Read Konkomba Litoonl 19 Bible Online

Litoonl 19 - Konkomba bible

Litoonl 19

¹Apolosi kaah la na be Korenti nan, le Pɔɔl nan nyan niin ki nɔɔ kisanbig ki jon Efesusi.[12] Nin yaan le u kan biwonjiɛm biba,

²le ki baan bi ke, “Naah nan ŋa yada-n ni nan gaa Kasi a Naaŋin waa?” Le bi jiin ke, “Aai. Taa pii la nyi ki gbir ke Kasi a Naaŋ be gbaa.”

³Le Pɔɔl baan bi ke, “Ke bi nan fun ni Uwonbɔr a nyunful nii?” Le bi bei u ke, “Bi nan fun ti Jɔnn a nyunfulin le.”

⁴Le Pɔɔl bei bi ke, “Jɔnn kaah nan fun bininfob Uwonbɔr a nyunfulin, ni wɔɔn ke bin kpenn bi binbem ki jiɛn bi toonbira. Le ki sin bei bi ke bin ŋaam wan yin ŋɔɔrin u bɔɔn nin yada, u ma ye Yisa.”

⁵Baah gbir man nin, le bi nin fun bi Uwonbɔr a nyunful, Uyudaan Yisa a yinl bu.

⁶Le Pɔɔl ta u nɔɔi ki paan bi bu, le Kasi a Naaŋ jiirin bi bu, le bi nin pag ileen pɔɔn, ki ji pag ilinlen leen.

⁷Bijab nmɔn biɛn nan ŋa bininfob piig nin bileeu.

⁸Pɔɔl nan be Juu yaab a wonjiɛndiigin iŋmal itaa le, ki pag Uwonbɔr a bɔr ki tenn bi nin lipoobil, ki pɔɔn uba ke un kpenn bi potiɛl ki jiin Uwonbɔr a naamin paam.

⁹Amaa bi ni biba nan ye tukangbirdam le; kaa chee Yisa a sam, ki pag tibɔbir kuninfogbaluŋin yaan ki jiin Uyudaan nmɔn paam. Le Pɔɔl fɔɔr jiɛn bi. Le ki ta biwonjiɛmin jon Tiranusi a wɔɔnim a diigin, le idaa biɛn ke u wɔɔn bi niin.

¹⁰Ni nan ye man le ki tan kpaa ibin ilee, mambu che Juu yaab nin Girig yaab ban biɛn nan be Asiya a tingbɔŋin nan gbir Uyudaan a bɔr nmɔn na.

¹¹Le Uwonbɔr nan che Pɔɔl tun ligaril a toon gbingbemin yan be i binba,

¹²le bininfob yuur u numpirim nin u wan yɔɔr tan wee u yee gbaa, ki paag bibaarib bu le bi wiɛn diɛr, le nnaanbiim nyan ki jiɛn bi.

¹³Iyaayoo nmɔn Juu yaab biba mu nan be, ki choon nyan nnaanbiim bininfobin, bi nan yi Uyudaan Yisa a yinl le ke bin nyan nnaanbiim, ki bei nnaanbiimin ke, “Tim le sei ni bimɔb, Yisa wan wee Pɔɔl nan mɔɔn u bɔrin a yinlin bu, ni nyau.”

¹⁴Nbijabum bilile ban nan ye Juu yaab a minmanib a yudaau Sikefa a naachimin le nan tun man.

¹⁵Le weemba daal, le kinaanbiig nmɔn baan bi ke, “N nyi Yisa, ki nyi Pɔɔl, ke ni mu, ni ye ŋmam maa?”

¹⁶Le uja wan wee kinaanbiig be u bu nmɔn, fii ki choo bi, ki boo bi ki nyaŋ bi biɛn, le bi nan guun nyan iniin nmɔn yaan nin igbananbil le bi gbanann nya ncham.

¹⁷N-yonn man wee Juu yaab nin Girig yaab ban be Efesusi a tiŋin nin biɛn nan gbir man nin, le bijawaam choo bi, le bi sei Uyudaan Yisa a yinl jilima.

¹⁸Le ban nan ye biwonjiɛmin takpem nan nyan npaan ni ki nan kpiir bi toonbir.

¹⁹Le binyɔgdam nin ta bi sabi ki dan nan nyɔɔ nŋmi kuninfogbaluŋ n-yaan, le bi bigin isab nmɔn a ligi ki miin i ye tikur a ligibim turpiŋmu le.[13]

²⁰Ni ma nan che Uyudaan a bɔr nmɔn mann mɔɔn ki kɔɔ bininfobin, ki kpiɛ npɔɔn.

²¹Ni niɛ nan biɛn kaah tun jon a bɔɔn, le Pɔɔl lol ke un nɔɔ Masedoniya nin Akaya ki jo Jerusalam. Waah nan be niin nmɔn a bɔɔn bu, le Pɔɔl bei u ba ke, “See ke n gɔnn Rom mu.”

²²U nan tun Timoti nin Erasitusi ban ye u toon terib bilee-n le, Masedoniya, amaa le u paar Asiya a tiŋin.

²³Iyaayoo nmɔn le Efesusi yaab nan gaa tijar ki jiin Uyudaan Yisa a samin paam.

²⁴Uja uba nan be le u yinl ye Dimitirusi, u ti jɔɔ tikur ninann le ki maa bi tigbann yan wee bi yi ke Atemisi nan a dir ki kɔɔr tenn bitoontumin. Le bitoontum n mu ta itoon nmɔn ki kan tinyɔɔr takpem.

²⁵Le Dimitirusi nan yin bi biɛn ki lagin tab, nin ban biɛn tun itoon nmɔn a booli biɛn ki bei bi ke, “N jɔtiib, ni nyi taah ga tinyɔɔr tan itoon nan yaan.

²⁶Ni tɔɔl kan ki gbir Pɔɔl nan a bol kaah kpenn bininfob takpem a lam ki lar bi ki kɔɔn kulɔŋ man Efesusi nin Asiya a tingbɔŋin biɛn. U ke tiwann naan wann tan wee bininfob maa-n kaa ye itingban ni.

²⁷U ŋaan kidaŋ le u mɔleen nmɔn yaan, naa ye kidaŋ kan li bii ti nyaŋ a binba, amaa ti tingbanl takpenlin Atemisi a diigin a jilima yin war le, le litingbanlin tɔɔl, lan wee bi jiɛn Asiya a tingbɔŋin nin dulinya nan yaan a jilima li bii.”

²⁸Baah gbir man nmɔn, le bi ŋuui fii, le bi piin ki tann ki ke: “Tim Efesusi yaab a tingbanl Atemisi ye litingbanl takpenl le!”

²⁹Naa nan yuuri le kitiŋ nmɔn a ninfob fu, ki gaan tijar. Le ki bib Pɔɔl a ninɔɔtab bilee Gayɔsi nin Arisitakusi ban nyan Masedoniya nan, le kuninfogbaluŋin kpab tab ke ninfo uba a danin ki kɔɔ kinaakoog takpoŋin.

³⁰Pɔɔl nan ban un kɔɔ kuninfogbaluŋin yaan le, amaa le biwonjiɛmin kaa nan chee un kɔɔ.

³¹Hali kitiŋ nmɔn a yudam nin Pɔɔl a jɔtiib nan tun itoon le ki balin u ke Pɔɔl nmɔra, ki laa kɔɔ kuninfogbaluŋin yaan ni.

³²Iyaayoo kulaguŋ nmɔn nan jɔɔ kuŋmaruŋ le: Biba nan tann niba bu le biba mu tann nitɔ bu. Bininfob takpem kaa nan nyi nan bu wee bi be niin ni.

³³Le Juu yaab nyan uja uba le bi yi u ke Alɛgzanda, ki siin u bi nintogil ke un pag bi bu, le Alɛgzanda don u nɔɔi papaab, ki ban un pag ki sei kuninfogbaluŋin, ki nyan bi limɔkpel nmɔn yaan.

³⁴Amaa baah nan nan biɛ ke u ye Juu a ninfou le-n, le bi biɛn tann ki pag bɔr tiba ke, “Tim Efesusi yaab a tingbanl Atemisi ye litingbanl takpenl le!” Bi nan tiɛn man ki tan kpaa tikur tilee le gbaa.

³⁵Ni joorimin le kitiŋ nmɔn a gbansɔbiru uba nan che kuninfogbaluŋin ŋmin, le u baan bi ke: “Nim Efesusi yaab, uba be kutingbɔŋ nan yaan wee kaa nyi ke nim Efesusi yaab le guu Atemisi a diig nan nin litingbanl lan nyan papaab ki nan lu nan naa?”

³⁶Nima bu uba kaa be ki li fir niɛ ni nan a bamɔn bu. Ni ŋan nin ni mɔr ki laa ban jegjegi.

³⁷Ni ta bininfob nan dan doo, amaa baa sun ti wonjiɛndiig a wan ni, bee ki sug ti tingbanl li.

³⁸Ni ye Dimitirusi nin u toontun tabin jɔɔ tibɔr nin uba ke, tibɔr a ji bol be, bibɔjib mu be. Bi li fir jo ki tan poor tab bi ban.

³⁹Amaa ni ye ni jɔɔ tibɔr tan kaa ye ni ta ti jo bibɔjib nmɔn ban ke, ni ŋan nin ni jo ni tɔɔl a yudam ban.

⁴⁰Ke naah ye man nin, ti be kidaŋin le, bi li ji tim tibɔr kufuug kan wee ti ŋa dinan nan bu. Le taa yin fir wɔɔn kufuug nmɔn a taai, taa yin nyi taah li len man ni.”

⁴¹Waah len man nmɔn, le u che bi biɛn fɔɔr.