Read Konkomba Rom 15 Bible Online

Rom 15 - Konkomba bible

Rom 15

¹Tim ban a yada pɔɔ-n ye ti ter ban a yada kaa pɔɔ-n bi tugi a tumin le, wee ki laa ban ti tun nan li gbee ti tɔɔl a numi.

²Che ti biɛn nan ntun nan li gbee a kunkɔɔn tab a num u tɔɔl a ŋann bu, wee u yada n mann yabig.

³Ni ma bu hali Masiya kaa nan tun nan li gbee u tɔɔl a numi, amaa a li ke naah sɔb Uwonbɔr a gbɔŋin ke: “Tisugir tan wee bi sugiriŋin lu min bu le.”

⁴Nan biɛn wee bi nan sɔb bil n-yonn man nan jon nin bi nan sɔb bil ti yaa wɔɔnim bu le, wee ti li jɔɔ limɔril nin ngbananpɔɔn nin tama imɔleen nin bu.

⁵Uwonbɔr wan tenn limɔril nin ngbananpɔɔn nin un sei ni nmɔkpaa a tinaaŋ wee ni li nɔɔ Masiya,

⁶wee ni ye ni jɔɔ sufu uba nin mɔbiba ke ni li fir pag Uwonbɔr wan ye Uyudaan Yisa Masiya a baa-n.

⁷Ni gaam tab, ke Masiya kaah gaa ni man nin, naah li ŋa man wee ni fir ta npagim ki sei Uwonbɔr.

⁸Ni ma bu le min bei ni ke Masiya ye Juu yaab a toontunn u Uwonbɔr a bamɔn bu le, ke nin gbeen U mɔsiinl lan nan siin sei ti yaajamin,

⁹wee ban kaa ye Juu yaabin pag Uwonbɔr U nyunyunbasanl bu, ke naah sɔb Uwonbɔr a gbɔŋin ke: “Mambu n li pag fin Uwonbɔr a yinl ban kaa ye Juu yaabin a sisiigin; n li gaah liwonpagil a lai ki don a yinl.”

¹⁰Jigin Uwonbɔr a gbɔŋ len ke, “Ni che ni li mɔ ni nin U ninfob nan na, nim ban kaa ye Juu yaab nan.”

¹¹Le jigin, “Pagim Uyudaan, nim ban biɛn kaa ye Juu yaab nan, wee ki gaah ilan ki pag U, nim bininfob nan biɛn”

¹²Le jigin, Azaya a gbɔŋin ni sɔb ke, “Jesi a sibonlin yin pɔɔ le ki pa donn, wan yin fii ki gaa kutingbɔŋ nan ki ŋmagin; ban kaa ye Juu yaabin na yin jɔɔ tama u ma bu le.”

¹³Che tama a Wonbɔru win gbeen ni nmɔn biɛn nin nposɔɔn naah ga U jin nin bu, wee ni li jɔɔ tama kan yab ki tan lagir, Kasi a Naaŋin a pɔɔm bu.

¹⁴N nabum, min tɔɔl kaa biɛni, ni tɔɔl gbee nin nbinben ŋan, ki jɔɔ nbiɛm takpem, ki li fir wɔɔn tab nbamɔm.

¹⁵Maah nan sɔb lipoobil a bɔr tan ki sei ni-n nann le ke n ji tiɛr ni le-n, nan bu-n Uwonbɔr kaah sam kunyunyunbaagin bu,

¹⁶ke n ŋa Masiya a toontunnu ki sei ban kaa ye Juu yaabin ki ta Uwonbɔr a bɔŋann nin tun itoon ke uminmanirin, wee Uwonbɔr n gaa ban kaa ye Juu yaabin ke kumanug kan wee Kasi a Naaŋ ŋa ki kasi-n.

¹⁷Mambu n jɔɔ ligbingbanfaal Masiya bu nin maah tun litoonl lan ki tenn Uwonbɔr.

¹⁸Maa li nyi ki pag niba wee naa ye Masiya kaah taam tun litoonl lan ni, ke n liin ban kaa ye Juu yaabin a sam ki wɔɔn bi wee bin chee Uwonbɔr a mɔb nin maah wɔɔn bi man nin maah tun man.

¹⁹Le ni ma ye siɛra nin ligaril a toon a pɔɔm nin Kinaaŋin a pɔɔmin. Ni bu naah nyan Jerusalam ki tan kpaa Dalimasiya a yerin[1], n mɔɔn Masiya a bɔŋann nin ki diɛ niin na.

²⁰N le gbaa boŋ le ke n mɔɔn tibɔŋann nin nan yaan wee bininfob kaa la nyi gbir Masiya a bɔrin ni, wee ni laa ye ke n maa tɔɔn uba a fiɛl bu le.

²¹Amaa ke naah sɔb Uwonbɔr a gbɔŋin ke: “Baah kaa nan bei ban u bu-n li kan, le ban kaa nan gbir li biɛ ni taai.”

²²Ni ma nan gbaa leg ki che maa kan nsan ki li dan ni ban ni.

²³Amaa daandaan nan niba yaan kaah kaa ji be n tun tiyerin nan yaan nan, wee n mu a potiɛl le be ni ban ibin takpem ke n kan ni nan,

²⁴n bon le ke n na yin jo Sipenn ke n li kan ni. N jɔɔ tama ke n naah yin jo jo ke n li gɔnn ni, wee ki che ni terim n jo n sanchonlin, ni bɔɔn bu ki miin n pii jin taah lagin be-n a mɔm wamau.

²⁵Daandaan nan ma, n be nsan bu le ki chaa Jerusalam n tan tun ter biwonjiɛm ban be niin nin.

²⁶Nan bu-n Masedoniya nin Akaya yaab nan jɔɔ nmɔn ke bin chaar ki sei biwonjiɛm ban nan ye faladam ki be Jerusalam.

²⁷Ni nan mɔ bi le ke bin tun man, le ibamɔn ni sin kpaan nin bin chaar man ki sei bi. Ni ma bu ni ye ban kaa ye Juu yaabin lagin por nin Juu yaabin Kinaaŋ a kaarin ke, ni kpaan nin bin ji lagin por nin Juu yaab bi wann yɔɔr a kaar.

²⁸Ni bɔɔn bu ni ye n tan tun diɛ wee ki kan ke bi gaa ipiin nmɔn ke, n li nɔɔn nan gɔnn ni wee ki jo jo Sipenn.

²⁹N nyi ke n nan dan ni ban ke, n na yin ŋmag Masiya a kaarin le takpem ki dan.

³⁰N nabum, n balin ni le, ti Yudaau Yisa Masiya nin Kinaaŋin a jiɛm bu, ni kpiɛ n bu n gbaalin ki miɛ Uwonbɔr sei ma.

³¹Ni li miɛ Uwonbɔr ki tenn ma wee n fir ŋmar ki nya Judiya yaab ban kaa ye biwonjiɛmin a nɔɔn wee Uwonbɔr a ninfob ban be Jerusalam nan a num ngbee maah yin tun nan nin,

³²wee Uwonbɔr a bam bu n fir dan ni ban nin nmɔn wee min nin nim n mann pɔŋ.

³³Nposɔɔn a Wonbɔru li be nin ni biɛn. Ibamɔn.