Read Konkomba Litoonl 2 Bible Online

Litoonl 2 - Konkomba bible

Litoonl 2

¹Kuchiig kan wee bi yi ki ke Pentikosi a daal kaah nan nan foo-n, bi nan lagin be bogiliba le.

²Libol nmɔn le kufuug nyan paab, ki fu ke ntafapɔɔrim le daarin. Ki jiirin nan gbeen kudiig kan wee bi ka-n.

³Le bi kan ni ba le ni nann nŋmipeen a dann ki yar tɔɔ tɔɔ bininfob biɛn bu.

⁴Le bi biɛn nan gbee nin Kasi a Naaŋ ki piin ki pag ileen pɔɔn kinaaŋin a pɔɔmin.

⁵Juu yaab ban nan san Uwonbɔr nan be Jerusalam iyaayoo nmɔn, bi nan nyann dulinya nan a timin biɛn le.

⁶Baah nan gbir kufuug n-yonn man ni, le kuninfogbaluŋ lagin niin, le ni ŋa bi nmɔn, nan bu-n bi uba ba nan gbir biwonjiɛmin kaah pag u bol a leen le.

⁷Le ni ŋa bi ligaril, le bi baan tab ke: “Bininfob ban pag nan biɛn kaa ye Galilii yaab lee?

⁸Ke ni ŋa nii wee ti biɛn ji gbir bi pag ti boli a leen yaa?

⁹Ti ni biba nyan Patiya, nin Medisi nin Elam; nin Mesopotamiya, nin Judiya, nin Kapadosiya, nin Pontusi nin Asiya,

¹⁰Ferijiya nin Pamfiliya, Ijibir nin Libiya a yagil lan mal Sarene a tiŋin; le tim bibam mu nyan Rom,

¹¹(le ti ni bibam ye Juu yaab, le bi ba mu ji ye ibol iba yaab ban nan labir ki jiɛn Juu yaab a Wonbɔru win) le biba mu ji nyan Kereti nin Arabiya, le ti biɛn gbir baah pag ti boli a leen yin, ki donn Uwonbɔr a yinl nin lijinjeel a toon yan wee U tun nin!”

¹²Le ni ŋa bi ligaril nin lipotiɛl, le bi nin baan tab ke, “Ni niɛ nan a taai ye baa?”

¹³Le biba mu laa bi, ki ke, “Bi nyun ndaam le ki gbee.”

¹⁴Le Piita nin u tab piig nin uba-n fii ki sir kuninfogbaluŋin a nintogil, le u pag nniɛn pɔɔn ke: “N nabum Juu yaab, nin nim ban biɛn be Jerusalam nan, ni che n pag tibɔr nan wɔɔn ni; ni pel nbamɔma wee ki gbir maah yin pag man nmɔn.

¹⁵Bijab nan kaa ye bidanyugbeeb ke naah tiɛr man nni. Ni la ye njakpanyiɛn a kur tiwiɛ le![2]

¹⁶Aai, ulinlenn Jowel pii nan pag ni nan buu:

¹⁷‘Uwonbɔr nan len ke, dulinya nan a joorimin, n na li kpaar n naaŋin ki jaa bininfob biɛn bu. Le ni bijam nin ni bisiɛm na li pag ilinlen leen, le ni naachipɔm na li kan zii, le ni janinkpeeb mu na li dɔgin tidindɔgin.

¹⁸Iyaayoo nmɔn hali ban ye n toontum, bijab nin bipiib biɛn, n na li kpaar n naaŋin ki jaa bi bu le bin pag ilinlen leen.

¹⁹N na li tun lijinjeel a toon paab, nin ligaril a siɛra dulinya nan yaan. Ncham nin nŋmi nin kukpunyibɔŋ.

²⁰Nween na li kpenn ki bɔŋ, le uŋmal mu li kpenn ki mann ke nchamin, ni na yin ŋa man le, wee Uyudaan a pag takpeŋin daalin ni foon

²¹ Le wan biɛn yin Uyudaan a yinl ke u li kan nŋmarim.’

²²Le Piita ji mann len ke, “Iziral yaab, ni gbirim nan wee n yin pag bei ni ki jiin Yisa wan ye Nazarif a ninfou npaam, ni tɔɔl nyi ke Uwonbɔr le nan che u tun ligaril nin lijinjeel a toon nin siɛra ni sisiigin.

²³Uwonbɔr li nan ta uja nan ŋa ni nɔɔn, ki pii nan bon ki nyi nan na yin ŋa; le ni che tibirdam kpa u lidapunpunl bu le u kpo.

²⁴Amaa, le Uwonbɔr fiin u nkumin ki nyan u nkum a nan wii ni, nan bu-n nkum kaa jɔɔ npɔɔn man li fir ŋmag wi.

²⁵Defid nan pag Yisa a bɔr ke, ‘N kan Uyudaan kaah be nim iyoo biɛn. Nan bu-n U be n nɔɔjiim paam, Le maa ji yin be limugilin ni.

²⁶Mambu ni mɔm n sufu ni, le n pag npopeen a bɔr; n gbanann li be nin tama,

²⁷nan bu-n ŋaa yin che n paar kukaagin ni, kaa ji yin che a kasi daau a gbanann n buri.

²⁸A wɔɔm limiɛfol a nsan ma; Ki che ni mɔm ŋaah be n ban ni bu.’

²⁹Le Piita ji mann len ke, “N na a buwaab n li fir pag nin tidindann ke ti yaaja ubɔr Defid kpo le bi pii u, ke u kaag la be nin dinan.

³⁰Amaa waah nan ye ulinlenn nin u nyi Uwonbɔr kaah siin limɔsiinl ki sei u, ke u na li che u yaabil uba nji nnaam ki kal ubɔr gbann ni bu.

³¹Defid kaah pii nan kan nan yin tun nin bu, le u nan pag Masiya a kum a fiim bu, ki ke Masiya nmɔn kaa na yin paar kitakpiin tiŋi, le u gbanann mu kaa na yin buri.”

³²“Yisa nmɔn le Uwonbɔr nan fiin u nkumin, le ti biɛn mu le ye u kum a fiim a siɛradam.

³³Le Uwonbɔr ji ta u kaan U nɔɔjiim paam. Waah kal n-yonn man nin, le u gaa Kasi a Naaŋ kan wee Uwonbɔr nan siin limɔsiinl ke U na li sei win, Kasi a Naaŋ nmɔn le u ta sei ti, le ti gbir ki kan.

³⁴Defid ma kaa nan don paabi, amaa le ki ke, ‘Uyudaan Uwonbɔr nan bei n Yudaau ke, kalim n nɔɔjiim paam,

³⁵ hali nin maah na li che a dataam n kpann a taai a tɔɔnbol.’

³⁶“Mambu ni che Iziral yaab biɛn n biɛ ni niɛ: Yisa wan wee ni nan kpa u lidapunpunl bu-n, U ma le Uwonbɔr ŋa u Uyudaan nin Masiya.”

³⁷Bininfobin kaah nan gbir man ni, le bi sufu nan bii takpem, le bi baan Piita nin u tooi tabin ke, “Ti na a buwaab ti yin ŋa nii?”

³⁸Le Piita bei bi ke, “Ni jiɛn ni toonbir a tuma, wee ti fu ni biɛn nan Uwonbɔr a nyunful, Yisa Masiya a yinl bu, wee Uwonbɔr njiɛn ni bir ki per ni, ki sei ni ipiin yan ye Kasi a Naaŋin.

³⁹Nan bu-n U siin limɔsiinlin sei nim nin ni buwaab, nin ban a tim fɔg, nin ban wee ti Yudaau Uwonbɔr na li yin nin.”

⁴⁰Le Piita sei bi ikpaan takpem, le ki ji balin bi ke, “Ni fee niba gaba wee ki nyan dulinya nan a ŋmaruŋ nan yaan na.”

⁴¹Ban nan chee u bɔr nmɔn ni le bi nan fun bi Uwonbɔr a nyunful. Ban nan kpiɛ bi bu lidaal nmɔn nan foo bininfob turita paama.

⁴²Le bi nan ta bi saŋi ki tinn itoon nmɔn a wɔɔm ki jɔɔ nɔɔ nin tab, ki lagin ji tijiir, ki lagin tab ki miɛ Uwonbɔr.

⁴³Le bijawaam nan choo bi biɛn, nan bu-n itoon nin nan tun lijinjeel a toon le nin ligaril a siɛra.

⁴⁴Le biwonjiɛm nmɔn biɛn nan jɔɔ nɔɔ nin tab le ki jɔɔ bi wan yɔɔr ki por tenn tab.

⁴⁵Ki kɔɔr baah jɔɔ nan biɛn ki por ni ligi sei tab, uninfo biɛn nin waah ye un gaa man, wee nin kpaan u.

⁴⁶Lidaal biɛn bi lagin iwonjiɛn niin a loob le ki jiɛn Uwonbɔr, ki lagin tab bi niin ki ji tijiir, ki jɔɔ nmɔn nin ibamɔn nin tab,

⁴⁷ki pag ki don Uwonbɔr a yinl, le uninfo biɛn a sufu sɔɔn bi bu. Le idaa biɛn ke Uyudaan che bininfob mann ga nŋmarim kpiɛg bi bu.