Read Konkomba Litoonl 24 Bible Online

Litoonl 24 - Konkomba bible

Litoonl 24

¹Iweehn iŋmu daal, le kumanug a yudaau Ananiɛsi, nin bininkpeeb, nin Rom yaab a bɔjiru wan wee bi yi u ke Tetulusi nan, foo Sizariya ki pag galin Pɔɔl ubɔr Fɛlisi ban.

²Baah nan yin Pɔɔl kɔɔn n-yonn man nin, le Tetulusi nan pag Pɔɔl a bɔr ki wɔɔn Fɛlisi ke: “Ubɔr Fɛlisi fin bu le ti kan nposɔɔn kitiŋ nan, nin ŋaah tiɛr wonbu le a jɔɔ ki mann ki tiŋ nan.

³Jilima daan Fɛlisi, ti jɔɔ npopeen nan yaan biɛn nin niwann biɛn nin, ki tenniŋ kunɔɔpoog takpem ni bu.

⁴Amaa maa ban n bii a saŋiyi, n baliŋ le ke a mɔr ki gbir ti bɔr nan wamau.

⁵“Ti kan uja nan le n miin u ye kuŋmaruŋ daan le, ki jɔɔ limɔyiil Juu yaab a tingbɔŋ nan yaan biɛn. U ye bikɔnbam a sanliiru le ki be Nazarif yaab a wonjiɛmin,

⁶hali u nan ban un bii iwonjiɛn niin nin le. Ni bu le ti choo u.

⁷[14] Amaa le bitɔtogib a yudaau Lasiya nan fee u ti ban npɔɔn.

⁸Ni ye a tɔɔl baan uja nan ke, a li biɛ nan biɛn bu wee ti pag ki galin u nan a bamɔn.”

⁹Le Juu yaab nmɔn kpiɛ u bu ki ke waah pag man nmɔn sin ye ibamɔn le.

¹⁰Ubɔr nmɔn kaah wɔɔn Pɔɔl nnɔɔ ke un fii ki pagin: Le Pɔɔl ke, “N nyi ke ŋaah ŋa ubɔjir ti tingbɔŋ nan yaan, ni ŋa ibin takpem ma. Mambu, ni ŋaam npopeen pam nin maah yin ji min tɔɔl a siɛra a ban.

¹¹A li fir ki feen ki biɛ ke naah laa jon iweehn piig nin ilee le n nan jon Jerusalam ke n tan jiɛn Uwonbɔr.

¹²Ban galin min kaa kan maah far bininfob limɔkpel iwonjiɛn niin man ni, bee ki fiin bi ŋuui tiwonjiɛndirin ni, bee kitiŋ nmɔn yaan ni.

¹³Le bi mu kaa ji li fir pag wɔɔniŋ n galin kaah ye nan ni.

¹⁴Amaa, n che ke, n jiɛn Uwonbɔr wan ye ti yaajam a weemin le, ki nɔɔ u siimin, man wee bi ke maa ye ibamɔn nin. N ŋa nan sɔb nsiim a gbɔŋin nin nan sɔb Uwonbɔr a linlem a gbann nin yaan biɛn yadau,

¹⁵le n jɔɔ tama uba le nin Uwonbɔr ke baah jɔɔ man nin, ke nkum a fiim na li be ki sei bininfoŋam nin bipootondam.

¹⁶Mambu, n pɔɔn n baa le iyoo biɛn ke n tun nan kpaan, wee n sufu li be nbamɔm nin Uwonbɔr nin uninfosaal ban.

¹⁷“Maah nyan Jerusalam ni yuur pam, le n nan jir niin ki ŋmag ipiin ke n ta sei n ninfob ban ye bilanjiimin, ki sin mann kumanug.

¹⁸Bi nan nan kam ki miin n nan mann nba le ki be kasi iwonjiɛn niin ki mann kumanug nmɔn. Iyaayoo nmɔn bininfob takpem kaa nan be niin ni, le tifur mu kaa nan be.

¹⁹Amaa Juu yaab biba nan nyan Asiya a tingbɔŋin ki be iwonjiɛn niin nan yaan. Ni bi ye bi kan n bir ke, ni kpaa talar le nin bin dan ki nan pag biim.

²⁰Bee ban be do nan, che bin wɔɔn tibir tan wee bi nan kan n tun, maah nan sir Juu yaab a yudam a nintogilin.

²¹See limɔbonl liba lan wee n nan tiɛn ki pag bi sisiigin ke, “Bitakpiib na li fii nkumin nin bu le n si a nintogil dinan nan.”

²²Fɛlisi ma kaah nan nyi Yisa a san nmɔn a nɔɔm nbamɔmin bu le u jiɛn tibɔrin, le ki ke, “Bitɔtogib a yudaau Lasiya nan foon n-yonn man ke, n li ji ni bɔr nmɔn.”

²³Le ki nan bei bitɔtogib a sanliiru uba ke u li guu Pɔɔl, ki che u li be u wiiba, ki che Pɔɔl a jɔtiib li tenn u nan wee u ban na.

²⁴Ni bɔɔn bu, le Fɛlisi dan tibɔr a ji bol, u ma nin u poo Dirusila, wan nan ye Juu a bisiɛg nan, le ki che bi yin Pɔɔl ki dan bi ban. Le Pɔɔl pag uninfo kaah li ŋa Yisa Masiya yada man, le u pelig.

²⁵Pɔɔl kaah nan pag ki wɔɔn nbuchin binben nin ba a ŋmagim nin tibɔr a jidaal a yonn kaah yin foon man nin, le bijawaam choo Fɛlisi, le u ke, “Ni li kpaan man daandaan nan! Li chaau. Amaa ni ye n kan isaŋ ke n ji li yiŋ.”

²⁶Fɛlisi nan ban Pɔɔl n kɔɔ u bu nin ilig le, ni ma bu le u nan gbaa yi u ki pag nin u.

²⁷Ibin ilee kaah jon a bɔɔn le Posiɛ Fetusi mu gaa Fɛlisi a ninkper nmɔn. Fɛlisi kaah nan yin fii lijalin bu-n, u nan ban un penn Juu yaab a pooi le, mambu le u che Pɔɔl be kuloondiigin.