Read Konkomba Litoonl 1 Bible Online

Litoonl 1 - Konkomba bible

Litoonl 1

¹N ninkpelu Teofilusi, n gbɔŋkpog n-yaan, n nan sɔb nan biɛn wee Yisa nan piin ki tun, nin waah nan wɔɔn man,

²ki nan kpaa lidaal lan wee bi nan nan ta u don paabin, Kasi a Naaŋin kaah nan che u wɔɔn u tooi yan wee u gann nin, le Uwonbɔr nin nan ta u don paab.

³U fala a jim a bɔɔn, le u ta u baa ki wɔɔn bi ki jin siɛra takpem ke u fo. U nan degir bi bu ki be nin bi iweehn pina ki wɔɔn bi Uwonbɔr a naamin a bɔr.

⁴Kulaguŋ kuba ni, le u nan lagin ki ka ji nin bi, le ki nan sei bi limɔsiinl nan: “Ni laa nya Jerusalami, amaa ni li guu ipiin yan wee n baa nan siin limɔsiinl lan wee ni gbir n pag li bɔrin.

⁵Nan bu-n Jɔnn fun ni nnyum le, amaa naa li yuuri ni li gbee nin Kasi a Naaŋ.”

⁶Yisa nin u tooi kaah nan lagin tab n-yonn man nin, le bi baan u ke, “Uyudaan daandaan nan le a yin jiin Iziral yaab a naamin ki sei baa?”.

⁷Le u bei bi ke, “Naa ye ni li nyi n-yonn man bee idaa yan wee n Baa siin ke nin tun man u tɔɔl a ninkper a pɔɔmin ni.

⁸Amaa ni li kan npɔɔn n-yonn man wee Kasi a Naaŋin li jiirin ni bu-n, le ni na li ji n siɛra Jerusalam nin Judiya a timin biɛn nin Samariya nin dulinya nan a logi nan biɛn.”

⁹Waah pag man ki diɛ a bɔɔn, le Uwonbɔr ta u don paab bi numbimin, le kitilangbɔŋ degin u bu le baa ji ga wi.

¹⁰Amaa le bi paar si ki ta bi num kpaa ki lig papaab kitilangbɔŋin waah chaa do man, libol nmɔn ki miin bijab bilee yee tiwanpenn, ki nan sir bi ban.

¹¹Ki baan bi ke, “Nim Galilii yaab, ba ŋa wee ni si ki lig papaab man naa? Yisa wan nyan ni ban ki don paabin, u le ji na yin jirin man le ke naah le kan u wee u don paab man nin.”

¹²Iyaayoo nmɔn le Yisa a tooi yin nan nyan ligungonl lan wee bi yi ke Olif a Siigi a Jɔɔlin a paab ki chaa jir Jerusalam. Nin yaan nin Jerusalam kaa nan foo maal kiba.

¹³Baah foo Jerusalam n-yonn man nin, le bi jon tan kɔɔ iniin yan yaan wee bi ti be-n, i nan ye tidititɔɔr le. Ban nan be nin yaan le ye Piita, Jɔnn, Jemisi nin Anduru; Filib nin Tomasi, Batolomiu nin Matiu; Jemisi wan nan ye Alifiu a bija-n, nin Simɔnn wan wee bi nan yi u ke zealo[1], nin Judasi wan ye Jemisi a bija-n.

¹⁴Bi biɛn nan ti lagin tab le nin bipiib biba nin Yisa a na Meri, nin Yisa a watiib, ki miɛ Uwonbɔr nin potiɛl liba kaa peri.

¹⁵Iyaayoo nmɔn le Piita nan fii sir biwonjiɛm ban nan lagin a sisiigin, (bi na li foo bininfob kobig nin pilee paam)

¹⁶ki len ke, “N nabum, Uwonbɔr a leen yan wee Kasi a Naaŋ nan che Defid pag Judasi a bɔr n-yonn man nan jon nni, ye nin gbeen le. U ma nan liin nsan ki tan wɔɔn le bi choo Yisa.

¹⁷U nan ye ti kpiɛg uba le, ki kpiɛ ti bu itoon nan yaan.”

¹⁸(Judasi a toonbir a ligi yan wee u kan nin, le u ta ki daa bukpaab; nin yaan nmɔn le u ji nan lu le u yul chaan tum, le u pool pɔɔ le u niɛr biɛn nyan.

¹⁹Jerusalam yaab biɛn nan gbir tibɔr nmɔn na, le ki yin bukpaab nmɔn bi leen yin ke, Akelidama, ni taai le ye, Ncham a Kpaab.)

²⁰Ke Piita kaah nan len man ni, “Ke ni sɔb Ilan a gbɔŋin ke, ‘Che u niin n sir kulangboŋ; wee uninfo laa kɔɔ niin ni.’ Amaa ‘Ni ŋan nin uba nsir u toon tun bol.’

²¹Mambu ni kpaa le nin ti gann uja uba wan be ni ti iyoo yan biɛn wee Uyudaan Yisa nan jɔɔ ti choon nin,

²²naah nan nyan Jɔnn Wan nan Fu Bininfob Uwonbɔr a Nyunfulin ki tan kpaa iyoo yan wee Uwonbɔr nan nan ta Yisa ki don papaab ki sin jiɛn ti-n. U daan le ye wan nan jin Yisa a kum a fiim a siɛra ki kpiɛ ti bu.”

²³Le bi nyan bijab bilee: Josef wan wee bi nan yi u ke Basabasi, (bi ji yi u ma le Jasitusi) nin Matiyasi.

²⁴Le ki miɛ Uwonbɔr ke, “Uyudaan, fin le nyi uninfo biɛn a sufu ni. Wɔɔn ti bininfob bilee nan a sisiigin wan wee a gann,

²⁵wee un ŋa a toom ki gaa a toon yan wee Judasi ta jiɛn ki sin jon tan be nan yaan kpaan nin win.”

²⁶Le bi tɔn inaa, le Matiyasi jin, le bi ta u ki kpiɛ itoon piig nin uba-n bu.