Read Konkomba Jɔnn 8 Bible Online

Jɔnn 8 - Konkomba bible

Jɔnn 8

²Kutaayɔg paam le u ji nan kpiir uba iwonjiɛn niin a loob, niin le bininfob biɛn nan lagin ki ka jin u, le u nan kal ke un wɔɔn bi.

³Ban wɔɔn nsiimin nin Farasii nan ŋmagin upii wan wee bi nan choo u iwanchɔgin toon nin ni. Bi nan che u sir kulaguŋin a nintogil le,

⁴le bi bei Yisa ke, “Wan wɔɔn, bi choo upii nan le u be tun iwanchɔgin toon.

⁵Nsiim a poolin Moziz nan pag sei ti ke ti gab li yaa piibol itangbaga. Daandaan nan a ke niin?”

⁶Bi nan ta nbinbaan nan ŋa kupeŋ le, baah li ta niwann nan ki galin u. Amaa le Yisa nan bɔɔn tum le ki nan piin ki jɔɔ u nɔɔbili ki sɔb tum.

⁷Baah nan gbaa baan win, le u yaar paab le ki bei bi ke, “Ni ye ke ni ni uba be kaa jɔɔ tibir ke, udaan nchinn gab upii nmɔn litangbagila.”

⁸Le u ji nan bɔɔn ki sɔb bil tum.

⁹Waah nan len man nin, le ban nan gbirin piin ki fɔr uba ba, ban nan ye bininkpeebin le nan piin ki fɔr, hali ki nan jiɛn Yisa nin upii-n a binba nin paar si niin.

¹⁰Le Yisa yaar u yul paab le ki baan ke, “Upii, bi be laa? Uba kaa ji gur un bii ŋaa?”

¹¹Le upii-n ke, “Uyudaan, uba kaa ji bii mi.” Le Yisa nyan pag npaan ni ke, “Tɔ man ke n tɔɔl kaa bii ŋi, li chaa daandaan nan na wee ki jiɛn tibir a binbema.”

¹²Yisa kaah ji nan pag sei bininfobin, u nan ke, “Min le ye dulinya nan a wonweem. Wan biɛn nɔɔm kaa li nyi chonn libunbɔnlin ni, amaa u li jɔɔ nwonween man tenn limiɛfol.”

¹³Le Farasii yaab faa u limɔkpel ki ke, “Fin sɔ, le ki ji a baantɔɔl a siɛra, a siɛra jil nmɔn kaa ye ibamɔn ni.”

¹⁴Le Yisa len ke, “Hali ni ye ke n ji n baantɔɔl a siɛra ke, n siɛra jil nmɔn ye ibamɔn le, nan bu-n n nyi maah nyan nan yaan ki ji nyi maah chaa nan yaan. Amaa nim kaa biɛ maah nyan nan yaan bee maah chaa nan yaan ni.

¹⁵Ni ji tigbanann a bɔjil le; min kaa ji uba tibɔri.

¹⁶Amaa N jin tibɔr ke, maah len man nin ye ibamɔn le, nan bu-n maa be n binba. N si Baa, wan nan tumin ban le.

¹⁷Ni tɔɔl a siim a poolin ni sɔb le ki wɔɔn ke bijab bilee nan jin siɛra niwann bu ke ni ye ibamɔn le.

¹⁸N ye wan jin n baantɔɔl a siɛra-n le, n siɛra jir wan gurin yin ye n Baa, wan nan tunim le.”

¹⁹Tɔ le bi baan u ke, “A Baa be laa?” Le Yisa jiin ke, “Naa nyi min bee N Baa, ni bi nyi min ke, ni bi li nyi n Baa mu.”

²⁰U nan pag imɔbon nan le ki wɔɔn bininfob waah nan be iwonjiɛn niin a nan paam mal baah nan ta kumanug adaka siin nan yaan nin. Amaa uba kaa nan choo wi, nan bu-n u yonni kaa la nan fo.

²¹Le Yisa ji bei bi taaliba ki kpiɛ ke, “N yin fɔr le, ni na li ban n bol, ni na li kpo ni bir bu. Maah yin jo nan yaan nin, naa li fir dan niin ni.”

²²Ni ma li nan che Juu yaabin baan tab ke, “U yin ku u ba lee? Ni ma bu le u len ke, ‘Maah yin jo nan yaan nin, naa li fir dan niin ni’ naa?”

²³Amaa le u ji tugir ki len ke, “Ni nyan tum nan yaan le; min nyan paab le. Ni ye dulinya nan yaab le; min kaa ye dulinya nan yaa wi.

²⁴N bei ni ke ni li kpo ni birin; ni ye ke naa ŋa yada ke min li ye maah ke n ye wan nin ke, ni le sin yin kpo ni birin le.”

²⁵Le bi baan ke, “A ye ŋmiɛ?” Le Yisa jiin ke, “Maah lee nan ke n ye wan npiinimin nin.

²⁶Maah yin pag man ni bɔjilin yab takpema. Amaa maa yin pag n tɔɔl a bami sei ke wan nan tumin a bam, le maah gbir man u ban nin le n bei dulinya.

²⁷Baa nan biɛ ke u nan bei bi u Baa a bɔr le.

²⁸Mambu le Yisa nan len ke, “Ni nan yuur Usaal a Big paab ke, tɔ ni li biɛ ke min le ye wan wee n ke n ye-n, le maa ŋaan niba n baantɔɔli amaa n le pag Baa-n kaah nan wɔɔnim man le.

²⁹Wan nan tunimin be n ban; waa jaam n binba, nan bu-n n gbaa ŋaan nan gbee u num le.”

³⁰Hali waah nan pagin, binib takpem ta bi yada ki ŋa u ni.

³¹Le Yisa nan bei Juu yaab ban nan ŋa u yada-n ke, “Ni ye ke ni ŋmag maah wɔɔn man nin ke, ni sin ye n bɔɔnɔɔb le.

³²Ni li biɛ ibamɔn kaah ye nan, le ibamɔn nmɔn li che ni kan feegab.”

³³Le bi jiin u ke, “Ti ye Abiraham a yaabili le, ti mu kaa nyi ŋa uba a yomu wi. Ba ŋa a len ke ti li kan feegabaa?”

³⁴Le Yisa jiin ke, “N bei ni ibamɔn le, wan biɛn ŋa tibir ye tibir a yomu le.

³⁵Uyom kaa jɔɔ nan yaan wee u gbaa be iniin a poolin ni, amaa kiniinbijag ma ye iniin yaau le ki gbaa chaa.

³⁶Mambu ni ye ke Bija-n sei ni feegab ke, ni yin kan feegab le ibamɔn.

³⁷N nyi ke ni ye Abiraham a yaabili le. Ni ma biɛn yɔli ni ŋa sili ni kum le, nan bu-n maah wɔɔn nan nin kaa kɔɔ ni tubomin ni.

³⁸N bei ni maah nan kan man le Baa-n a nintogil, le nim ŋaan naah gbir nan ni baa ban.”

³⁹Le bi len ke, “Abiraham le ye ti baa.” Le Yisa len ke, “Ni bi ye Abiraham a buwaab ke, ni bi li ŋa Abiraham kaah nan ŋaan man ni.

⁴⁰A li ke naah ye man nin, ni gbaar le ni kum, uja wan bei ni ibamɔn yan wee n gbir Uwonbɔr ban nin. Abiraham kaa nan ŋaan man ni.

⁴¹Ni ŋaan nan wee ni tɔɔl a baa ŋaan le.” Le bi yii u mɔboi nmɔn ki ke, “Taa ye njagɔɔrbumi, taah jɔɔ Baa wan nin ye Uwonbɔr baantɔɔl le.”

⁴²Le Yisa bei bi ke, “Ni ye Uwonbɔr le ye ni Baa ke, ni bi li jiɛm, nan bu-n n nyann Uwonbɔr ban le ki be do daandaan nan. Maa dan n baantɔɔl a pɔɔmin ni; amaa u ma nan tum.

⁴³Ni ŋa wee naa biɛr n mɔboi yaa? Nan bu-n naa gbir maah len man ni.

⁴⁴Ni ye ni baa, ulinlaril, a buwaab le, ki ban ni li ŋaan ni baa kaah ban man. U pii nan ye uninfokur le npiinimin, kaa ŋmag ibamɔn ni, nan bu-n ibamɔn kaa be u ban ni. U nan por tibɔkar ke, u pag u bol a leen le, nan bu-n u ye tibɔkar daan le ki ji ye tibɔkar a baa.

⁴⁵Ni ma biɛn yɔli, maah bei ni ibamɔn nin bu, naa ŋaam yada!

⁴⁶Ni ŋma li fir nyan wɔɔn ke n jɔɔ tibiraa? Ni ye ke n len ibamɔn ke, ba ŋaa naa ŋaam yadaa?

⁴⁷Wan ye Uwonbɔr yaau gbir Uwonbɔr kaah len man le. Nan bu wee naa gbirin ye le ke naa ye Uwonbɔr yaabi.

⁴⁸Le Juu yaab jiin u ke, “Taa jɔɔ ibamɔn nin taah ke a ye Samariya a ninfo le ki jɔɔ kinaanbiigaa?”

⁴⁹Le Yisa ke, “Maa jɔɔ kinaanbiigi, amaa n tenn n Baa le jilima le nim kaa tenn min jilima.

⁵⁰Maa gbaar ban n tɔɔl a pagi, amaa uba li be ki ban ki, u ma ye ubɔjir.

⁵¹N bei ni ibamɔn le, ni ye ke wan biɛn ŋmag maah wɔɔn man ni ke, waa li nyi kpo.”

⁵²Ni nan bu le Juu yaab nan waag ki ke, “Daandaan nan ti biɛ ke a jɔɔ kinaanbiig! Abiraham nan kpou nin bilinlem tɔɔla, amaa a ke wan biɛn ŋmag ŋaah wɔɔn man nin ke waa li nyi kan nkumi.

⁵³A yaab jon ti baa Abiraham waa? U nan kpou, le bilinlemin mu nan kpou. A tiɛr ke a ye ŋmiɛ?

⁵⁴Le Yisa jiin ke, “Ni ye n pag n ba ke, n pag nmɔn ye yɔli le. N Baa, wan wee ni ke u ye ni Wonbɔr win, u ma ye wan pagirim.

⁵⁵Hali naah kaa le nyi win, min nyi u. Ni ye n ke maa nyi u ke, n li ŋa tibɔkardaan ke nimin, amaa n nyi u le ki ŋmag u mɔleen.

⁵⁶Ni nan mɔ ni baa Abiraham le ke u nan kan n dam dulinya nan yaan; u nan kan na le u pool sɔŋ.”

⁵⁷Le Juu yaab bei u ke, “Ŋaa la fo ibin piŋmu, le a nan kan Abiraham aa!”

⁵⁸Le Yisa jiin ke, “N bei ni ibamɔn le, Abiraham a na kaah nan maa win, ki miin n pii ye le!”

⁵⁹Mambu le bi nan pii itangbag ke bin gab u, amaa le Yisa woon Iwonjiɛn niin a guguubin ban ki nyan.