Read Konkomba Litoonl 20 Bible Online

Litoonl 20 - Konkomba bible

Litoonl 20

¹Kufuug nmɔn kaah nan ŋmin nin, le Pɔɔl yin biwonjiɛm, le ki pɔɔg bi gbanann, ki chabir bi, le ki jon Masedoniya a tingbɔŋin.

²U nan chonn ntim man be niin nmɔn le, ki wɔɔn biwonjiɛm ban be niin nmɔn Uwonbɔr a bɔr takpem, ki pɔɔg bi sufu, ni joorimin le u tan foo Giresi,

³ki be niin iŋmal itaa. U nan ŋa u sili le ke un jo Siriya, amaa le ki gbir ke Juu yaab lolig nlolbirim le u bu, le u lol ke, un jir nɔɔ Masedoniya paam le.

⁴Pirusi wan nyan Beriya a bija Sopata, nin Arisitakusi nin Sekondusi, ban nyan Tesalonika, nin Gayɔsi wan nyan Deba, nin Timoti nin Tachikusi nin Tirofimusi ban nyan Asiya a tingbɔŋin nin, bi ma nan nɔɔ Pɔɔl ki jon.

⁵Le bijab nan, nan liir nsan ki tan guur ti Tirosi a tiŋin.

⁶Amaa Kuchiig kan wee bi ti ŋma boroboro kan kaa jɔɔ nnyɔg nni a bɔɔn bu le ti kɔɔ kuŋaluŋ, ki nyan Filipi ki chaa Tirosi. Ni ween iŋmu daal le ti foo bi ban Tirosi, ki paar be niin ki tan kpaa iweehn ilile.

⁷Likpakɔɔl a weemba daal le ti lagin tab, ke ti ji ti yudaau a jiir. Le Pɔɔl pag Uwonbɔr a bɔr digdig nin kunyiɛgtasiig, nan bu-n u nan ban ni won ke un jo ni ba yaan le.

⁸Bi nan nyɔɔ filaam le takpem kudiititɔrug kan yaan wee ti nan lagin nin a poolin.

⁹Le Unaachipɔɔn uba nan be niin, le u yinl ye Itikusi, le u ka kudiititɔrug a takorobonl bu. Le Pɔɔl pag Uwonbɔr a bɔr ki yuur, le u ka pelig, le njiɛm nan choo u, le u nyan kudiititɔrug kan kpiɛ titaa-n a paab ki tan lu tum. Le bi jiir ki tan yuur u, ki miin u kpou.

¹⁰Le Pɔɔl nyan kudiititɔrugin a paab, ki jiir ki nan wugin u bu, ki ta u nɔɔi bib u, ki len ke, “Ni laa che ni sufu n bii, u fo!”

¹¹Le ki jir don kudiititɔrugin a paab ki tan jin tijiir. Ni bɔɔn bu le u ji pag Uwonbɔr a bɔr hali nin naah nan won, le u jaa bi ki jon.

¹²Le bi nan yuur unaachipɔɔn nmɔn ke u fo, le bi ta u ki kun nin npopeen takpem.

¹³Le ti chinn jon ki tan kɔɔ kuŋaluŋ, ki jon Asosi. Nin yaan le ti nan tan yin yuur Pɔɔl, u nan ŋa man a sili le, nan bu-n, u nan ban un choon tum le ki foo niin.

¹⁴Waah nan kenn ti Asosi n-yonn man ni, le ti yuur u ki ŋa kuŋaluŋin yaan ki jon Mitilene.

¹⁵Le ni won kutaag le ti nyan niin ki foo Kiosi. Le ni nan won kutaag le ti foo Samosi, ki ji won kutaag le ti foo Miletusi.

¹⁶Pɔɔl kaa nan ban un sir Efesusi, nan bu-n waa nan ban un yuur Asiya a tiŋin ni, le ki ban weem ke u bi li fir ke, un bin foo Jerusalam, lidaal lan wee bi yi ke, Pentikosi nan a daal.

¹⁷Le Pɔɔl tun ntoon, ke bin nya Miletusi a tiŋin, ki jo Efesusi ki tan yin biwonjiɛn ninkpeebin ni.

¹⁸Baah tan foo n-yonn man nin, le u bei bi ke: “Ni nyi n binbem kaah nan ye man, maah nan be ni ban nin, maah foon Asiya a tingbɔŋ nan yaan lidaal lan ki nan kpaa dinan.

¹⁹N tun Uwonbɔr a toon le nin jiininba takpem nin tinyinyinn, nin nima biɛn ni n kan limagil takpem Juu yaab ban na.

²⁰Ni nyi maah pag Uwonbɔr a bɔr, ki wɔɔn ni bininfobin nin ni niin yin. N nan pag ni tibɔr tan biɛn li ter ni le kaa gur tiba.

²¹N bei Juu yaab nin Girig yaab biɛn ke bin kpenn bi binbema ki jir Uwonbɔr ban, ki ŋa ti Yudaau Yisa yada.

²²“Tɔ, daandaan nan Kinaaŋin le che n chaa Jerusalam, amaa maa nyi nan ta li ŋaam nin yaan ni.

²³Amaa maah choon ntim man biɛn nin, Kasi a Naaŋ ti chinn beim le ke kuloondiig nin fala be n nintogil ki guum.

²⁴Amaa n tiɛr ki n miɛfol ye yɔli ki seim, amaa nan kpaa le ye n tun itoon yan wee Uyudaan Yisa nan ta seimin ki diɛ, itoon nmɔn le ye n wɔɔn bininfob tibɔŋann nmɔn Uwonbɔr a nyunyunbasanl bu.

²⁵“Daandaan nan n nyi ke maah nan choon ki mɔɔn Uwonbɔr a naam a bɔrin ki tenn nim ban nin, ni ni uba kaa ji li kan mi.

²⁶Mambu le n bei ni dinan ke, nnɔɔ kaa be uninfosaal biɛn a chamin ni.

²⁷Nan bu-n n pag ni Uwonbɔr a bam a bɔrin biɛn ki wɔɔn na, kaa gur tiba.

²⁸Ni li ŋmag niba nbamɔm nin ipee yan biɛn wee Kasi a Naaŋ ta ŋubin ni nɔɔn ke ni li guu-n. Ni li guu Uwonbɔr a ninfobin na, ban wee U ta U cham ki daa-n.

²⁹N nyi ke maa nan be a bɔɔn ke, tibɔkardam ban nann igbingbelin na li dan ni sisiigin, ki bii Uwonbɔr a ninfob.

³⁰N-yonn chaan le ni ni biba mu na li nya ni tɔɔl a gbanann nin, ki por tibɔkar ki jiin ibamɔn a wɔɔnimin paam, ki lar biwonjiɛm ki che bin nɔɔ bi.

³¹Ni bu, ni li guu ni ba! Ki li tiɛr ke ibin itaa sɔ le n le kpaan ni biɛn nan nin tinyinyinn, nween nin kunyiɛg.

³²“Daandaan nan, n jɔɔ ni ki ŋubin Uwonbɔr a nɔɔn nin U nyunyunbasanl a mɔleen yin bu, U bɔr nmɔn le li fir che ni nɔɔ nbamɔm, ki li fir sei nim ban biɛn wee u ŋa ni u kasi a ninfobin lifaal.

³³Maah nan be ni ban nin, maa nan ban uba a kurninann ni bee salima kaa ban uba a wanyeewaŋi.

³⁴Ni tɔɔl nyi ke min tɔɔl a nɔɔi le n jɔɔ tun, ki lig nba nin n ninɔɔtab.

³⁵Maah tun man nmɔn n wɔɔn ni le ke see ke ti tun takpem wee ki ter bilanjiim, ni li tiɛr Uyudaan Yisa kaah nan len ke: ‘Tikaar be wan pu bu ki jon wan gaan na.’ ”

³⁶Pɔɔl kaah nan pag u bɔr nmɔn ki diɛ n-yonn man nin, le uma nin bi ma biɛn lagin ki gbaan tum ki miɛ Uwonbɔr.

³⁷Bi biɛn nan mɔr le, ki yuur bi nɔɔi paab ki poor u.

³⁸Nan nan bii bi sufu ye waah nan len ke baa ji li nyi ki kan u num paamin bu. Le bi chiɛn u ki jon limɔgilin ke un tan kɔɔ kuŋaluŋ.