Read Konkomba Rom 3 Bible Online

Rom 3 - Konkomba bible

Rom 3

¹Juu yaab ma ta ba ki jon ban kaa ye Juu yaabin naa, bee lipunjiil a nyɔɔr ye baa?

²Juu yaab jɔɔ isan a booli takpem ni wan biɛn ni; chinchinn, Uwonbɔr nan ta U bɔrin ŋubin Juu yaab a nɔɔn le.

³Ni ye bi ni bibam kaa si bogiliba ke, bi kaa si bogiliba nmɔn li fir bii Uwonbɔr mu wee U laa si bogilibaa?

⁴Naa ye man ni! Che Uwonbɔr ma le ye ubamɔndaan na, wee uninfosaal biɛn mu le ye tibɔkardaan na. Ke naah sɔb Uwonbɔr a gbɔŋin man nin: “Na li ŋa man wee bin ke fin Uwonbɔr a bɔr ŋan ni ye a pag ke le uba mu kaa yin fir faaŋ limɔkpel a bɔr a jimin ni.”

⁵Amaa ni ye ti kaa jɔɔ nbuchin binben bu che Uwonbɔr a buchin binbemin nyan npaan nin ke, ti ji yin len ke baa? Ti li fir len ke Uwonbɔr galin nin waah fiin U ŋuul ti buu? (Uninfosaal a mɔkpel faal le n jɔɔ pag nan.)

⁶Naa ye man ni! Ni bi ye man ke, Uwonbɔr na yin ŋa nii ki ji dulinya yaab tibɔraa?

⁷Nba ke uba ma li faam limɔkpel, “Ke ni ye n bɔkarin kpiir Uwonbɔr a bamɔn nbu ki che Uwonbɔr a jilima mann kpiɛ ke, ke ni ŋa ni wee Uwonbɔr ji yin jim tibɔr ki ke n ye tibirdaan naa?”

⁸Ba ŋa taa li fir len, ke bitingbiib kaah len man wee bibam sin chee-n, ke, “Ni che ti tun tibir wee niwann ŋann nnyan naa”? Bi li ji bi tibɔr naah kpaan man.

⁹Ni joorimin ti yin len ke nii? Tim pii ŋan jon bi lee? Naa ye man ni! Ti pii wɔɔn ni ke Juu yaab nin ban kaa ye Juu yaabin biɛn be tibir a poolin.

¹⁰Ke naah sɔb man Uwonbɔr a gbɔŋin nin: “Uba kaa be ki ye ubuchin Uwonbɔr ban ni, hali uba kaa be;

¹¹Uba kaa be ki biɛ ni taai yi, uba kaa be ki ban Uwonbɔr a boli.

¹²Bi biɛn labir bi bɔɔn kpaa Uwonbɔr ki jon na, bi biɛn tun ki bur Uwonbɔr a samin na; uba kaa be ki tun nan ŋan ni, hali uba kaa be.”

¹³“Bi mɔɔŋi yaa le ke tikar tan logir ki yaa-n; le bi lanbili pag nan kaa ye ibamɔn ni.” “Le bi mɔgbai gbee nin liwaataal a labir.”

¹⁴“Bi mɔɔŋi gbee nin imɔpoo le nin npooton.”

¹⁵Le bi taai ton nin ncham a nyam;

¹⁶Le bi ŋaar biɛn ke, bi tenn bininfob ndam ki che bin ji fala,

¹⁷le kaa nyi nposɔɔn a ŋaari.”

¹⁸“Le baa san Uwonbɔr bijawaami.”

¹⁹Daandaan nan ti nyi Uwonbɔr a siimin a poolin kaah len man biɛn, mi pag tenn bininfob ban nɔɔ nsiim nmɔn le, wee uba nlaa nan kan bimɔb ki fir pag niba, wee Uwonbɔr n nan ji dulinya biɛn tibɔr.

²⁰Ni ma bu uba kaa li fir len ke waah ŋmag Uwonbɔr a siimin bu u ye ubuchin Uwonbɔr ban ni; amaa nsiimin le che ti biɛ tibir kaah ye nan.

²¹Amaa daandaan nan nbuchin binben man nyan Uwonbɔr ban, wee U che ti biɛ mi-n, maa nyan nsiim a ŋmagimin ni, ni ma le nsiim a gbɔŋ nin bilinlem jin mi siɛra-n.

²²Nbuchin binben man nyan Uwonbɔr ban nmɔn nyan yada kan wee bi jɔɔ nin Yisa Masiya nle, ki tenn ban biɛn ŋa u yada-n. Naa jɔɔ nbɔgirimi,

²³nan bu-n, ti biɛn nan ye tibirdam le ki par Uwonbɔr a pag,

²⁴le Masiya daa ti ki che ti be ti wiib U nyunyunbasanlin bu ki ke tibɔr ŋan.

²⁵Uwonbɔr nan ta U le ki mann tibir a manug, baah ŋa u chamin yada-n bu. U tun man ki ban un wɔɔn u bamɔn le, nan bu-n, U nan jɔɔ limɔril, kaa dar bininfob ban tun tibir n-yonn man wee Yisa Masiya kaa la nan dan dulinya nan yaan nin a tuli yi,

²⁶U nan ŋa man ki wɔɔn U bamɔn le n-yonn man wee ti be nan, ke U li ye ubamɔndaan wee ki ŋa ban ŋa Yisa yada-n mu bibamɔndam.

²⁷Ligbingbanfaal ye baa? Laa kpiɛ niin ni. Ba bu che naa kpiɛ niin naa? Taah ŋmag nsiimin buu? Aai, amaa taah ŋa yada-n bu.

²⁸Ni ma bu tim le si le ke uninfosaal a yada le che u bɔr ŋan Uwonbɔr ban amaa naa ye waah ŋmag nsiimin bu.

²⁹Uwonbɔr ye Juu yaab a binba a Uwonbɔr u lee? Waa ye ban kaa ye Juu yaabin ma a Uwonbɔr waa? Nn U ye ban kaa ye Juu yaab tɔɔl a weem le,

³⁰Uwonbɔr ye u ba le, u ma na yin bei ban jii bi pun ke, bi bɔr ŋan bi yada bu, ki jin bei ban mu kaa jii bi pun ke, bi mu a bɔr ŋan bi yada bu.

³¹Ti wɔɔn ke yada a ŋaam bii nsiimin lee? Aai naa ye man ni! Ti le mann ŋmag nsiimin le.