Read Konkomba Litoonl 17 Bible Online

Litoonl 17 - Konkomba bible

Litoonl 17

¹Tɔ, le Pɔɔl nin Silasi nɔɔ Amfipolisi a tiŋin nin Apoloniya a tiŋin ki tan foo Tesalonika. Nin yaan le Juu yaab a wonjiɛndiig nan be.

²Le Pɔɔl tan kɔɔ niin ke waah pii ti kɔɔ man ni. U nan ta ipkakɔɔ itaa le ki be niin, ki wɔɔn bi Uwonbɔr a gbɔŋin a taai,

³ki wɔɔn ni taai ke ni kpaa talar le ke Masiya nji fala ki kpo ki fii nkumin, “Yisa wan wee n pag u bɔr nan, u ma ye Masiya nmɔn.”

⁴U nan pag ki kpenn Juu yaab biba a lam, le bi nin dan ki nan kpiɛ u ma Pɔɔl nin Silasi bu. Le Girig yaab ban jiɛn Uwonbɔr, nin bipiib ban jɔɔ jilima takpem nan kpiɛ bi bu.

⁵Amaa Juu yaabin nan ŋa u lipiiponl le; ki jin ki lagin kinyaŋ a ninfobir, ki nan mug kitiŋ nmɔn yaan nin tifur, ki tan leg Jasonn a niin, ki ban Pɔɔl nin Silasi, ke bin nyan bi dan kuninfogbaluŋin ban.

⁶Amaa baah kaa nan kan bi n-yonn man ni, le bi choo Jasonn nin nnabum biba, ki dar bi dan kitiŋin a ninkpeeb ban, ki tiɛn ke “Bininfob nan le nan mugir bininfob ntim biɛn nin, le ki nan dan do nan mu,

⁷Le Jasonn gaa bi ki ŋa u niin. Le bi biɛn nan choon ki bii ubɔr Siiza a siim, ki ke ubɔr uba mu ji be le bi yi u ke Yisa.”

⁸Baah nan gbir man n-yonn man nin, le ni bii kuninfogbaluŋin nin biyudamin a sufu takpem.

⁹Le biyudam nmɔn che Jasonn nin bi miɛnin yɔn ilig le bi ta bi jaa.

¹⁰Naah nan bɔŋ n-yonn man nin, le biwonjiɛmin nan chabir Pɔɔl nin Silasi le bi jon Beriya. Baah nan foo-n le bi kɔɔ Juu yaab a wonjiɛndiigin.

¹¹Beriya a tiŋ a ninfob pel Pɔɔl a bɔrin ki jon Tesalonika yaaba, le ki gaa tibɔrin nin njiɛm takpem ki dibir imɔleen nmɔn lidaal biɛn ki lig njee Pɔɔl kaah pag nan nmɔn sin ye ibamɔn naa.

¹²Le Juu yaab takpem nan ŋa yada ki kpiɛ Girig a piib ban jɔɔ liyinl nin Girig a jab takpem bu.

¹³Juu yaab ban be Tesalonika nan kaah gbir ke Pɔɔl be mɔɔn Uwonbɔr a bɔr le Beriya a tiŋin nin, le bi tɔɔl jon niin ki tan pag ki bii Pɔɔl, ki fiin kuninfogbaluŋin a ŋuui, ke bin ŋɔɔr wa.

¹⁴Libonl nmɔn le biwonjiɛmin nan chiɛn Pɔɔl nin biba ki tan jaa bi limɔgil a gbaam, amaa le Silasi nin Timoti ma paar Beriya.

¹⁵Bininfob ban nan chiɛn Pɔɔl nan ta u foo Atensi le, ki nin jir kun, le Pɔɔl bei bi ke bin tan bei Silasi nin Timoti ke bin dan u ban weem.

¹⁶Pɔɔl kaah la nan be Atensi ki guu Silasi nin Timoti nni, le u kan kitiŋin kaah gbee nin itingban, le ni bii u sufu takpem.

¹⁷Le u kɔɔ kuwonjiɛndiigin ki pag tenn Juu yaab nin ban kaa ye Juu yaab ki jiɛn Uwonbɔr nan tibɔr, ki ji chaa bi nyamin idaa biɛn, ki pag nin ban chaan nin yaan nmɔn tibɔr.

¹⁸Le ban wɔɔnn wee bi yi biba ke Epikurusi, ki yi biba mu Sitoog nan, mu nan dan ki nan far limɔkpel nin Pɔɔl. Le bi ni biba nan pag nin tab ke, “Wan be jabin nan mu ke baa?” Le biba jiin ke, “Ni nann ke u pag iweenchaan iba a bɔr le-n.” Bi nan len man babu, Pɔɔl nan mɔɔn Yisa a bɔŋann nin le nin u kum a fiim.[9]

¹⁹Le bi ta Pɔɔl ki jon bibɔjib a kikaabol nan yaan wee bi yi ke, Aropagusi[10] nan, ki bei Pɔɔl ke, “Ti li fir biɛ tibɔchann tan wee a wɔɔn nan naa?

²⁰A pag tibɔchan le ti ban, le ti ban ti biɛ ti taai.”

²¹(Atensi yaab biɛn nin ban nyan ntim miba ki dan nan be niin nin, kaa ji nan tun niba amaa bi le ni nan pag ki sin pelig tibɔchann tan la yɔɔn dan nin a bɔr le.)

²²Le Pɔɔl fii sir Aropagusi a laguŋ nmɔn yaan, ki bei ke: “Atensi yaab! N kan ni binbemin, ni ban liwonjiɛnl pam.

²³Nan bu-n maah gɔnn ni tiŋ nan, n dibir tiwann tan wee ni jiɛn nin le nbamɔm, hali ki nan kan libinbinl liba le ni sɔb libu ke, libinbinl nan si “NWEEN MAN WEE TAA NYI” nan a taalin le. Daandaan nan n ban n wɔɔn ni nween man wee ni jiɛn wee kaa sin nyi Win yaa bɔr le.

²⁴“Nween man naan dulinya nin niwann nan biɛn be niin nin, u ma ye paab nin tum a yudaau, waa be tiwonjiɛndir tan wee bi ta bi nɔɔi maa yaan ni.

²⁵Uninfosaal kaa li fir ta u nɔɔ ki tun niba sei Wi, a li ke U ban niba le nni, nan bu-n U ma tɔɔl le tenn uninfosaal biɛn limiɛfol nin kufoorug nin niwann nan biɛn gur.

²⁶Uninfo uba ni le u che ibol biɛn nyan, ki che bi be dulinya nan a gbanann biɛn nin, le u lol n-yonn man wee un nan siin bi nin baah na li be nan yaan.

²⁷Uwonbɔr nan ŋa man le ke bininfobin ban u, nba ke bi ban u ke bi li kan u. Amaa u bol kaa fɔg nin ti ni uba ban ni.

²⁸‘Nan bu-n U ma bu le ti fo ki choon ki be.’ Ke ni tɔɔl a landam biba kaah nan len ke, ‘Tim ye Uwonbɔr a buwaab le.’

²⁹“Mambu taah ye Uwonbɔr a buwaab nan, ti laa tiɛr ke Uwonbɔr ye kuwan naan waŋ ke salima, bee tikur ninann bee litangbagil lan wee uninfo ta u lam bee u biɛm ki naan li nni.

³⁰Iyoo yan nan jon nin, wee bininfob kaa nan nyi Uwonbɔr nan, waa nan gar bi bir bu. Amaa daandaan nan, u ke uninfo biɛn nkpenn u binbema.

³¹Nan bu-n, u pii siin lidaal lan wee u na yin che uninfo gannkaau nmɔn nji dulinya yaab tibɔr ibamɔn a sam bu. U jin ni siɛra ki sei uninfo biɛn na le ki fiin u nkumin.”

³²Baah gbir Pɔɔl pag nkum a fiim a bɔrin, le biba sɔɔl u, amaa le biba mu ke, “Ti ban ti mann gbir nan wee a wɔɔn nan le jigin.”

³³Iyaayoo nmɔn le Pɔɔl fii ki jiɛn bi kulaguŋ nmɔn yaan.

³⁴Bijab wama nan le nan ŋa Pɔɔl a bɔrin yada, le ki ŋa u bɔɔnɔɔb. Bi ni uba nan ye Dionasi, u nan ye bibɔjibin a ni uba le. Ki kpiɛ upii uba mu nan ŋa yada, le u yinl ye Damarisi, biba mu nan be ki kpiɛ.