Read Konkomba Litoonl 13 Bible Online

Litoonl 13 - Konkomba bible

Litoonl 13

¹Antiɛg a tiŋin, biwonjiɛm a laguŋ nan jɔɔ bilinlem nin ban wɔɔnn: Bi nan yi bi ke Banabasi nin Simiɛn wan a yinl ji nan ye Naga, nin Lusiɛsi, wan nan nyan Sarene, nin Manann (wan wee bi nan lagin ki wubir nin Galilii a bɔrbig Herɔd) nin Sɔɔl.

²Baah nan be jiɛn Uwonbɔr ki lolig imɔɔŋin, le Kasi a Naaŋ nan bei bi ke, “Ni nyam Banabasi nin Sɔɔl, wee bin tun itoon yan wee N yin bi ke bin tun ni.”

³Le bi lol imɔɔŋ ki miɛ Uwonbɔr, ni bɔɔn bu le bi ta bi nɔɔi paan bi bu, le ki che bi jon.

⁴N-yonn nmɔn le Kasi a Naaŋ nan ta bininfob bilee nmɔn ki nyan nsan bu, le ki che bi jon Selesiya ki tan kɔɔ kuŋaluŋ niin ki jon Saipuru.

⁵Baah nan foo Salami nan, le bi kɔɔ Juu yaab a wonjiɛndirin le ki mɔɔn Uwonbɔr a bɔr ki tenn bi. Jɔnn le nan be bi ban ki ter bi.

⁶Le bi choon ligungonl lan be nnyum a sisiigin nmɔn ki tan foo Pafosi. Nin yaan le bi nan kan unyɔgdaan u ba, u yinl nan ye Bar-Yisa, u nan ye Juu yaab a ninfou le ki mal ke u ye Uwonbɔr a linlenu le,

⁷u nan be ubɔr yudaan ban le, ubɔr nmɔn a yinl nan ye Seregu Pɔɔlu, u nan ye ulandaan le, le ki yin Banabasi nin Sɔɔl ke bin nan pag Uwonbɔr a bɔr wee un gbir.

⁸Amaa le unyɔgdaan nmɔn, wan a yinl ji ye Elimasi, Girig a leen yin nin, nan pɔɔn u ba ke un ŋɔɔr ubɔrin wee un la ŋa yada.

⁹Le Sɔɔl wan a yinl ji ye Pɔɔl nan gbee nin Kasi a Naaŋ, le ki lig unyɔgdaan nin chiim ki ke,

¹⁰“A ye ulinlar a big le, ki ye nan ŋan biɛn a dataag! A gbee nin kularug le iyoo biɛn nin nbiin. A li jiɛn ki laa labir Uyudaan a bamɔn yin ki ŋa ti tibɔkaraa?

¹¹Daandaan nan Uyudaan li dar a tul. U li che a jɔɔn ki nin yuur ke ŋaa la kan nween ni.” Libol nmɔn, le liŋunl nin libunbɔnl jiirin u bu, le u nin choon tulin, ki ban u ba n da u.

¹²Ubɔr uyudaan nin kaah kan nan tun nin, le u ŋa yada, nan bu-n waah nan kan ntinnim man nyan Uyudaan ban nin le ni ŋa u ligaril.

¹³Baah nan nyan Pafosi nan, le Pɔɔl nin u ninɔɔtab kɔɔ kuŋaluŋ ki jon Pega kan be Pamfiliya a tiŋin nin, nin yaan le Jɔnn jiɛn bi ki jir Jerusalam.

¹⁴Le bi nyan Pega, ki jon Antiɛg kan be Pisidiya a tiŋin nin. Le likpakɔɔl daal foo le bi kɔɔ kuwonjiɛndiigin ki ka.

¹⁵Baah karin Moziz a siim nin Uwonbɔr a linlem a sɔbim n-yaan a bɔɔn bu, le kuwonjiɛndiig nmɔn a ninkpeeb bei Pɔɔl nin Banabasi ke, “Ti na a bum, ni ye ke ni jɔɔ tibɔŋann tan wee ni yin pag pɔɔg ti gbanann ke, ni paga.”

¹⁶Le Pɔɔl fii sir ki don u nɔɔ le ki piin pag ke, “Nim Iziral yaab nin nim ban kaa ye Juu yaab ki jiɛn Uwonbɔr nan, ni pelim man!

¹⁷Iziral yaab, a Wonbɔru le gann ti yaajamin ki che bi pɔr takpem, n-yonn man wee bi la nan be Ijibir a tiŋin nin, le Uwonbɔr ta u pɔɔm ki nyan bi kitiŋ nmɔn yaan.

¹⁸Le Uwonbɔr nan ta limɔril ki ŋmag bi kukunkɔɔg bu ibin pina,

¹⁹le u bii ibol ilile yan be Kenann a tiŋin nin, le ki che u tɔɔl a ninfob gaa kitiŋ nmɔn le ki kpann bi faal.

²⁰Ibin kobina nin piŋmu a sisiigin le ni niɛ biɛn nan tun. “Ni bɔɔn bu le Uwonbɔr sei bi bibɔjib le bi ŋmag ki tan kpaa ulinlenn Samɔɔl a yonn.

²¹Le bininfob nan nan bei Uwonbɔr ke un sei bi ubɔr, le Uwonbɔr gann Sɔɔl, wan ye Kisi a bija nan, u nan ye Bɛnjamɛnn a bol a ninfou le, le u ŋmag nnaam nmɔn ki tan kpaa ibin pina.

²²Ni bɔɔn bu le u nan pir Sɔɔl a naam nmɔn, le ki jin Defid. U nan pag Defid a bɔr ke: ‘N kan Defid wan ye Jesi a bigin le N num gbee; nan bu-n u li tun nan biɛn wee n ban.’

²³Uja nan a yaabili ni, le Uwonbɔr nyan Yisa wan ye ufeerin, ke un fee Iziral yaab ki jaa, ke waah nan siin limɔsiinl man nin.

²⁴Amaa Jɔnn le nan chinn dan ki nan mɔɔn ki sei Iziral yaab biɛn ke bin kpenn bi binbema, wee un fu bi Uwonbɔr a nyunful.

²⁵Jɔnn kaah nan nan be diɛr u toon nni, le u baan bi ke, ‘Ni tiɛr ke n ye ŋmiɛ? Maa ye Uma. Aai, amaa Uwonbɔr a Masiya wan yin ŋɔɔrin n bɔɔn ki dan nin, maa kpaan nin n gbin u naatagi a ŋmimi.’

²⁶Le Pɔɔl ji len ke, “N nabum, nim ban ye Abiraham a yaabili, nin nim ban kaa ye Juu yaab wee ki san Uwonbɔr nan, tim bu le bi ta feegab a bɔrin ki sein.

²⁷Jerusalam yaab nin biyudam kaa nan biɛ Yisa, nin nima biɛn ni, bi nan ku u le ni gbeen bilinlem a bɔr tan wee bi jɔɔ karin likpakɔɔl daal biɛn nin.

²⁸Hali baah kaa le nan kan u bir tan kpaan nin bin ku win, le bi bei Palati ke un ku wa.

²⁹Baah nan ŋa Yisa man ki diɛ ke Uwonbɔr a gbɔŋ kaah wɔɔn man nin, le bi tabir u lidapunpunl bu, ki ta u pii kukaagin.

³⁰Amaa le Uwonbɔr fiin u nkumin,

³¹le ban nan nɔɔ u ki nyan Galilii ki chaa Jerusalam nan, ni nan ga u le idaa biɛn. Daandaan nan bi ma nin ye u siɛra jib ki sei ti ninfob.

³²Ti bei ni tibɔŋann nin le: Tan wee Uwonbɔr nan siin limɔsiinl ki sei ti yaajamin.

³³ U gbeen limɔsiinl nmɔn ki sei tim ban ye bi yaabili n na ki fiin Yisa nkumin na. Ke naah sɔb ilan yan kpiɛ milee n yaan ke: ‘Fin le ye N bija; dinan le N ŋa a baa.’

³⁴ Ibamɔn ke Uwonbɔr nan fiin u nkumin na, le waa buri, ni piin imɔbon nan yaan le: ‘N yin ta tikaar tan ye kasi a kaar tan wee N nan siin limɔsiinl ki sei Defid nan le.’

³⁵ Man le ni ji nan sɔb kugbɔŋ nan a niba yaan ki len ke: ‘Ŋaa li che a poopendaau a gbanann n bur kukaagin ni.’

³⁶“Defid nan tun nan wee Uwonbɔr wɔɔn u ke un tun u tɔɔl a yonn nin le, ni bɔɔn bu le u kpo; le bi pii u u yaajam a karin, le u gbanann bur.

³⁷Amaa wan wee Uwonbɔr fiin u nkumin nin, u gbanann kaa buri.

³⁸“Mambu, n nabum n ban ni li nyi ke Yisa bu le tibir a jiɛn per a mɔleen yin pag sei ni.

³⁹Wan ŋa Yisa yada ke, u daan kan nŋmarima, amaa Moziz a siim n ma, kaa li fir sei uninfo nŋmarimi.

⁴⁰Ni li guu ni ba man, ki laa che bilinlem nan kaah len man nin n ji ni.

⁴¹‘Ni lig man, nim bininfob ban yɔɔl nan, Ni che nin gar ni wee ni gbanann n kpo, N yin tun niwann niba le idaa nan yaan, le naa yin ŋa ni yada, hali ni ye uba le bei ni ke gbaa.’

⁴²Pɔɔl nin Banabasi kaah nyan kuwonjiɛndiig nmɔn yaan nin, le bininfob nmɔn balin bi ke bin pɔɔn biba wee ki nan jirin likpakɔɔl daal lan chaan nin, ki nan wɔɔn bi tibɔr nmɔn ki kpiɛ.

⁴³Bininfobin kaah nan worin nin, le Juu yaab takpem nin ibol yan nan jiɛn bi kaal wee ki nɔɔ Juu yaab a kaalin, ni nan nɔɔ Pɔɔl nin Banabasi. Le bi pag nin bi ki balin bi ke, bi li nɔɔ Uwonbɔr nin u nyunyunbasanlin.

⁴⁴Likpakɔɔl daal lan paan nin a daal kaah nan nan foo, ni nan gur wama le nin kitiŋ nmɔn a ninfob biɛn n dan ki nan gbir Uyudaan a bɔr.

⁴⁵Juu yaab kaah nan kan kuninfogbaluŋin le ni ŋa bi lipiiponl, le bi pag bii Pɔɔl a wɔɔmin.

⁴⁶Le Pɔɔl nin Banabasi le pag nin lipoobil ke, “Ti chinn pag tibɔr nan ki sei nim Juu yaab le. Amaa naah yii tibɔr nmɔn, ki ji tiɛr ke naa ŋan nin ni kan limiɛfol lan kaa jɔɔ ndiɛmin bu, ni ma che ti jiɛn ni, le ki chaa ban kaa ye Juu yaab ban.

⁴⁷ Uyudaan kaah ke ti ŋa man sɔ: ‘Min le ŋa ni ban kaa ye Juu yaab n yaa weem, ke nim bu le Uwonbɔr yin fee dulinya yaab ki jaa.’

⁴⁸Ban kaa nan ye Juu yaabin kaah gbir man nin, le ni mɔŋ bi, le bi sei Uyudaan a bɔr nmɔn jilima. Le ban wee Uwonbɔr gann ke bin kan limiɛfol lan kaa jɔɔ diɛmin ŋa yada.

⁴⁹Le Uyudaan a bɔr nmɔn mann mɔɔn kitiŋ nmɔn a logil biɛn.

⁵⁰Amaa le Juu yaab fiin bipiib ban ye biwonsam ki ye biyudam nin kitiŋ nmɔn a yudam. Le bi mugir Pɔɔl nin Banabasi ki ŋɔɔr bi ki nyan bi tiŋin.

⁵¹Le Pɔɔl nin Banabasi pir pir bi nɔɔi, ki sin yaar jon Ikoniɛm.

⁵²Le ni mɔŋ bibɔɔnɔɔbin le bi gbee nin Kasi a Naaŋ.