Read Konkomba Litoonl 25 Bible Online

Litoonl 25 - Konkomba bible

Litoonl 25

¹Fetusi kaah nan foo Sizariya iweehn itaa daal le u nyan nin yaan ki jon Jerusalam,

²niin le biminmanib a yudam nin Juu yaab a yudam dan Fetusi ban ki nan pag ki galin Pɔɔl.

³Le ki balin Fetusi nin linunmanl ke un chee ki tun baah ban man nin sei ba wee ki nyan Pɔɔl Sizariya a tiŋin ki ta u dan Jerusalam, amaa bi nan ban bin woon ku Pɔɔl le nsann.

⁴Le Fetusi jiin bi ke, “Bi la ŋmag Pɔɔl Sizariya a tiŋin, min tɔɔl chaa niin le daandaan nan.

⁵Che ni sanliib biba n nɔɔm ki jo, ni ye u tan jɔɔ igalin ke ni galin mu.”

⁶Fetusi kaah nan be bi ban ki tan kpaa iweehn iniin bee piig nan, ni bɔɔn bu le u jir Sizariya, ki won kutaag, le u kal u bɔr binbinl bu ki che bi ta Pɔɔl dan u ban.

⁷Pɔɔl kaah foon n-yonn man nin, le Juu yaab ban nan nyan Jerusalam nan fii sir ki gɔɔn u, ki pag galin Pɔɔl tibɔr tan wee baa li fir ji ti siɛra.

⁸Le Pɔɔl jin uba a siɛra ki ke, “Maa tun niba ki bii Juu yaab a siimi, bee ki bii iwonjiɛn niin ni bee ubɔr Siiza.”

⁹Fetusi kaah nan ban un sɔŋ Juu yaab a sufu nni, le u baan Pɔɔl ke, “A li ban a jo Jerusalam wee n tan ji a bɔr tan wee bi pag ki galiŋ nan niin naa?”

¹⁰Le Pɔɔl jiin ke, “N le la si ubɔr Siiza a nintogil le u naakoon, nan yaan ŋan ki kpaan ni ji n bɔr. Maa tun niba ki bii Juu yaabi, ke fin tɔɔl kaah nyi ni nbamɔm man nin.

¹¹Ni ye n bi jɔɔ niba a galin yan wee n tun wee ni kpaan nin n kpo ke, maa yii nkumi. Amaa ni ye bi por tibɔkar le seim ke, uba kaa li fir taam ki ŋubin bi nɔɔn ni. N balin ubɔr Siiza le ke un ji n bɔr nmɔn!”

¹²Le Fetusi ta tibɔr nmɔn ki gbeer u ninkpeeb, le ki bei Pɔɔl ke, “A balin ubɔr Siiza ke Siiza ban le a li jo.”

¹³Le ni ŋa iweehn ilee le ubɔr Agiripa nin Bɛnisi dan Sizariya ke bin nan poor ubɔr Fetusi.

¹⁴Baah nan be niin idaa takpem nmɔn nan che Fetusi nan wɔɔn ubɔr Agiripa Pɔɔl a bɔr kaah ye man na, ki ke: “Uja uba be do le Fɛlisi nan jiɛn u ŋa kuloondiigin.

¹⁵Maah nan jon Jerusalam n-yonn man ni, le biminmanib a yudam nin Juu yaab a ninkpeeb nan pag ki galin u, ki ke u kpaan nin nkum le.

¹⁶Le n bei bi ke, “Tim Rom yaab a kaal kaa chee man ni, ni ye bi pag ki galin uninfo uba ke, ti che bi lagin tab le ki gbir baah pag ki galin u nan bu, ki che u mu n len u bamɔn kaah ye man.

¹⁷Baah dan n ban nin tibɔr nmɔn, maa bii isaŋi, ni nan won kutaag le n che bi lagin n naakoon, le ki che bi ta Pɔɔl kɔɔn.

¹⁸Ban nan pag ki galin u nan kaah fii bin pag, baa nan fir pag ki galin u ki jiin tibir tan paam wee n bi tiɛrin ni.

¹⁹Amaa bi le far u limɔkpel le ki jiin bi wonjiɛnl paam, nin utakpiir wan wee bi nan yi u ke Yisa nan, wee Pɔɔl ke u be u miɛfolin nin bu.

²⁰N sufu nan ŋmarin le maah li ji tibɔr nmɔn man; mambu le che n baan u ke un bin chee ki jo Jerusalam wee n tan ji u bɔr nmɔn niin.

²¹Le Pɔɔl balin ke bi li ŋmag u ki nan kpaa lidaal lan wee Siiza na li ji u bɔr. Mambu le n che bi guu u ke n nan ta u jo ubɔr Siiza ban.”

²²Le ubɔr Agiripa bei Fetusi ke, “Min tɔɔl ban n gbir uja nmɔn a mɔn.” Le u jiin bei u ke, “Won nan, a wo li gbir u mɔn.”

²³Le ni won kutaag, le ubɔr Agiripa nin Bɛnisi nan ji kunaachuŋ ki tan kɔɔ kulaguŋ a diigin le bitɔtob a ninkpeeb nin kitiŋ nmɔn a ninkpeeb nɔɔ u. Le Fetusi che bi ta Pɔɔl kɔɔn.

²⁴Le Fetusi ke: “Ubɔr Agiripa, nin nim ban biɛn be ti ban nan, ni kan uja nan na! U ma le Juu yaab ban be Jerusalam nin ban biɛn be Sizariya nan dan n ban nin u bɔr, ki galin u, ki fu u bu, ki ke naa kpaan nin un be.

²⁵Amaa min kaa kan tibir tan wee u tun ni wee ni kpaan nin un kpo, amaa waah balin ubɔr yudaan nin, n yin ta u le jo Rom.

²⁶Amaa maa nyi ma yin sɔb kugbɔŋ ki pag u bɔr man ki sei ubɔr yudaan ni. Ni ma che n ŋmag u dan ni biɛn ban, nin ubɔr Agiripa ban diginn. Ubɔr Agiripa kaah li baan u ibinbaan ki feen u a bɔɔn le n ni li kan maah li sɔb nan ki sei u.

²⁷Nan bu-n n tiɛr ki miin naa yin jɔɔ itaa nin n che uloondiikɔɔr n jo ubɔr yudaan ban, wee kaa li fir wɔɔn waah bii nan ni.”