Read Konkomba Rom 10 Bible Online

Rom 10 - Konkomba bible

Rom 10

¹N nabum n potiɛl nin maah miɛ Uwonbɔr ki ban man ye le ke Iziral yaab n kan feegab.

²N li fir ji bi siɛra ke bi num man Uwonbɔr a toonl bu, amaa bi numan nmɔn kaa nɔɔ baah nyi U man ni.

³Baah kaa nyi nbuchin binben man nyan Uwonbɔr ban nin wee ki ban bi tɔɔl kaah li nɔɔ man ki li jɔɔ nbuchin binben nin, ni bu che baa chee sei Uwonbɔr a buchin binbemin ni.

⁴Masiya le ye nsiimin a diɛm le ban biɛn ŋa u yada ke bi li jɔɔ nbuchin binben.

⁵Moziz nan sɔb ki wɔɔn nbuchin binben man be nsiimin yaan kaah wɔɔn man ke: “Uninfo wan ŋmag nsiim nan kaah wɔɔn man nin ke, u li be nin nsiimin.”

⁶Amaa nbuchin binben man nɔɔ nin yada n ma wɔɔn ke: “Laa pag a sufu ni ke, ‘Ŋma na yin do paab baa?’ ” (ki taan Masiya jiirin)

⁷“bee, ‘Ŋma na yin jiir kitakpiin tiŋaa?’ ” (ki tan fiin Masiya nkumin).

⁸Amaa ni len ke baa? “Limɔbonlin mal a ban na; li be a mɔnn nin a sufu ni,” li ma ye, yada a mɔbonl lan wee ti mɔɔn nin:

⁹Ke ni ye a yaar a mɔb ki len ke, “Yisa le ye Uyudaan,” wee ki ŋa yada a sufu ni ke Uwonbɔr fiin U nkumin ke, a li kan feegab.

¹⁰Nan bu-n a sufu ni le a ŋa yada le Uwonbɔr ke a bɔr ŋan, a mɔnn le a yaar ki pag le ki kan feegab.

¹¹A li ke Uwonbɔr a gbɔŋ kaah len man nin, “Wan gaa U ki jin ke, waa li nyi ji ifa.”

¹²Juu yaab nin ban kaa ye Juu yaab kaa jɔɔ nbɔgirimi, uyudaan uba nmɔn le ye bi biɛn nan a yudaau le u kaar takpem be ban biɛn yi win nbu,

¹³Ni ma bu “Wan biɛn yin Uyudaan a yinl ke u li kan feegab.”

¹⁴Ni yin ŋa nii wee bin yin baah kaa ŋa wan yada nan a yinl laa? Ke bi yin ŋa nii ki ŋa baah kaa gbir wan a bɔr nan yadaa? Ke bi yin ŋa nii ki gbir wee naa ye uba li mɔɔn ti ki tenn baa?

¹⁵Ke bi yin ŋa nii ki mɔɔn ti wee naa ye bi tun bi lee? A li ke naah sɔb man Uwonbɔr a gbɔŋin nin, “Ban mɔɔn tibɔŋann nin tenn bininfobin tenn bi tibɔmɔnn le.”

¹⁶Amaa naa ye bi biɛn le chee sei tibɔŋann nmɔn ni. Ni ma bu le Azaya len ke, “Uyudaan, ŋma ŋa ti mɔleen nan yadaa?”

¹⁷Ni ma bu yada a ŋaam nya baah gbir imɔleen nin yaan le, imɔleen nin mu a gbirim nya Masiya a bɔrin a mɔɔnimin le.

¹⁸Amaa le n baan ke, “Baa gbiraa? Ibamɔn bi gbira: “Bininfob gbir bi kukɔl kutingbɔŋ nan a gbanann biɛn na, bi bɔr foo dulinya nan a tariga.”

¹⁹Le n ji baan ke: Iziral yaab kaa biɛ ni taai yaa? Chinchinn Moziz nan len ke, “N li che ni jɔɔ linunchɔril ban kaa ye ni bol yaabin bu; ki che ni ŋuulin fii libol lan yaab kaa biɛr niwann a taai yin bu.”

²⁰Le Azaya ŋa lipoobil ki len ke, “Bininfob ban kaa nan choon ban min kan ma; N kpiir N ba ki wɔɔn ban kaa nan baan n bu-n na.”

²¹Amaa ki jiin Iziral yaab paam, U len ke, “Iyoo biɛn N tann N nɔɔ le ke N bib ban ye tukangbirdam nin limɔyiil damin.”