Read Konkomba Rom 4 Bible Online

Rom 4 - Konkomba bible

Rom 4

¹Ti yin pag ke nii ki jiin ti yaaja Abiraham nin waah nan kan nan nin paam maa?

²Ni ye Abiraham a toon bu le Uwonbɔr nan ke u bɔr ŋan ke, u nan jɔɔ nan wee u li ta faa u gbingbanl, amaa naa ye Uwonbɔr a nintogili.

³Uwonbɔr a gbɔŋin len ke nii? “Abiraham ŋa Uwonbɔr le yada, le Uwonbɔr kan u yada nmɔn kpiɛ u buchin binbem bu.”

⁴Ni ye uninfo tun litoonl ki gaa tiyɔr ke, baa kaan u yɔr nmɔn ke ti ye ipiin ni, amaa ni kpaan un gaa le.

⁵Amaa, uninfo wan kaa nɔɔ itoon ŋan a tum bu, wee ki gaa Uwonbɔr wan che bipootondam kpann bibuchim jin nin, u yada nmɔn bu le Uwonbɔr ke u bɔr ŋan u buchin binbem bu.

⁶Defid tɔɔl nan len man le, waah nan pag ke Uwonbɔr a kaar be uninfo bu u buchin binbem bu ki kpiɛ u toon bu-n:

⁷Tikaar be ban galin wee Uwonbɔr jiɛn per bin bu, ban a bir bu wee U degin nin.

⁸Tikaar be uninfo wan wee Uwonbɔr kaa li nyi kan u bir ki bil guun win bu.”

⁹Tikaar nan ye ban jii bi pun a binba yaar le bee, ban kaa jii n mu kpiɛ nii waa? Ti le gbaa pag le ke Abiraham a yada-n nan wɔɔn u buchin binbem le.

¹⁰Ba nan che Uwonbɔr nan ŋa Abiraham ubuchin nmɔn naa? Waah nan jii u punlin a bɔɔn bee waah kaa la nan jii n naa? Naa ye waah nan jii-n a bɔɔn ni, amaa waah kaa la nan jii-n le Uwonbɔr nan ŋa u ubuchin!

¹¹U punjiilin nan ye siɛra le ki wɔɔn ke u pii ŋa Uwonbɔr yadau, le Uwonbɔr ta U buchin binbem a daagim ki daag u, u yada bu, n-yonn man wee waah laa nan jii u punlin. Le ki ŋa u yadadam ban kaa jii bi pun biɛn a baa, na li ŋa man wee bin kanh bi kpiɛ ban jɔɔ nbuchin binben nin.

¹²U ma ji ye ban jii bi pun wee kaa be lipunjiil a binba bu amaa wee ki nɔɔ yada a tabogi yan wee ti baa Abiraham nan jɔɔ n-yonn man wee waah laa nan jii u punlin.

¹³Naa nan ye nsiimin a ŋmagim bu le Uwonbɔr nan siin limɔsiinl ki sei Abiraham nin u yaabili ke bi li ji dulinya nan a faalin ni, amaa nbuchin binben man nyan yada-n nin bu.

¹⁴Ni ye Uwonbɔr bi ke ban ŋmag nsiimin le yin ye dulinya nan a faajib ke, yada a ŋaam kaa bi jɔɔ tinyɔɔri le limɔsiinl kaa jɔɔ tinyɔɔri,

¹⁵nan bu-n nsiimin a biim le jɔɔ Uwonbɔr a ŋuufiiŋ chaan. Nan yaan wee nsiim kaa be-n uba mu kaa jɔɔ igalin ni.

¹⁶Mambu Uwonbɔr a mɔsiinlin nɔɔ nin yada le, ki ye Uwonbɔr a nyunyunbasanl ki si guu Abiraham a yaabili biɛn, naa ye ban ŋmag nsiimin a binba, amaa ban jɔɔ Abiraham a yada-n. U ma ye ti biɛn nan a baa.

¹⁷Ke naah sɔb man Uwonbɔr a gbɔŋin nin: “Min le ŋaaŋ ibol takpem a baa.” U ye ti baa le Uwonbɔr ban, wan wee u ŋa u yada, U ma ye Uwonbɔr wan tenn bitakpiib limiɛfol wee ki che tiwann tan kaa nan be-n nin be ke ti pii nan be le-n.

¹⁸Nin tama kaah kaa le nan be nmɔn biɛn ni, Abiraham nan jɔɔ tama le ki ŋa Uwonbɔr yada le ki nan ŋa ibol takpem a baa ke Uwonbɔr kaah nan bei ke, “A yaabili na yin yab man le.”

¹⁹Abiraham nan kan ke u por ki mal nkuma, u nan ye ibin kobig paam le, le u poo Sɛra mu nan por ki lagir nmaala, amaa naa nan che u yada kan wee u jɔɔ-n diŋi.

²⁰Nin ni ma biɛn ni, waa nan biɛnn Uwonbɔr a mɔsiinlin ni, amaa u yada nan mann sei u npɔɔn le u sei Uwonbɔr kupag.

²¹U num nan gbee ke Uwonbɔr jɔɔ npɔɔn ki li fir tun waah nan siin limɔsiinl ke U li tun man nin.

²²U yada nmɔn bu le “Uwonbɔr nan kan u ki kpiɛ ban jɔɔ nbuchin binben nin.”

²³Imɔbon yan len ke, “Bi nan kan u kpiɛ-n,” kaa nan sɔb dɔ u binba bu le,

²⁴amaa tim tɔɔl, ban wee Uwonbɔr li kan kpiɛ ban jɔɔ nbuchin binben nin. Taah ŋa yada nin U ma Uwonbɔr wan fiin ti yudaau Yisa nkumin nin bu.

²⁵Ti toon bir bu le Uwonbɔr nan ta Masiya sei nkum amaa le U fiin u nkumin ke Un ŋa ti bininfoŋam Uwonbɔr ban.