Read Konkomba Litoonl 23 Bible Online

Litoonl 23 - Konkomba bible

Litoonl 23

¹Le Pɔɔl lig Juu yaab a yudam nmɔn chiir ki nan len ke, “N nabum, maah be ki nan kpaa dinan, n biɛ n sufu ni ke n tun ki gbeen n toon kaah ye man Uwonbɔr ban na.”

²Waah len man nmɔn, le kumanug a yudaau Ananiɛsi bei ban si ki mal Pɔɔl ke, bin faa Pɔɔl a mɔba.

³Le Pɔɔl bei u ke, “Uwonbɔr li faaŋ, a be le ke ligonl lan kaa ŋan wee bi ta nfatam pɔn li nan le! A ka do le ki ji min tibɔr, nsiim kaah wɔɔn man, amaa le fin tɔɔl bii nsiim nmɔn ki ke bin faam!”

⁴Le ban nan si mal Pɔɔl n nan tiɛn u bu ke, “A ye ŋmiɛ ki nan sugir kumanug a yudaau waa?”

⁵ Le Pɔɔl jiin bi ke, “N nabum, maa nyi ke u ye kumanug a yudaau wi. Ni sɔb Uwonbɔr a gbɔŋin ke, ‘Naa ŋan nin a pag tibɔbir ki jiin bininfob a yudaau paami.’ ”

⁶Pɔɔl kaah biɛ ke Juu yaab a yudam nmɔn biba ye Sadusim yaab, wee biba mu ye Farasiimin, le u pag npɔɔn ke, “N nabum, n ye Farasii a ninfou le, le ki ye Farasii a big. Le baah jim tibɔr tan bu ye maah jɔɔ tama ke bitakpiib naah li fii nkumin nin bu.”

⁷Waah pag man nmɔn le limɔkpel dan Sadusi yaab nin Farasii yaabin a sisiigin, le bi laguŋ nmɔn bɔgir.

⁸(Sadusi yaab len ke bitakpiib kaa yin fii nkumin ni, ke malakam kaa be, le ntinaam mu kaa be. Le Farasii yaab mu ŋa ni biɛn nan yadau.)

⁹Le bi tintann nin nan mann ki do ki kpiɛg. Le ban wɔɔnn Uwonbɔr a siim ki ye Farasiim nan a ni biba fii sir, ki pag nin linunmanl ke, “Taa kan uja nan a biri. “Naa nyi ke nba ke kinaaŋ bee malaka le pag ki sei waa?”

¹⁰Le limɔkpel nmɔn nan fii takpem, hali ke bijawaam nan choo bitɔtogib a yudaau, u nan nyi ke bin yin choo Pɔɔl dar bɔgir le. Mambu le u sei bimɔb ke bitɔtogibin tan nyan Pɔɔl npɔɔn bi ban ni wee ki nan ta u ŋa bi niin na.

¹¹Le niwonn ki nan be kunyiɛg, le Uyudaan dan nan sir Pɔɔl ban ki ke, “Che a sufu li pɔɔu, ke ŋaah pii jin siɛra man Jerusalam, man le a yin ji n siɛra Rom mu.”

¹²Naah nan won kutaag, le Juu yaab biba lagin tab ki kal ki lol, ki poo ke baa yin ji bee ki nyu niba, see ke bi nan ku Pɔɔl.

¹³Ban nan lol man nmɔn nan yab jon bininfob pinau.

¹⁴Le bi jon kumanug a yudam nin bininkpeeb ban ki bei bi ke, “Ti poo tipoor tan pɔɔ le ke taa yin ji niba see ke ti nan ku Pɔɔl.

¹⁵Daandaan nan ti ban nim le n sir Juu yaab a yudam a taalin ki tun u ba wee un jo bitɔtogib a yudaau n ban, ki tan bei u ke un ta Pɔɔl dan ni ban, ke ni ban ni baan u le ki mann biɛ u bɔr nmɔn nbamɔm. Amaa ti li ku u ke waa la foon do.”

¹⁶Amaa Pɔɔl a ninsa a big kaah gbir bi lol nmɔn nin, le u jon bitɔtogib a niin nmɔn yaan ki tan bei Pɔɔl.

¹⁷Le Pɔɔl yin bitɔtogib a sanliiru uba, ki bei u ke, “Ta Unaachipɔɔn nan ki jo ni yudaau ban, u jɔɔ tibɔr tiba le ki yin bei u.”

¹⁸Le u ta u jon bitɔtogib a yudaau ban. Le ki tan bei u ke, “Pɔɔl wan ye uloondiikɔɔrin le ke n ta Unaachipɔɔn nan ki dan a ban ke u jɔɔ tibɔr tiba le ki yin beiŋ.”

¹⁹Le bitɔtogib a yudaau choo Unaachipɔɔn nin a nɔɔ ki ta u nyan ngbaan, ki tan baan u ke, “Ba a bɔr wee a yin beim maa?”

²⁰Le u ke: “Juu yaab le kpaag bimɔb ki ban a won nyan Pɔɔl ki che bin ta u ki dan Juu yaab a yudam ban, ke bi ban bin mann ki baan u le ki biɛ u bɔr a sam nbamɔm.

²¹Laa gar bi paam mi, nan bu-n Juu yaab a jab biba bi yab jon bijab pinau le ki woo kulɔŋ ki guu u. Bi biɛn poo tipoor le ke baa yin ji bee ki nyu niba see ke bi nan ku Pɔɔl. Bi pii ŋa sili le ki guu ŋaah li jiin bi man.”

²²Le bitɔtogib a yudaau nan chabir Unaachipɔɔn nmɔn ki kpaan u ke, “Laa bei u ba ke a poor tibɔr nan ki seim mi.”

²³Le bitɔtogib a yudaau win yin u sanliib bilee ki bei bi ke, “Ni ta bitɔtogib kobilee nin bitanjigib pilile, ki ta bikpantɔgib mu kobilee, ki ŋa sili ki jo Sizariya. Ni nya tikur tiwiɛ a yonn dinan a nyiɛg nan ki jo.

²⁴Ni ta utaan ki sei Pɔɔl wee un jig, ki ta u ki jo ubɔr Fɛlisi ban soon ki laa che un kan kidaŋi.”

²⁵U nan sɔb kugbɔŋ le ki sei bi ke bin ta tan sei ubɔr Fɛlisi, le kugbɔŋ nmɔn wɔɔn ke,

²⁶Min Kuladiyasi Lisiɛ le sɔb kugbɔŋ nan, ki poor jilimadaan ubɔr Fɛlisi.

²⁷Juu yaab le nan choo uja nan, ki yin ku u, le n gbir ke u ye Rom a ninfou le. Ni ma bu le n ta bitɔtogib ki jon tan fee u.

²⁸N nan ban n biɛ nan bu wee bi choo u le, mambu le n nan ta u ki jon bi ma Juu yaa a yudam ban.

²⁹N biɛ ke ni ye bi tɔɔl a siim bu le bi galin u nmɔn, amaa naa ye u galin niba le wee ni kpaan nin un kpo, bee bin loon u n diin ni.

³⁰Le bi beim ke Juu yaab lolig le ke bin ku u, mambu le n ke bitɔtogib nan n ta u ki dan a ban weem, n bei ban galin u nmɔn ke, bin dan a ban ki nan wɔɔŋ u bir kaah ye tan.

³¹Le bitɔtogib nmɔn nan tun ke bi yudaau kaah wɔɔn bi man ni, ki ta Pɔɔl kunyiɛg nmɔn ki jon kitiŋ kan wee bi yi ki ke Antipatirisi nan.

³²Le ni won kutaag, le bitanjigibin ta u ki jon, le ban nan choon tumin ma nan jir kun bi niin.

³³Bitanjigibin kaah tan foo Sizariya n-yonn man nin, le bi ta kugbɔŋin sei ubɔr, ki ta Pɔɔl ŋubin u.

³⁴Le ubɔr karin kugbɔŋin le ki baan u waah nyan nan yaan. Le ki biɛ ke u nyan Silisiya le,

³⁵Le u bei u ke, “Ban galiŋin foon n-yonn man ke, n li gbir a bɔr nmɔn.” Le ki sei bimɔb ke ban guun li ŋmag u ubɔr Herɔd a bɔr naakoon na.