Read Konkomba Rom 1 Bible Online

Rom 1 - Konkomba bible

Rom 1

¹Pɔɔl, wan ye Masiya a toontunnu, wee U yim ki gannim ki ŋaam ntoon ke n mɔɔn Uwonbɔr a bɔŋann nin,

²tibɔŋann tan wee U nan chinn siin limɔsiinl lan nyan u linlemin ban wee ki sɔb Uwonbɔr a kasi a Gbɔŋin nin,

³tibɔŋann nmɔn wɔɔn U bija-n a bɔr le, ki ta jiin u ninforin paam, ke u nan ye ubɔr Defid a yaabil le,

⁴ki jiin u wonaaŋ paam mu ke, Uwonbɔr a Kasi a naaŋin nan wɔɔn nin npɔɔn ke u ye Uwonbɔr a bija le u kum a fiimin bu: U ma ye ti Yudaau Yisa Masiya.

⁵U ma nin U yinlin bu, le Uwonbɔr san ti kunyunyunbaag, le ki ŋa ti itoon ke ti yin bininfob ban kaa ye Juu yaabin a booli biɛn ke bi li jɔɔ limɔcheel bi yada kan wee bi jɔɔ-n bu.

⁶Le ni mu kpiɛ ban wee Yisa Masiya yin bin a kanlin na.

⁷N poor nim ban biɛn be Rom wee Uwonbɔr jiɛ ni ki yin ni wee ni ye U ninfogann kaabin: Ti Baa Uwonbɔr nin ti Yudaau Yisa Masiya a nyunyunbasanl nin nposɔɔn li be nin ni.

⁸Chinchinn, Yisa Masiya bu le n poor n Wonbɔru ni biɛn nan bu, nan bu-n dulinya nan yaan biɛn bi pag ni yada buu.

⁹Uwonbɔr wan wee n jiɛn nin n sufu biɛn ki mɔɔn U bija-n a bɔŋann nin, U ma ye n siɛra daau ki jiin maah tiɛr ni bu man isaŋ biɛn,

¹⁰n wonmiɛlin n-yonn biɛn; n miɛ Uwonbɔr le ke ni ye U bam ke Un loor nsan seim wee n dan ni ban.

¹¹N ban n kan ni le wee ki ta kinaaŋin a piini ibam ki sei ni wee yin sei ni npɔɔn,

¹²ni ma ye, nan li pɔɔg tab a yada nim nin min a gbanann pɔɔmin.

¹³N nabum, maa ban ni laa nyi ke iyoo takpem n lolig le ke n dan ni ban (amaa le tibɔr kɔɔ le maa li fir ŋa man ni ki nan kpaa daandaan nan) naah li ŋa man wee n fir ki kan bininfob takpem ni sisiigin, ke maah pii kan man ban kaa ye Juu yaabin a sisiigin biba-n.

¹⁴Ni kpaa le nin n pag tibɔŋann nan ki sei Girig yaab nin ban kaa ye Girig yaab, ki pag ti ki sei bilandam nin tijɔri.

¹⁵Ni ma bu le n numan ke n mɔɔn tibɔŋann nmɔn ki sei nim ban be Rom nan mu.

¹⁶Ifa kaa jɔɔm tibɔŋann nin a mɔɔnim bu, nan bu-n ti ye Uwonbɔr a pɔɔm le ki sei ban biɛn ŋa yada ke bin kan feegab: Juu yaab li yin chinn kan feegab le ban kaa ye Juu yaabin mu nin paan.

¹⁷Tibɔŋann nin yaan le nbuchin binben man nyan Uwonbɔr ban nin kpiir npaan ni, nbuchin binben man nyan ti yada-n npiinimin nin ndiɛmin, ke naah sɔb man Uwonbɔr a gbɔŋin ke: “Ubuchin li kan limiɛfol yada bu.”

¹⁸Uwonbɔr a ŋuufiiŋ nyan papaab ki kpiir ban kaa jɔɔ Uwonbɔr nin bipootondam buu, ban jɔɔ bipootom ki deginn ibamɔn nin bu-n,

¹⁹bininfosaalib kaah bi ye bi li nyi Uwonbɔr man nin ni dɔ npaan ni le ki sei bi, nan bu-n Uwonbɔr le che ni dɔɔn npaan ni ki sei bi.

²⁰Uwonbɔr kaah nan naan dulinya n-yonn man nin, le bininfob kan Uwonbɔr wan kaa ga-n a binbem, nin U Pɔɔm man kaa jɔɔ diɛmin, le U wonaaŋin ji che bininfob biɛ U, ni bu baa jɔɔ nan wee bi li ta pag ke baa nyi.

²¹Nin ni ma biɛn ni bi nyi Uwonbɔr, le kaa tenn U jilima kaa tenn u kunɔɔpoog mu, amaa le baa tiɛr nan ye nlam a wan ni, le bi sufu gbee nin ijɔrig nin libunbɔnl.

²²Hali nin baah pag ke bi ye bilandam nan biɛn ni, bi kpann tijɔri le

²³ni ma che bi kpenn Uwonbɔr wan kaa kpegin a jilima ki ta sei tiwann mann wan tan wee bi mann wee ti nann uninfo wan kpeg nin nnɔɔm nin tiwankor nin tiwann tan fuul.

²⁴Mambu che Uwonbɔr nyan U num le ki jiɛn bi le bi tun bi sufu a bam a toon, yan ye lipiibanl bee lijabanl lan kaa be kasi ki ye ifa a wan ki tenn tab bi tɔɔl a gbanann nin.

²⁵Bi kpenn Uwonbɔr a bamɔn n le ki ŋa ti tibɔkar, le ki jiɛn tiwann naan kaar ki tun ki tenn ti, le ki yii kaa jiɛn Uninaan nin tɔɔl li, U ma kpaan npagim iyoo biɛn. Ibamɔn.

²⁶Ni niɛ nan bu, Uwonbɔr nyan U num ki jiɛn bi per bi fai a kɔlisa nmɔn. Hali gbaa bi yaa piib kpenn le ki dɔɔ nin bi piitab ki jiɛn bijab.

²⁷Man mu jigin le bijab mu yii kaa dɔɔ nin bipiibi le ki jɔɔ bi kɔlisa nmɔn dɔɔ nin bijatab. Bijab tun tijaginn a toonl le nin bijatab, le ki gaa litudaril lan kpaan bi ki jiin bi toonbirin bu.

²⁸Nan kpiɛ, baah yii kaa ban bi li nyi Uwonbɔr a bamɔn yin bu le U nyan U num ki jiɛn bi per bi potiɛkpiinn nin, le bi tun nan kaa kpaan nin bin tun ni.

²⁹Bi sufu gbee nin npooton a booli le, nin titoonbir nin kujaŋuuŋ nin nan kaa jɔɔ bu. Bi gbee nin linunchɔril le, nin lininfo kul, ki kɔnn nin tab, ki lar tab, ki nan tab. Bi ye bi bɔɔn sub le,

³⁰nin bitingbiib, ki nan Uwonbɔr, ki sugir tab, ki jɔɔ kalanbaani, ki far igbingban; ki tiɛr baah li ŋa man ki mann tun titoonbir; ki yiin bi baam nin bi nam a mɔɔŋi;

³¹Baa jɔɔ nlami, baa ye ban wee bi li fir ŋa bi yada, bi sufu kaa be bi tabin ni, kaa san tab kunyunyunbaagi.

³²Bi nyi Uwonbɔr a buchin siimin kaah len ke bininfob ban tun man nmɔn kpaan nin nkum le, baa nan tun man a binba amaa le ki sin chee sei bitab ke bi li tun man na.