Read Konkomba Litoonl 3 Bible Online

Litoonl 3 - Konkomba bible

Litoonl 3

¹Weemba a ween tikur titaa a yoo le Piita nin Jɔnn nan chaa iwonjiɛn niin liwonmiɛl a yoo.

²Le bi nan kan baah tu uja wan pii nan wɔb u maalim nin ki tan bil iwonjiɛn niin a timansanmɔnn man wee bi yi ntimansanmɔnn ŋan nin. Bi nan tug u tan bilig man le iweehn biɛn, ke u li miɛ ilig ban chaan iwonjiɛn niin a loobin ban.

³N-yonn man wee u nan kan Piita nin Jɔnn wee bi yin kɔɔn, le u miɛ bi ilig.

⁴Le Piita nin Jɔnn lig u chimm, le Piita nan bei u ke “Lig ta!”

⁵Le u ni mir lig bi, ki nyi ke u yin kan niba le bi ban.

⁶Amaa le Piita bei u ke, “Maa jɔɔ iligi, amaa maah jɔɔ nan le n yin ta seiŋ nan. Yisa Masiya wan nyan Nazarif nan a yinl bu, fii choon na.”

⁷Le ki choo u nɔɔjiim ki fiin u, libol nmɔn le uja-n a taafar nin u talangbin pɔɔg.

⁸Le u yug sir u taai bu, le ki piin ki choon jin. Le ki nɔɔ bi kɔɔ iwonjiɛn niin ni, ki choon ki yugir ki mabir, ki pag don Uwonbɔr.

⁹Bininfobin biɛn kaah nan kan waah choon ki pagir Uwonbɔr man nin,

¹⁰le bi biɛ ke uma ye uja wan nan ka iwonjiɛn niin n-yaa timansanmɔnn ŋan n-yaan ki miɛ-n, le ni ŋaa bi lijinjeel nin ligaril naah ŋa wee u nan chonn.

¹¹Umiɛr nmɔn kaah la nan ŋmag Piita nin Jɔnn nin, le ni ŋa bininfobin biɛn ligaril, le bi guun lagin bi ban, baah nan lagin tab nan yaan nmɔn le bi yi ke Solomɔnn a dɔŋin.

¹²Piita kaah kan bininfobin n-yonn man nin, le u bei bi ke: “Nim Iziral yaab, ba ŋa wee ni gar ni uninfo nan buu? Ba ŋa wee ni lig ti, a li ke tim a pɔɔm bee ti binben ŋam bu le che kuwɔbig nmɔn fii ki choon naa?

¹³Uwonbɔr wan nan ye Abiraham nin Azig nin Jekɔb nin ti yaajam a Wonbɔru nan, U ma ye wan don U toon tun, Yisa le ni ta u ki ŋubin bi yudam a nɔɔn ke bin ku u, le Palati nan bigin un jaa u, le ni ji yii u Palati a nintogil.

¹⁴Ni yii Kasi daan nin Ubuchin daan le ki bei Palati ke un nyan uninfo kurin ki sei ni.

¹⁵Nim le ku limiɛfol daan nmɔn, amaa le Uwonbɔr fiin u nkumin. Le tim le ye ni siɛradam.

¹⁶“Yada nin Yisa a yinl bu le uja wan wee ni kan ki nyi u nan pɔɔg ki fin choon, waah ŋa Yisa a yinlin yada n bu. Yada kan wee u jɔɔn le che u kan kutebug ni biɛn a numin.

¹⁷“Tɔ, n nabum, n nyi ke nim nin ni sanliibin biɛn nan tun nan wee naa nyi le.

¹⁸Amaa ni ye nan wee Uwonbɔr nan tun ki gbeen nan wee u nan chinn che u linlemin biɛn pag ke U Masiya nan li ji fala-n.

¹⁹Mambu, ni kpenn ni binbema ki dan Uwonbɔr ban, wee un ŋunn ni toonbir, ni ŋa man na wee npɔŋim a yonn nnya Uyudaan ban ki foon,

²⁰U li tun Masiya ni ban, wan wee u pii nan gann u ki sei ni nan, u ma ye Yisa.

²¹Yisa nmɔn la yin be Uwonbɔr a niin le, hali nin iyoo kaah na li foon, le Uwonbɔr n mann tiwann biɛn, ke waah nan che U kasi a linlem pag iyoo yan nan jon nin.

²²“Nan bu-n Moziz len ke, ‘Uyudaan wan ye ni Uwonbɔr win li nyan ulinlenn uba wan be ke min nan ni tɔɔl a bolin; ki sei ni, ni pelim nan biɛn wee u li pag ki sei ni nan.

²³Le uninfo wan kaa pelig u bɔr ke, Uwonbɔr li nyan udaan u ninfobin.’

²⁴“Ibamɔn, ulinlenn Samɔɔl, nin bilinlem ban ŋɔɔrin u bɔɔn, nan biɛn nan pag nan tun daandaan nan na.

²⁵ Nim le ye bilinlem nmɔn a naachim nin tipoor tan wee Uwonbɔr nan poo sei ni yaajamin. U nan bei Abiraham ke, ‘A yaabil uba bu tikaar npii dulinya nan yaab biɛn.’

²⁶Uwonbɔr kaah nan gann U toon tun wi, u nan chinn tun u ni ban le, ke un kpenn ni pootom a binbem wee u kaar n nin fir pii ni.”