Read Konkomba Litoonl 7 Bible Online

Litoonl 7 - Konkomba bible

Litoonl 7

¹Le biminmanib a yudaau baan Sitifin ke, “Baah galiŋ man nan sin ye ibamɔn naa?”

²Le Sitifin jiin ke, “N nabum nin n baam, ni pel n bɔr nan na man! N-yonn man wee ti yaaja Abiraham nan be Mesopotamiya a tingbɔŋin, iyaayoo ki miin waa la jon Haran ni, le Uwonbɔr a pag degir u bu.

³ Ki bei u ke, ‘Nya a tiŋin nin a ninfobin; wee ki li chaa kitiŋ kan wee n li wɔɔn niŋ nan.’

⁴“Iyaayoo nmɔn le u fii ki jiɛn Chalidiɛn a tiŋ nmɔn, le ki jon ki tan kal Haran. U baa a kum a bɔɔn le Uwonbɔr che u fii niin, ki dan kitiŋ kan yaan wee ni nin be nan.

⁵Waa nan sei u kitiŋ a faali, hali waa nan ta kitiŋ nmɔn a bɔgil wama ki sei wi. Amaa le ki siin limɔsiinl ke u li sei, u ma nin u yaabili ki tiŋ nmɔn, hali nin Abiraham kaah kaa la nan jɔɔ kibig nan.

⁶Uwonbɔr nan bei u nan le: ‘A yaabili na yin ye bicham le kitiŋ kan kaa ye bi yaagi, le bi li ŋa bi biyom niin, ki kan limugil takpem, ki tan kpaa ibin kobina.

⁷Amaa N li dar libol lan che bi tun tenn bi ke biyom nan a tul. Ni bɔɔn bu, N li nyan bi kitiŋ nmɔn yaan, ki dan kitiŋ nan yaan, ki nan jiɛnim.’

⁸Uwonbɔr nan siin lipunjiil a mɔsiinl le ki sei Abiraham. Le Abiraham nan ma Azig, le ki nan jii u punl iween itaa daal. Le Azig mu nan ma Jekɔb, le Jekɔb mu nan ma u naachim piig nin bilee-n, ban ye ti yaajaninkpeebin.

⁹“Jekɔb a naachim nmɔn kaah nan jɔɔ lipiiponl bi waal Josef bu-n, le bi nan choo u kɔɔr sei Ijibir yaab ke uyomin. Amaa Uwonbɔr nan be nin u,

¹⁰le ki nyan u limugil nmɔn biɛn nin. Ki sei Josef nlam, ki che Ijibir a bɔr yudaau Faro ban u bɔr; ki ŋa u uyudaan Ijibir a tiŋin nin u niin biɛn.

¹¹“Le nkom nan lu Ijibir a tiŋin nin Kenn a tiŋin biɛn, le fala choo bininfob ke ni bir, le ti yaajam a jiir par.

¹²Jekɔb kaah nan gbir ke tijiir be Ijibir n-yonn man ni, le u tun u buwaab niin. Ni ma nan ye bi chinchinn a chaam Ijibir.

¹³“Bi chaam man nan kpiɛ milee-n, le Josef nin che u nabum nmɔn biɛ u, le Faro nin biɛ Josef a niin yaab.

¹⁴Ni bɔɔn bu le Josef nin tun bi ke bin tan ta u baa Jekɔb nin u niin yaab dan Ijibir ni, bi nan ye bininfob pilile nin bi ŋmu le.

¹⁵“Le Jekɔb nin u niin yaab fii jon Ijibir ki tan kal, bi nan be niin le u ma nin ti yaajam biɛn nan kpo.

¹⁶Le bi ta bi gbanann kun Sekim ki tan pii kukaag kan wee Abiraham nan ta ilig ki daa ki Hamor a naachim ban nin.

¹⁷“N-yonn kaah nan nan mal nin Uwonbɔr ngbeen U mɔsiinl lan wee U nan siin sei Abiraham nan, ki miin ti ninfob Iziral yaab ban nan be Ijibir ni nan yab pam.

¹⁸Ni bɔɔn bu le ubɔr uba nan jin Ijibir a naam, u mu kaa nan nyi Josef bu.

¹⁹Le ubɔr nmɔn nan ŋmag ti ninfobin nŋmag birim, ki to bi bu takpem, ki ji mug ti yaajamin ke bin nyan bi biliɛm bi niin yin ki ta bi gaba wee bin kpo.

²⁰“Iyaayoo le bi nan nan ma Moziz, le waah nann u biliɛtabi, ki be u baa a niin iŋmal itaa.

²¹Baah nan nyan u iniin n-yonn man nin, le u bɔrin a bisa kan u ki ta u ki wubir u, ke u tɔɔl a bija-n.

²²Le bi nan wɔɔn Moziz nlam man biɛn wee Ijibir yaab jɔɔ, le u ŋa uninfoja u leen yin nin u toon yin.

²³“Moziz kaah nan nan foo ibin pina n-yonn man nin, le u nan bon ke un gɔnn u bol a ninfob Iziral yaab.

²⁴Waah nan choon gɔnn bi nan, le ki nan kan Ijibir a ninfou kaah mugir Iziral a ninfou, le u dan ki nan fee u ki jaa, ki ku Ijibir a ninfo win.

²⁵Moziz nan tiɛr ke u tɔɔl a ninfob Iziral yaab li biɛ ke Uwonbɔr ta u ma le ke un fee bi jaa, amaa le baa biɛ.

²⁶Le ni won kutaag, le u ji kan Iziral yaab bilee kaah be kɔn. Le u ban waah li ŋa bi man wee bin jir ki mɔŋ nin tab, le ki bei bi ke, ‘Ni lig ni ye nnabum le nin tab; ke ba ŋa wee ni boo tab baa?’

²⁷“Amaa le wan mugir u kpiɛgin tir Moziz ki jaa ngbaan ki baan u, ‘Ŋma ŋaaŋ ti yudaau, nin ti bɔjiru waa?

²⁸ A yin kum le ke ŋaah won ku Ijibir a ninfo win man nin naa?’

²⁹Moziz kaah gbir man n-yonn man nin, le u guun ki nyan Ijibir, ki jon Midiya a tiŋin ki tan be niin ki ye uchaan, ki nan kɔɔn upii ki ma nbijam milee.

³⁰“Ibin pina a bɔɔn, le malaka degir Moziz bu ki nann nŋmipeen ki gaan kukunkɔɔg bu ki mal Sina a jɔɔl bu.

³¹“Moziz kaah kan man nin, le ni ŋa u ligaril. Le u fɔɔr mal ke un mann lig, le ki gbir Uyudaan a kukɔl ke,

³² ‘Min le ye ni yaajam a Weem, ki ye Abiraham a Weem, ki ye Azig nin Jekɔb a Weem.’ Le bijawaam kɔɔ Moziz, le u nin si ki jegil kaa ji fir lig niin ni.

³³“Le Uyudaan bei u ke, ‘Pir a naatagiya; ke ŋaah si nan yaan nmɔn ye kasi a bol le.

³⁴N kan Ijibir yaab kaah mugir N tɔɔl a ninfob Iziral yaab Ijibir a tiŋin man na, ki ji gbir bi fabin ya. Man le N jiirin ke N nan fee bi ki jaa. Mambu, dan wee N tuŋ wee a jir Ijibir.’

³⁵“Moziz nmɔn le Iziral yaab nan yii u ki baan u ke, ‘Ŋma ŋaaŋ ti yudaau nin ti bɔjiru waa?’ Amaa u ma le Uwonbɔr gann ke u le ye bi yudaau nin bi feeru, le u ma Uwonbɔr che Malaka pag sei Moziz kumɔɔchiɛg a ŋmiimin, ki tun u niin.

³⁶Le u nan nyan bi Ijibir, ki tun ligaril nin lijinjeel a toon Ijibir a tiŋ nmɔn yaan nin limɔgmanlin nin baah ji nan be kukunkɔɔg bu ibin pina-n.

³⁷ U yaa Moziz le ji nan bei Iziral yaab ke, ‘Uwonbɔr na li tun ulinlenn uba ni ban ke waah tunim man nin, u yin nya ni tɔɔl a ninfobin le.’

³⁸Moziz nmɔn ji nan be nin Iziral yaab kaah lagin kukunkɔɔg a paab, nin malaka wan nan pag sei u Sinai a jɔɔl bu-n, nin ti yaajam; le u nan gaa limiɛfol a mɔboi ki ta sei ti.

³⁹“Amaa le ti yaajam kaa nan chee u mɔbi. Mambu le che bi yii u, le ki tiɛr bi sufu ni ke bin ji jir Ijibir a tiŋin.

⁴⁰Le bi bei Moziz a waal Arɔnn ke, ‘Maa ibawol ki sei ti ni, wee ti li nɔɔ i. Ke, Moziz wan nyan ti Ijibir a tiŋin nan taa nyi nan ŋa wi!’

⁴¹Iyaayoo le bi nan maa litingbanl lan nann kinaabig a dann, ki mann kumanug li bu, ki ŋa kuchiig ki donn nan wee bi ta bi nɔɔi maa-n.

⁴²Amaa le Uwonbɔr nyan U num bi ban, le ki jaa bi le bi nin jiɛn paab a wann naan wann. Ke naah sɔb Uwonbɔr a linlem a gbɔŋin ke: ‘Nim Iziral yaab naah nan mann kumanug kukunkɔɔg bu ibin pina-n, ni nan mann sei min lee?

⁴³ Ni yuur litingbanl lan wee bi yi li ke Moleg n yaa nanboŋ le paab nin litingbanl Refann lan ye liŋmabil nan, le i ye ibawol yan wee ni maa ki jiɛn. Mambu, n li ta ni ki tan ŋa tiyomirin kitiŋ kan fɔg’ ki jon Babilɔnn.

⁴⁴“Ti yaajam nan jɔɔ kuwonjiɛn nanboŋ le kukunkɔɔg bu, le ki ye siɛra ki wɔɔn ke Uwonbɔr be bi ban. Uwonbɔr le nan wɔɔn Moziz baah li ŋa ki man, le bi ŋa ki ke Uwonbɔr kaah wɔɔn Moziz man nin.

⁴⁵“Ti yaajam mu nan ta Tinanbonn nmɔn le ki sei bi buwaab, le bi mu tug ki chaa, le bi ma nin Josuwa nan foon do nan, ki fee kitiŋ kan wee boliba yaab la nan gaa ki ŋmagin. Uwonbɔr le nan ŋɔɔr bininfob nmɔn ki nyan bi ti a yaajam a numin, le kunanboŋin nin be nin yaan digdig nin Defid mu a yonn.

⁴⁶Uwonbɔr a num nan gbee Defid nmɔn na, le u nan miɛ Uwonbɔr ke, un che un maa kudiig ki sei u ma Uwonbɔr wan ye u yaaja Jekɔb a Weemin.

⁴⁷Amaa Solomɔnn le nan maa kudiigin ki sei u.

⁴⁸“Amaa Uwonbɔr wan kaa jɔɔ kpiɛg nan kaa be iniin yan yaan wee bininfob maa nni. A li ke Uwonbɔr a linlenu kaah nan len ke:

⁴⁹‘Paab le ye N bɔrjal, le tum ye N taai kaah tɔɔ nan bu. Ba a niin wee ni yin maa sei maa? Uyudaan le len man. Bee ba a paam wee ni yin ta seim wee n li be ki fooraa?

⁵⁰ Naa ye min le naan tiwann nmɔn biɛn naa?’

⁵¹“Tɔ, le Sitifin ji nan len ke, “Ni tuli pɔɔ pam, naa nɔɔ Uwonbɔr a sam nin ni sufu, kaa pelig u bɔri! Iyoo biɛn ni yiin Uwonbɔr a Kasi a Naaŋin le, ke ni yaajam kaah nan yii u man ni!

⁵²Uwonbɔr a linlenu le nan be le ni yaajam kaa mugiru waa? Hali bi ji nan ku ban nan len ke uninfo buchin Masiya na li dan nin na. Daandaan nan nim le ye ban nyan u bɔɔn ki ku u,

⁵³nim le ye ban nan gaa nsiim man wee malakam nan ta sei nin, amaa le kaa sin ji chee mi.”

⁵⁴Sitifin kaah len man nin, le liŋuul choo bininfobin takpem u bu. Le bi ŋman bi nyin.

⁵⁵Amaa le Sitifin gbee nin Kasi a Naaŋ, le ki waan lig papaab, ki kan Uwonbɔr a pag, le Yisa si Uwonbɔr a nɔɔjiim paam,

⁵⁶Le u len ke, “Lig, n kan paab kaah loor wee Uninfosaal a Big si Uwonbɔr a nɔɔjiim paam.”

⁵⁷Le bininfob kunn paab, ki piig bi tuli, le bi biɛn guun ki dan u ban ke bin choo u,

⁵⁸le ki dar u nyan kitiŋ nmɔn a gbaam, ki tan gabir u itangbag. Ki miin siɛra jibin ta bi wan yeer ki bil unaachipɔɔn wan wee bi yi u ke Sɔɔl nan a tatum, le ni wɔɔn ke nkum nmɔn tɔɔ u yaa yul bu le.

⁵⁹Baah nan be gabir win, le Sitifin miɛ Uwonbɔr ke, “Uyudaan Yisa gaa n naaŋ.”

⁶⁰Le ki gbaan le ki yin nkukɔpɔɔn ke, “Uyudaan, jiɛn bi bir ki per ba.” U len man le ki sin kpo.