Read Konkomba Rom 2 Bible Online

Rom 2 - Konkomba bible

Rom 2

¹Mambu, fin, wan jin a kpiɛ tibɔr nan, ŋaa jɔɔ nsan man wee a li nɔɔ ki ke ŋaa nyi, ni ma bu ŋaah nɔɔ nsan man bu wee ki jin a kpiɛg tibɔrin, a tɔɔl jɔɔ igalin, nan bu-n fin wan jin a kpiɛg tibɔrin tɔɔl tun man le.

²Daandaan nan ti nyi ke Uwonbɔr kaah ji ban tun man nmɔn tibɔrin ni nɔɔ ibamɔn a sam bu le.

³Ke ni ye fin, uninfosaal mu, jin bi tibɔr wee ki mu ji tun man ke, a tiɛr ke a li fir ŋmar Uwonbɔr a bɔjilin naa?

⁴Bee a ziɛn Uwonbɔr a binben ŋamin a yabim nin U chee sei nin U mɔril nlee, kaa nyi ke Uwonbɔr kaah jɔɔ nbinben ŋan man nin ban a kpenn a binbem lee?

⁵Amaa ni tukangbiril nin naah kaa ban ni kpenn ni sufu-n bu, le ni kpiɛg U ŋuufiiŋ lan yab ki tenn ni ba lidaal man wee Uwonbɔr a ŋuufiiŋ nin U buchin bɔjilin na yin degirin nin.

⁶Uwonbɔr “Na li sei uninfo biɛn nin waah nan tun man.”

⁷Le ban si iyoo biɛn ki tun itoon ŋan ki ban kupag nin jilima a binbem nin limiɛfol lan kaa kpegin, U li sei bi limiɛfol lan kaa jɔɔ ndiɛmin.

⁸Amaa ban ban niwann biɛn li ye bi yaan, wee ki yii ibamɔn wee ki nɔɔ titoonbir a samin, Uwonbɔr a ŋuul yin fii bi bu le.

⁹Tibɔmugkaar nin nton li dan bininfob ban biɛn tun titoonbir nan bu. Chinchinn ni yin foo Juu yaab ban le ki nin foo ban kaa ye Juu yaab n mu ban;

¹⁰amaa kupag nin jilima nin nposɔɔn le Uwonbɔr yin ta sei ban tun nan ŋan nin: Chinchinn ni na yin foon Juu yaab ban le wee ki nin foo ban kaa ye Juu yaabin ban.

¹¹Nan bu-n, Uwonbɔr kaa gann ni.

¹²Ban biɛn kaa jɔɔ Uwonbɔr a siim wee ki tun titoonbirin, bi yin kpo le kaa jɔɔ nsiimi, ban biɛn jɔɔ Uwonbɔr a siimin, amaa wee ki tun titoonbirin, Uwonbɔr yin ta nsiim nmɔn le ki ji bi tibɔr.

¹³Nan bu-n naa ye ban gbir nsiimin le ye bibuchim Uwonbɔr ban ni, amaa ban chee sei nsiimin bi ma le bi na li yin bi bibuchim.

¹⁴(Ibamɔn, ban kaa ye Juu yaab, wee kaa jɔɔ nsiimin ni, amaa ni ye bi tun nsiimin kaah wɔɔn man nin bi tɔɔl a lamin ke, ni wɔɔn ke bi baan tɔɔl jɔɔ nsiim, hali nin baah kaa jɔɔ nsiim nmɔn biɛn na.

¹⁵Baah tun man nin le wɔɔn ke nsiimin kaah wɔɔn man nin be bi sufu ni, le bi potiɛl mu jin siɛra ki wɔɔn nan ŋan nin nan kaa ŋan ni, nan bu-n, isaŋ iba bi potiɛl ti nan cheel tenn bi le ke bi toon ŋan, le isaŋ iba mu ke bi potiɛl n ji len ke bi toon iba kaa ŋan ni.)

¹⁶Ni niɛ nan na yin tun lidaal lan wee Uwonbɔr na yin ji bininfob a bɔwoonkaar Yisa Masiya bu, ke n bɔŋann nin kaah wɔɔn man nin.

¹⁷Daandaan nan fin, ni ye a ke a ye Juu a ninfou; wee ki nɔɔ nsiimin, ki far a gbingbanl ŋaah jɔɔ nɔɔ nin tab nin Uwonbɔr man;

¹⁸ni ye a nyi Uwonbɔr a bam, wee ki chee sei nan jon ni biɛn nan bu-n nsiimin kaah wɔɔn ni man ni-n;

¹⁹ni ye a ke a ye wan wɔɔnn bijɔɔm le nsan, ki ye nwonween ki sei ban be libunbɔnlin,

²⁰ki ye wan kpaan tijɔri, ki ye wan wɔɔnn nbuwaab tirim, nan bu-n ni jɔɔ nnyinyin nin ibamɔn nin kaah sɔb man nsiimin a gbɔŋin,

²¹fin wan wɔɔnn a tabin, ba ŋa wee ŋaa wɔɔn a baa? A wɔɔn bi ke bi laa su, ke fin suu?

²²Fin wan wɔɔnn ke bininfob laa tun iwanchɔgin toon nin, a tun iwanchɔgin toon naa? Fin wan kaa ban libawomanil a bɔrin ŋaa su kuwonjiɛndiig a wan naa?

²³Fin wan jɔɔ nsiimin ki far ligbingbanlin, ŋaa tenn Uwonbɔr le jilima le ki bii U siimin naa?

²⁴Ke naah sɔb Uwonbɔr a gbɔŋin man nin: “Ban kaa ye Juu yaabin sugir Uwonbɔr le nim Juu yaab bu.”

²⁵Lipunjiil jɔɔ bu ni ye ni ŋmag nsiimin ke, amaa ni ye ni bii nsiimin ke, ni yin be le ke ban kaa jii-n.

²⁶Ni ye ban kaa jii bi pun yin ŋmag nsiimin kaah wɔɔn man nin ke, Uwonbɔr kaa yin ŋmag bi le ke ban jii bi pun yin naa?

²⁷Wan kaa jii u punl tigbanann nin amaa wee ki sin ŋmag nsiimin li fir pag ki biiŋ, hali nin ŋaah le jɔɔ nsiim nmɔn wee min sɔb dɔ nmɔn biɛn nin lipunjiilin, a ye wan bii nsiim le.

²⁸Wan ye Juu a ninfou npaan ni a binba kaa ye Juu a ninfo wi, le lipunjiil bamɔnl mu kaa ye nan ŋaan tigbanann nin a binba le.

²⁹Aai wan ye Juu a ninfou ke u ye Juu a ninfou u sufu ni le, le lipunjiil bamɔnl mu be sufu ni le, ki ye kinaaŋin, naa ye nan sɔb dɔ kugbɔŋin nin a binba, u yaa daan gaa u pag Uwonbɔr ban le naa ye uninfo ban ni.