Read Konkomba Litoonl 6 Bible Online

Litoonl 6 - Konkomba bible

Litoonl 6

¹N-yonn man wee Yisa a bɔɔnɔɔb nan mann kpiɛgin, le Juu yaab ban pag Girig a leen yin, nan ŋulin Juu yaab ban pag Hiiburu a leen yin bu, nan bu-n bi pukɔɔi kaa nan gaan tijiir naah bi ye bi li gaan man ni ni.

²Le itoon piig nin bilee-n yin Yisa a bɔɔnɔɔbin biɛn ki lagin tab, ki bei bi ke, “Naa ŋan nin ti jiɛn Uwonbɔr a bɔr a mɔɔnim ki paar tijiir a tolimin ni.

³N nabum, ni lig wee ki gann bijab bilile ni sisiigin, ban wee ni nyi ke bi gbee nin Kinaaŋin nin nlam gɔr kaam, wee ti ta man a toon ki sei bi,

⁴wee tim nta ti tɔɔl a saŋi ki ŋa liwonmiɛlin, nin Uwonbɔr a bɔrin a wɔɔnimin.”

⁵Ni nan gbee bininfobin biɛn a numa, le bi gann Sitifin, wan gbee nin Kasi a Naaŋ ki jɔɔ yada nan, nin Filib, Pirokorusi, nin Nikanor, nin Timonn, nin Pamenasi, nin Nikolasi, wan nan nyan Antiɛg wee ki kpenn u wonjiɛnl ki nɔɔ Juu yaab a wonjiɛnlin.

⁶Le bi ta bi jon itoon nan ban, le bi ta bi nɔɔi ki paan bi bu ki miɛ Uwonbɔr ki sei bi.

⁷Le bi mann mɔɔn Uwonbɔr a bɔrin. Le Yisa a bɔɔnɔɔb ban be Jerusalam nan a kanl nan kpiɛ weem weem, le Uwonbɔr a minmanib takpem chee Yisa a bɔŋann nin ki ŋa u yada.

⁸Daandaan nan, Sitifin uja wan wee Uwonbɔr a nyunyunbasanl nin u pɔɔm nan be u bu-n, u nan tun ligaril a siɛra nin lijinjeel a toon le bininfobin a sisiigin.

⁹Le bininfob biba nan fii ki yii Sitifin a bɔr, bi nan ye ‘Yemba’ le ki nyan ban nan kan nŋmarim ki be Juu yaab a wonjiɛn[5] bolin (ke baah yi bi man ni) bi nan nyan Sarene nin Alɛgzandira nin Silisiya, nin Asiya le. Le bi biɛn nan piin ki far limɔkpel nin Sitifin.

¹⁰Amaa baa nan fir pag nyaŋ Sitifin ni, nan bu-n u na pag nin nlam gɔr kaam le nin Kinaaŋ a pɔɔm.

¹¹Le bi kɔɔ bininfob biba bu ki gbaa bi ke bin len ke, “Ti gbir waah pag imɔbon iba ki sugir Moziz nin Uwonbɔr.”

¹²Baah len man n-yonn man nin, le bininfobin, nin bininkpeebin, nin ban wɔɔnn Uwonbɔr a siimin a ŋuui fii, le bi fii ki choo Sitifin, ki ta u jon Juu yaab a yudamin ban.

¹³Le bi ji ŋmag bininfob biba ni, ki ke bin por tibɔkar ke, “Iyoo biɛn uja nan le choon le ki pag ki bii iwonjiɛn niin nin Moziz a siimin.

¹⁴Nan bu-n ti gbir u ke Yisa wan ye Nazarif a ninfo win li ber iwonjiɛn niin ki ji kpenn Moziz a kaal lan wee u nan ta sei ti nan.”

¹⁵Le ban nan lagin ka Juu yaab a yudam a laguŋ nmɔn yaan biɛn nan ta bi numbili ki kpaa Sitifin, ki nan kan u num paam kaah nann Malaka a num.