Read Konkomba Litoonl 18 Bible Online

Litoonl 18 - Konkomba bible

Litoonl 18

¹Ni bɔɔn bu, le Pɔɔl nyan Atensi ki jon Korenti a tiŋin.

²Nin yaan le u nan kan Juu yaab a ninfo uba, le u yinl ye Akula, amaa le bi nan ma u Pɔntusi, le u ma nin u poo Pirisila la nyan Itali ki dan Korenti, nan bu-n ubɔr yudaan Kuladiyasi le nan sei bi bimɔb ke Juu yaab biɛn nya Rom a tiŋin na. Le Pɔɔl jon ke un tan kan bi,

³u mu kaah nan ye ugbanjab ke baah pii ti tun man nin, mambu le che u nan paar bi ban ki tun nin bi.

⁴Le likpakɔɔl daal biɛn ke Pɔɔl n kɔɔ kuwonjiɛndiigin, ki far Juu yaab nin Girig yaab limɔkpel ki ban bin chee u bɔr tan wee u pag tenn bin.

⁵Le Silasi nin Timoti nan nyan Masedoniya ki dan. Le Pɔɔl nin ta u toon yin ki jiɛn ki nin ta u saŋi biɛn ki sei Yisa a bɔr n-yaa mɔɔnim, ki wɔɔn Juu yaab ke Yisa le ye Masiya.

⁶Amaa le Juu yaabin kaa chee Pɔɔl a bɔr nmɔn ni, le ki sugir u. Le Pɔɔl gbagbag u wan yeewaŋ, le ki ke, “Ni cham li be ni tɔɔl a yuli bu! N tun maah ye n tun man le. Naah nyan dinan ki chaa, n yin jo ban kaa ye Juu yaabin ban le.”

⁷Le Pɔɔl nyan kuwonjiɛndiig nmɔn yaan ki jon tan kɔɔ Tatusi Jasitusi a niin, u nan ye uwonjiɛn le.

⁸Le kuwonjiɛndiig nmɔn a yudaau Kerepusi nin u niin yaab biɛn ŋa Uyudaan yada; le Korenti yaab takpem mu gbir u bɔr nmɔn le ki ŋa yada. Le bi fun bi Uwonbɔr a nyunful.

⁹Weemba a nyiɛg le Pɔɔl nan kan zii le Uyudaan pag nin u ke: “Laa san bijawaami; wee ki li mɔɔn n bɔŋann nmɔn na, ki laa ŋmin ni.

¹⁰N be niŋ, le uba kaa be ki li legiŋ ki seiŋ kidaŋi, nan bu-n n jɔɔ bininfob takpem kitiŋ nan yaan.”

¹¹Mambu Pɔɔl nan be niin le libinl nin iŋmal iloob, ki wɔɔn bininfob Uwonbɔr a bɔr.

¹²N-yonn man wee Galio nan ye Akaya a tingbɔŋ a bɔr yudaau win, le Juu yaab nan lagin tab ki tan leg Pɔɔl, ki ta u jon bibɔjib ban.

¹³Ki tan bei ke, “Uja nan le lar bininfob le bi jiɛn Uwonbɔr nin nsan man kaa nɔɔ ti siimi.”

¹⁴Pɔɔl kaah ke un pag n-yonn man nin, le Galio bei Juu yaab nmɔn ke, “Nim Juu yaab, ni ye tibɔr nan ye tibɔbir bee limɔyiil le ke, ni bi ŋan n mann pel.

¹⁵Amaa naah ye ibinbaan ki jiin ni tɔɔl a mɔleen, nin ni yin, nin ni tɔɔl a siim paam nan ma, ni tɔɔl nmann tibɔr nmɔn na, maa li fir ji tibɔr nmɔn ni.”

¹⁶Le ki che bi ŋɔɔr bi nyan tibɔr a ji bol nmɔn.

¹⁷Le bi biɛn choo Sositenesi, wan ye kuwonjiɛndiig a yudaau ki boo u tibɔr a jibol, amaa le Galio a baga kaa be niin ni.

¹⁸Pɔɔl nan be Korenti a tiŋin iyoo takpem. Le ki nan chabir biwonjiɛmin ki kɔɔ kuŋaluŋ ki jon Siriya. Le Pirisila nin Akula chiɛn u. Waah kaa la nan kɔɔ kuŋaluŋin nin, le u koo u yul Senkariɛ a tiŋin nan bu-n waah poo tipoor tan nin bu.

¹⁹Le bi nan chaa ki tan foo Efesusi, nan yaan wee Pɔɔl nan jaa Pirisila nin Akula nan, le u tɔɔl jon ki tan kɔɔ Juu yaab a wonjiɛndiigin, ki pag sei Juu yaab nmɔn.

²⁰Le bi nan bei u ke un laan paar bi ban iweehn ilee, amaa le waa chee.

²¹Amaa waah nan chabir bi n-yonn man nin, le u bei bi ke, “Ni ye Uwonbɔr chee ke n ji li jirin ni ban.” Le ki kɔɔ kuŋaluŋ ki nyan Efesusi.

²²Waah tan foo Sizariya n-yonn man nin, le u don tan poor biwonjiɛm a laguŋ, le ki ji jiir Antiɛg.

²³Waah jin n-yonn wama Antiɛg nmɔn a bɔɔn bu, le Pɔɔl ji nan nyan nin yaan ki choon ntim ntim Galantiya nin Ferijiya a tinbumin ki pɔɔgir bi bɔɔnɔɔbin a sufu.[11]

²⁴Juu a jau uba le nan be, le u yinl ye Apolosi, amaa bi nan ma u Alɛgzandira le, le u nan dan Efesusi. U nan ye ubiɛndaan le, ki nyi Uwonbɔr a gbɔŋ nbamɔm.

²⁵Bi pii nan wɔɔn u Uyudaan a sam ma, le u nan pag Yisa paam ke ni yeg, hali waah le nan nyi Jɔnn kaah nan fun bininfob Uwonbɔr a nyunfulin a binba-n nni.

²⁶Le u piin ki pag Uwonbɔr a bɔr nin lipoobil, Juu yaab a wonjiɛndiigin. Le Pirisila nin Akula gbir u bɔr nmɔn, le ki nan ta u kun ki tan mann wɔɔn u Uwonbɔr a sam nbamɔm.

²⁷Apolosi kaah nan ban un jo Akaya nan le biwonjiɛmin pɔɔg u gbanann ki sɔb kugbɔŋ ki sei bi bɔɔnɔɔb ban nan be niin nin ke, bin gaa mu kuchɔŋ. Waah tan foo niin n-yonn man nin, u sin nan jiir ban ŋa yada, Uwonbɔr a nyunyunbasanl nbu le ki ye literil ki sei bi.

²⁸Nan bu-n uma nin Juu yaab kaah nan far limɔkpel nin tabin, le u yuur Uwonbɔr a gbɔŋ, ki wɔɔn bi ke Yisa le sin ye Masiya, ki pag nin npɔɔn, ki nyaŋ bi kuninfogbaluŋin yaan.