Read Konkomba Rom 11 Bible Online

Rom 11 - Konkomba bible

Rom 11

¹Le n baan bi ke, “Uwonbɔr yii U ninfob lee? Naa ye man ni! Min tɔɔl ye Iziral a ninfou le, Abiraham a yaabil le yem, n nyan Bɛnjamɛnn a bolin le.

²Uwonbɔr kaa yii U ninfobi, ban wee U pii nan nyi-n. Naa nyi ke Uwonbɔr a gbɔŋin ni sɔb ki jiin Elaja paam, waah nan galin Iziral yaab Uwonbɔr ban ki ke:

³“N yudaau, bi ku a linlemin biɛn ki ber a manug a binbin jaa tuma; N yaa binba le gur, le bi ji gbaar bin kumaa”?

⁴Ke Uwonbɔr nan jiin u ke nii? U nan jiin u ke, “N la jɔɔ bijab turilile ban gur kaa la gbaan bi dun bu ki jiɛn litingbanl Baal li.”

⁵Man le ye ni, taah be n-yonn man nan, bininfob wama nan le Uwonbɔr gann U nyunyunbasanl bu.

⁶Ke ni ye U nyunyunbasanl bu le U gann bi ke, man ke naa ye baah tun nan bu; ni bi ye baah tun nan bu ke, U nyunyunbasanl nmɔn kaa ji bi yin ye linyunyunbasanli.

⁷Ba ji kpiɛ? Iziral yaab kaah nan ban bin kan nan nin inunman nin baa kan ni, amaa Uwonbɔr kaah gann ban nin bi ma kan. Ban gurin a sufu nan pɔɔ le,

⁸a li ke naah sɔb man Uwonbɔr a gbɔŋin nin: “Uwonbɔr le ta kinaaŋ kpiiŋ ki sei bi, ki sei bi inunbil yan kaa ga nin itul yan kaa gbiri, hali ki nan kpaa dinan.”

⁹Le ubɔr Defid len ke: “Che bi jijibol n kpann kupeŋ ki chor bi, nin litangbagil gbiɛrikaal nin litudaril ki sei bi.

¹⁰Che bi num paam n bɔŋ wee bi laa ga, ki che bi fala n kpann litugil lan kpiɛg ki nyag bi bu iyoo biɛn.”

¹¹Le n ji baan ke: Bi nan gbiɛr ke bin lu ki laa ji fii bee? Naa ye man ni! Amaa baah nan burin bu, ni ma che ban kaa ye Juu yaab kan nŋmarim na li ŋa man wee Juu yaab li jɔɔ bi linunchɔril.

¹²Amaa ni ye bi burim nmɔn bu le dulinya yaab kan njɔɔm, le baah lann nan nin che ban kaa ye Juu yaabin kan njɔɔm ke, man ke Juu yaab mu nan jiɛn bi bir ki kan nŋmarim ke, dulinya nan yaab li kan njɔɔm nin jo man.

¹³N pag bei nim ban kaa ye Juu yaab nan le. Maah le ye ntoon ki sei ban kaa ye Juu yaab nan man, n jɔɔ linunmanl n toon nmɔn bu,

¹⁴ki jɔɔ tama ke n bi li fir ke n bin che min tɔɔl a ninfob li jɔɔ linunchɔril wee bi ni biba nkan feeja.

¹⁵Ni ye Uwonbɔr a yimin ye jir mɔŋ nin dulinya le ke, ni ye U ji nan jir gaa bi ke ni nin yin be nii? Ni naah yin ye limiɛfol lan nyann nkumin le.

¹⁶Ni ye boroboro a yom wama man wee bi yin chinn ta sei Uwonbɔr nan be kasi ke, boroboro n biɛn be kasi le; ni ye kisiig a sibonl be kasi ke, ki bon tɔɔl be kasi le.

¹⁷Ni ye Uwonbɔr gaa kisiig nmɔn a bon iba par ke, wee nim ban ye olif a siigin yan pan itɔɔl wee bi gaa isiig iba ki nan tugin ni wee ni nyu ni pɔɔm nya olif a siigin yaan nin,

¹⁸ni laa far igbingban ibon nmɔn bu. Ni ye ni far igbingban ibon nmɔn bu ke, ni li nyi ke: Nim ban ye ibon nin kaa ter lisibonlin ni, amaa lisibonlin li ter ni.

¹⁹Ni ba ke a li len ke, “Uwonbɔr nan gaa ibon iba le par le ki taam tugin.”

²⁰Ni ye ibamɔn le. Baah kaa nan ŋa yada-n bu le Uwonbɔr nan gaa bi par gab, amaa le fin si a yada bu. Laa jɔɔ kalanbaani amaa li san Uwonbɔr.

²¹Ni bu ni ye Uwonbɔr kaa nan jaa isiig a bon ke waa yin jaa a mu.

²²Lig Uwonbɔr kaah jɔɔ nbinben ŋan nin inunkoon man: U nunkoon yin tɔɔ ban lu-n bu le, amaa le u binben ŋamin tɔɔ a bu, ni ye a le laa be nin U binben ŋam nmɔn ke. Naa ye man ke U li gaa fin tɔɔl gab.

²³Hali ni ye ban nan lu-n jiɛn nbiɛnim ke, Uwonbɔr li jiin bi tugin, nan bu-n u jɔɔ npɔɔn man ji li fir jiin bi tugin.

²⁴Ni biɛn nan a bɔɔn, ni ye Uwonbɔr nan bi gaa fin wan ye kulɔŋ a olif wee ki ji gaa bukpaab a olif ki ta tugin tab ke, li nyi ke naa pɔɔ sei U nin Un gaa bukpasib a bon ki ji jiin mi tugin mi tɔɔl a sib bu!

²⁵N nabum, maa ban ni li be kaa nyi tibɔwoonkaar nan ni, tan li che ni laa donn niba naah nyi nan bu: Iziral yaab a tupɔɔm man bi ba bu-n kaa yin yuuri, amaa le ni yin be man le hali nin ban kaa ye Iziral yaabin kaah na li dan Uwonbɔr ban.

²⁶Ni ma bu Iziral yaab biɛn li ŋmar, a li ke naa sɔb man Uwonbɔr gbɔŋin nin: “Ufeerin yin nya Zayɔnn le; U li nyan nan kaa ye liwonjiɛnl Jekɔb a maalimin ki gab.

²⁷Ni ma ye tipoor tan wee N poo sei bi n-yonn man wee N na yin nyan bi tibirin nin.”

²⁸Ki jiin ban yii tibɔŋann nin paam ke, bi ye Uwonbɔr a dataam le nim bu; amaa ki jiin nganim paam ke, bi ye Uwonbɔr kaah jiɛ ban le bi yaajamin bu,

²⁹Uwonbɔr a piin a seim nin U yim kaa kpenn ni.

³⁰A li ke nim ban kaa la nan chee Uwonbɔr a mɔb isaŋ iba wee Uwonbɔr nan san ni kunyunyunbaag Iziral yaab a mɔyiilin bu-n,

³¹mambu che bi mu yii Uwonbɔr a mɔb le ke nin che Uwonbɔr n san bi kunyunyunbaag ke waah san ni man nin.

³²Uwonbɔr ŋa uninfo biɛn uloondiikɔɔr le bi mɔyiilin bu, naah li ŋa man wee Un fir san bi biɛn nan kunyunyunbaag.

³³Uwonbɔr-a, U lam nin U biɛm nyɔɔ le ki yab lagir! U bɔr a jim pɔɔ nin uninfo n biɛ, le uba kaa li fir nɔɔ U sami!

³⁴“Ŋma nyi Uyudaan a potiɛl laa? Bee ŋma ye wan gbeer waa?”

³⁵“Ŋma la nyi ta ni ba sei Uwonbɔr a, ki ke Uwonbɔr n nan yɔ u jiin naa?”

³⁶Nan bu-n niwann biɛn nyan U ma ban le; le niwann biɛn be U bu le U ye niwann biɛn. U ma kpaan npagim hali n-yonn man kaa jɔɔ ndiɛmi! Ibamɔn.