Read Konkomba Litoonl 28 Bible Online

Litoonl 28 - Konkomba bible

Litoonl 28

¹Taah nan gbaa don limɔgilin a dool ki diɛ, ni bɔɔn bu le ti biɛ ke ligungonl lan be nnyum a sisiigin nin a yinl ye Malita le.

²Bininfob ban a niin nan be niin nmɔn nan ŋmag ti nbamɔm pam. Bi nan mann nŋmi le ki sei ti ke ti li wora le ki sin poor ti nin ti foom, nan bu-n utaal le nan nun le tiwar be.

³Le Pɔɔl tan pii tidagingann ki piɛn pii kijageŋ ki nan ŋa nŋmi-n, le nŋmi-n a tom gbir uwa-n le u nyan ki nan finfin Pɔɔl a nɔɔ ki junn ki jɔn.

⁴Ligungonl nmɔn a paab a ninfob kaah kan uwa-n kaah jɔn Pɔɔl a nɔɔ bu man nin, le bi bei tab ke, “Uja nan ye uninfokur le, nin waah le ŋmar limɔgil nan a poolin nan biɛn yɔli, bitakpiib kaa yin jiɛn un be u miɛfolin ni.”

⁵Le Pɔɔl gbag u nɔɔ le uwa-n lu nŋmi-n yaan, amaa le naa ŋa Pɔɔl niba hali wama.

⁶Le bininfobin ni nan ka ki tiɛr ke u nɔɔ li duun bee u li nyan lu ki kpo. Baah pel pel ki nan bag kaa kan niba ŋa Pɔɔl nan, le bi ji kpenn bi potiɛl ki ke u ye litingbanl le.

⁷Nin yaan kaa nan fɔg nin ubɔr Pubilisi a kpaabin ni, u ma nan ye ligungonl nmɔn a bɔru. Le u gaa ti kuchɔŋ ki tan kpaa iweehn itaa.

⁸Kugbanantuntoŋ nin kupoomarug le nan jɔɔ Pubilisi a baa le u dɔ. Le Pɔɔl kɔɔ u ban ndiin ki tan ta u nɔɔ ki paan u bu ki miɛ Uwonbɔr sei u le u pɔɔg.

⁹Naah nan tun man nmɔn le bibaarib ban nan gur ki be ligungonl nmɔn yaan biɛn dan le u teb bi.

¹⁰Bi nan pu ti ipiin takpema, le taah ji nan nan be ŋaan sili nin ti fii kɔɔ kuŋaluŋin n-yonn man nin, le bi ji nan ta nan biɛn wee ti li ban nsann bu-n, ki kɔɔn kuŋaluŋin yaan ki sei ti.

¹¹Ti nan be Malita iŋmal itaa le, ni bɔɔn bu le ti kɔɔ kuŋaluŋ kan nan be niin tiwar nin kufaag a yonn nin, kuŋaluŋ nmɔn nan nyan kitiŋ kan wee bi yi ki ke, Alɛgzandira nle, bi nan yi kuŋaluŋ nmɔn ke, “Tijaann a weem.” Ti nan kɔɔ kuŋaluŋ nmɔn le ki jon.

¹²Ki tan foo kitiŋ kiba bi yi ki ke, Sarakuse, ti nan be niin iweehn itaa le.

¹³Le ki tɔɔr jon Regiɛm a tiŋin. Le ni won kutaag le ntafaam yaan ti nan nyan nnɔɔganpaam ki daar ti, le iweehn ilee daal le ti foo Putoli a tiŋin.

¹⁴Nin yaan le ti kan nnabum biba. Le bi bei ti ke, ti li be bi ban ki tan kpaa iweehn ilile. Le ti be bi ban ki nan nyan jon Rom.

¹⁵Nnabum man be niin nin nan gbir taah chaan na, le bi fii ki kenn ti Apiu a nyaŋin, le bi ba mu kenn ti ichanniin yan kpiɛ itaa ki mal Rom a tiŋin ni. Pɔɔl kaah kan bi n-yonn man ni, le ni sei u ngbananpɔɔn, le u poor Uwonbɔr.

¹⁶Taah foo Rom n-yonn man nin, le bi jaa Pɔɔl le u be iniin le utɔtogir guu u.

¹⁷Ni ween itaa a bɔɔn le Pɔɔl yin Juu yaab a yudam ki lagin tab. Baah lagin tab n-yonn man ni, le Pɔɔl bei bi ke: “N nabum, maa tun niba ki bii ti ninfob bee ti yaajam a kaali, amaa le bi nan choom ki taam ŋa kuloondiigin Jerusalam, le ki nan taam ŋubin Rom yaab a nɔɔn.

¹⁸Le bi baanim ibinbaan, ki nan ban bin jaam, nan bu-n baa nan kan n galin yan kpaan nin bin ku mi.

¹⁹Amaa le Juu yaab ban kaa nan chee bin jaamin bu, le n nan ke n balin ubɔr Siiza le, amaa naa ye n ban n pag galin n ninfob le.

²⁰Mambu le n ke bin che n kan ni ki bei ni tibɔr nmɔn. Iziral yaab biɛn kaah jɔɔ tama wan nin bu le bi lolim tikulor nan.”

²¹Le bi jiin u ke, “Taa kan tigbann nyan Judiya ki pag a bɔri, le ti nabum ban nyan niin nan kaa pag niba ti ban ki bii ŋi.

²²Amaa ti ban ti biɛ a potiɛl le, ti pii nyi ke nwonjiɛn san man wee a nɔɔ nan, bininfob takpem li pag ki bii mi iyag biɛn.”

²³Le bi nan siin lidaal lan wee bi li jir u ban, le bininfob takpem nan lagin u niin kɔɔ kaai nmɔn yaan le u piin ki wɔɔn bi Uwonbɔr a naam a bɔr njakpanyiɛn ki tan kpaa kujɔɔg, ki wɔɔn bi Yisa a bɔr tan be Moziz a siimin yaan, nin Uwonbɔr a linlem a sɔbimin kaah ye man ki gbaar un kpenn bi potiɛl wee bin ŋa Yisa yada.

²⁴Biba a potiɛl nan kpenn u bɔr nmɔn buu, amaa biba mu kaa nan ŋa ti yada.

²⁵Le limɔkpel nan dan bi sisiigin le bi piin ki worin, baah gbir Pɔɔl a mɔboi joor kaai n-yaa bɔɔn ke. “Kasi a Naaŋ nan pag ibamɔn le ki sei ulinlenn Azaya, le u pag ki sei ni Yaajam:

²⁶‘Li chaa ki tan bei bininfob nan ke, Ni le yin gbir le kaa yin biɛ ni taai yi; ni le yin lig le kaa sin yin kan ni.

²⁷ Bininfobin a sufu le pɔɔ; le bi kpaa bi tuli ke bi laa gbiri, ki ji dabin bi num. Naa bi ye man ke, bi bi li kan nin bi num, ki gbir nin bi tuli, ki biɛ ni taai bi sufu ni, ki kpenn bi binbem wee n teb bi.’

²⁸“Mambu n ban ni biɛ le ke, Uwonbɔr a feeja a bɔr foon ban kaa ye Juu yaab n ban na, le bi li gbir ti!”

²⁹[16] Pɔɔl kaah nan len man nmɔn a bɔɔn, le Juu yaab nan fɔɔr niin ki far tab limɔkpel.

³⁰Pɔɔl nan be kudiig nmɔn yaan ibin ilee le ki yɔ ku bu. Le uninfo wan biɛn dan u ban ke un gaa u nbamɔm.

³¹U nan mɔɔn Uwonbɔr a naamin a bɔr le, ki wɔɔn bininfob Uyudaan Yisa Masiya a bɔr nin lipoobil le uba kaa ŋɔɔr wi.