Read Konkomba Litoonl 14 Bible Online

Litoonl 14 - Konkomba bible

Litoonl 14

¹Pɔɔl nin Banabasi kaah nan foo Ikoniɛm nan, le bi kɔɔ Juu yaab a wonjiɛndirin, ke baah pii ti ŋaan man nin. Niin le bi nan pag nbamɔm, le Juu yaab nin ban kaa ye Juu yaab takpem ŋa yada.

²Amaa Juu yaab ban kaa nan chee ŋa yada-n nan bii ban kaa nan ye Juu yaabin a sufu le. Le bi ŋuui fii biwonjiɛmin bu.

³Pɔɔl nin Banabasi nan be niin ki yuura, ki jɔɔ lipoobil ki pag Uyudaan a bɔr ki tenn bininfob, le Uyudaan nmɔn sei bi npɔɔn le bi pag u nyunyunbasanl a bɔr, ki tun ligaril a siɛra nin lijinjeel a toon.

⁴Le kitiŋ nmɔn a ninfob bɔgir nin tab; biba nan si Juu yaabin a chaŋ le, le biba mu si Yisa a tooi yin a chaŋ.

⁵Le Juu yaab nin ban kaa ye Juu yaabin, nin bi tiŋ nmɔn a yudam lagin tab, ki lol ke bin jin itoon nin fala ki gabir bi itangbag.

⁶Amaa baah nan biɛ ke bin yin gabir bi itangbagin, le bi guun jon Lisitira nin Deba, nin ntim bum man be Likoniya a tiŋin nin,

⁷nin yaan le bi ji nan tan tugir ki mɔɔn tibɔŋann nmɔn.

⁸Le uja u ba nan be Lisitira ki ye kiwɔbig, bi nan ma u ki miin u ye kiwɔbig le, kaa nyi chonn ni.

⁹Le u nan pelig Pɔɔl a mɔleen yin. Le Pɔɔl lig u chiim, ki biɛ ke u jɔɔ yada kan li sei u kutebug,

¹⁰le u yin u nmɔpɔɔn ke, “Fii sir a taai buu!” Le u yug sir paab ki nin choon.

¹¹Bininfobin kaah nan kan Pɔɔl kaah tun man nin, le bi nin piin ki pag papaab Likoniya yaab a leen yin ke, “Itingban le kpann uninfosaal ki jiirin ti ban!”

¹²Le bi yin Banabasi a yinl ke Ziɛu, ki yin Pɔɔl mu a yinl ke Hemesi, nan bu-n u ma nan ye wan pag tibɔr.

¹³Le bi tingbanl lan wee bi yi ke Ziɛu wee u diig si kitiŋ nmɔn a gbaamin a minmanu nan ŋmag inaaja nin tifar ki nan sir kitiŋ nmɔn a timansanmɔnn, nan bu-n u ma nin kuninfogbaluŋin nan ban bin mann kumanug le ki sei Pɔɔl nin Banabasi.

¹⁴Amaa Banabasi nin Pɔɔl kaah nan gbir baah len man nmɔn, le bi sufu bii, le bi dar bi daalam par par, ki guun kɔɔ kuninfogbaluŋin yaan, le ki tann ke:

¹⁵“Bininfob nan, ba ŋa wee ni tun man naa? Ti tɔɔl le ye bininfob le ke naah ye man nin. Ti ŋmagin tibɔŋann le ti nan sei ni wee ni jiɛn dulinya nan a wann yɔɔra wee ki li nɔɔ Uwonbɔr Wan fo-n, Wan naan paab nin tum nin imɔg nin nan biɛn be i yaan.

¹⁶Yaayoo nna, U nan che ibol biɛn ŋaan baah ban man le.

¹⁷Nin man biɛn ni, Waa nan ŋa niba wee naa jin siɛra, U wɔɔn U binbenŋam le ki che u taal nu ki che tiwanbukaar biɛn lo iyoo biɛn ki tenn ni tijiir takpem le ki che ni mɔ ni.”

¹⁸Hali Pɔɔl nin Banabasi kaah le pag man ni nmɔn biɛn na, ni nan pɔɔ le nin bin fir gɔɔ kuninfogbaluŋin nmɔn ke bi laa mann kumanug ki sei bi.

¹⁹Le Juu yaab biba nyan Antiɛg kan be Pisidiya a tiŋin, nin Ikoniɛm a tiŋin, ki dan ki nan pag ki sei kuninfogbaluŋin ki bii Pɔɔl nin Banabasi. Le bi gabir Pɔɔl itangbag ki fuul u nyan kitiŋ nmɔn a gbaam, ki tan gab ki nyi ke u kpo le.

²⁰Amaa bi bɔɔnɔɔbin kaah nan lagin ki gɔɔn win a bɔɔn le u fii ki jir kitiŋ nmɔn yaan. Le ni won kutaag le uma nin Banabasi jon Deba.

²¹Bi nan mɔɔn tibɔŋann nmɔn le kitiŋ nmɔn yaan le bininfob takpem ŋa bi bɔɔnɔɔb. Le bi jir jon Lisitira, nin Ikoniɛm nin Antiɛg,

²²ki pɔɔgir bi bɔɔnɔɔbin a gbanann nin bi sufu ke bi mann sir bi yada bu nin ibamɔn na. “Ni kpaa le nin ti kɔɔ tibɔmug kaarin takpem wee ki nin nan kɔɔ Uwonbɔr a naamin.”

²³Le Pɔɔl nin Banabasi nan gann biwonjiɛm a laguŋ ni biba le ki ŋa bi bisanliib tiwonjiɛndir biɛn nin, le ki lol bimɔb ki miɛ Uwonbɔr, ki ta bi ŋa Uyudaan wan wee bi gaa u jin nan a nɔɔn.

²⁴Baah nan choon Pisidiya a timin ki diɛ-n, ni bɔɔn bu le bi jon Pamfiliya a tiŋin,

²⁵baah nan pag Uwonbɔr a bɔr Pega nan, le bi nyan niin ki jon Ataliɛn.

²⁶Le bi nyan Ataliɛn ki kɔɔ kuŋaluŋ ki jir Antiɛg, nin yaan le bi nan ta bi ŋa Uwonbɔr a nyunyunbasanlin, nin baah tun itoon ki diɛ nbu.

²⁷Baah nan foo Antiɛg nan, le bi bei biwonjiɛm a laguŋin Uwonbɔr kaah ta bi tun man, nin waah loor nsan man ki sei ban kaa ye Juu yaab wee bi ŋa yada man.

²⁸Le bi nan paar nin yaan ki be nin bi bɔɔnɔɔbin ki yuur takpem.