŋ ke a taa a wandɔɔnwaŋ ki li choon naa?”

¹³Uja wan nan kan kutebugin kaa nan nyi wan ye wi, nan bu-n Yisa nan ŋmarin kubabug nmɔn yan ki bora.

¹⁴Lidaal nmɔn a bɔɔn le Yisa nan ban kan u iwonjiɛn niin le ki bei u ke, “Lig, a pɔɔga. Jiɛn tibir a tuma, naa ye man ke nan bir jon man li fir kaŋ.”

¹⁵Le uja-n nan fɔr niin le ki nan tan bei Juu yaab ke Yisa li nan che u kan kutebug.

¹⁶Yisa kaah nan teb uja-n likpakɔɔl daalin bu, le Juu yaab nan piin ki mugir u.

¹⁷Le Yisa bei bi ke, “N baa le tun U toon le ki nan kpaa dinan, le n mu, tɔɔl, tun le.”

¹⁸Yisa kaah nan len man nin bu le Juu yaab nan walin npɔɔn bu ke bin ku u; baa nan yin ku u ke waah bii likpakɔɔl daal a siimin a binba bu, amaa ke u le ji yi Uwonbɔr le ke u Baa, ki ke uma nin Uwonbɔr kpaa le.

¹⁹Le Yisa nan jiin ki bei bi ke, “N bei ni ibamɔn le, Bija-n kaa li fir ŋa niba u baantɔɔli, u li fir ŋa nan wee u kan u Baa-n ŋaan le, nan bu-n niwann nan biɛn wee Baa-n ŋaan nin Bija-n mu ŋaan ni ma le.

²⁰Baa-n kaah jiɛ Bija-n bu le u wɔɔn u nan biɛn u ŋaan. Nn, u li wɔɔn u niwann nan jon man hali ke nin gar ni.

²¹Nan bu-n Baa-n kaah le fiin ban kpo nkumin ki tenn bi limiɛfol man nin, man le Bija-n mu tenn ban wee u num gbee limiɛfol.

²²Nan kpiɛ ye le ke, Baa-n kaa ji uba tibɔri, amaa le ki ta libɔjil ki ŋubin Bija-n a nɔɔn,

²³ke bininfob biɛn li tenn Bija-n jilima ke baah tenn Baa-n jilima nan nin. Wan kaa sei Bija-n jilima ke waa sei Baa wan nan tun win, jilima.

²⁴“N bei ni ibamɔn le, wan biɛn gbir n mɔleen wee ki ŋa Uwonbɔr wan nan tumin yada li kan limiɛfol lan kaa jɔɔ diɛm wee kaa li kpo; u lagir nkum bu ki kan limiɛfola.

²⁵N bei ni ibamɔn le, n-yonn chaan le n-yonn nmɔn pii foon na le ban kpo li gbir Bija-n a kukɔl le ban gbir waah len man nin li kan limiɛfol.

²⁶Ke Baa-n kaah jɔɔ limiɛfol u baantɔɔl man nin, man le u sei Bija-n npɔɔn ke u mu li jɔɔ limiɛfol u baantɔɔla.

²⁷Le u sei u tininkper a pɔɔm ke u li ji tibɔra nan bu-n u ye Uninfosaal a Bija le.

²⁸“Ni laa che nin ŋa ni ligarili, ke n-yonn chaan le ban biɛn be bi kaarin li gbir u kukɔl

²⁹le ki nyann, ban ŋa nan ŋan li fii nin limiɛfol, le ban ŋa titoonbir li fii ki kpo.

³⁰“N binba kaa li fir ŋa niba; n ji tibɔr maah gbir man le, le n bɔjil ye ibamɔn le, nan bu-n maa ŋaan n wiib kaah ban man ni, amaa n ŋaan wan nan tumin kaah ban n ŋa man le.

³¹“Ni ye ke n jin n baantɔɔl a siɛra ke, uba kaa li chee ke n bɔr nmɔn ye ibamɔn ni.

³²Uba li be kpiɛ le ki ji siɛra maah ban man, le n nyi ke u siɛra jil ki jiin n paam ye ibamɔn le.

³³Ni nan tun ki tan baan Jɔnn na, le u nan jin n siɛra ibamɔn bu.

³⁴Naa ye ke n gaan uninfosaal a siɛra le; amaa n pag Jɔnn a siɛra le wee ni kan feegab.

³⁵Jɔnn le nan ye fila kan gaan ki sei ni nwonween, le ni nan gann n-yonn nba ki ji nwonween nmɔn a mɔm.

³⁶N jɔɔ n baantɔɔl a siɛra jil ke ki kpiɛg ki jon Jɔnn kaah jin n siɛrau. Nan bu-n, litoonl lan wee Baa-n ta seim ke n tun diɛ-n, le n be tun nin, le jin siɛra ke Baa-n li nan tunim.

³⁷Le Baa wan nan tunimin baantɔɔl nan jin siɛra n buu. Naa la nyi gbir u kukɔl bee ki kan u nunaŋi,

³⁸le u mɔleen mu kaa kɔɔ ni sufu ni, nan bu-n naa ŋa wan u nan tun nin yada.

³⁹Ni tinn Uwonbɔr a gbɔŋin le linunmanl ki tiɛr ke nsɔbimin bu ni li kan limiɛfol lan kaa jɔɔ diɛmi. Nsɔbim nan mu li wɔɔn siɛra maah ye wan,

⁴⁰amaa nin ni ma biɛn yɔli, ni yii le ke naa yin dan n ban ki nan kan limiɛfoli.

⁴¹“Maa ban kupag bininfob ban ni,

⁴²amaa n nyi naah ye lininfobol lan. N nyi ke naa jiɛ Uwonbɔr ni sufu ni.

⁴³N ta n Baa a yinl le ki dan, le naa gaami; amaa ni ye ke uba ma ta u tɔɔl a yinl ki dan ke, ni li gaa u.

⁴⁴Ni ye ke ni ban tab a pagim ke, ni yin ŋa niin ki ŋa yadaa, wee kaa sin pɔɔg ni ba ke ni kan kupag kan nyan Uwonbɔr uba-n ban naa?

⁴⁵“Amaa ni laa tiɛr ke n li galin ni Baa-n a nintogili. Wan galin ni ye Moziz, wan bu wee ni tama be-n le.

⁴⁶Ni ye ni nan bi ŋa Moziz yada ke, ni bi li ŋaam yada, nan bu-n u nan sɔb n bɔra.

⁴⁷Amaa naah kaa nan ŋa waah nan sɔb nan ni yada-n, ni yin ŋa nii ki ŋa maah len man nan yadaa?”