Read Konkomba 1 Korenti 16 Bible Online

1 Korenti 16 - Konkomba bible

1 Korenti 16

¹Daandaan nan n ban n pag ki jiin ipiin yan li tenn biwonjiɛmin paam le: Ni ŋaam ke maah wɔɔn Galantiya yaab a wonjiɛm a laginn ke bi li ŋaan man ni.

²Likpakɔɔl daal biɛn ke, ni biɛn li nyan ŋaah tun ki kan man a piin ki biliga, wee n nan foon ke ipiin a chaarim n laa ji be.

³Wee ni ye n foon ke, n li sɔb kugbɔŋ, kan ta li wɔɔn bininfob ban wee ni gann ni, wee bin ta ni piini yan wee ni ŋaan ki chiɛn Jerusalam.

⁴Ni ye n nan lig ki miin ni kpaa talar nin n mu jo ke, bi li chiɛn nim.

⁵Ni ye n jon Masedoniya ke, ni bɔɔn bu n li dan ni ban n yin nɔɔ Masedoniya paam le.

⁶Nba ke n na li be ni ban wama, bee nin kufaag a yonn, wee ni terim nin n sanchon nan yaan biɛn wee n chaa.

⁷Maa ban n dan nan kan ni daandaan nan wee ni li ye paab a gɔnni yi, n jɔɔ tama nin n nan ji isaŋ ni ban ni ye Uyudaan chee ke.

⁸N li be Efesusi a tiŋin hali ki tan kpaa Pentikosi a daal,

⁹nan bu-n itoon takpem a naanganl loor le ki seim nin n tun, amaa le bininfob takpem mu kaa chee seim nin n tun ni.

¹⁰Timoti nan dan ni ban ke, ni che u li be ni ban na wee ki laa che u lam yugiri, nan bu-n, u tun ti Yudaau a toon yin le ke maah tun man ni.

¹¹Uba laa yii ki laa gaa wi. Ni che u nan nya ni ban ki jirin n ban nin nposɔɔn. N lig u ma nin ti nabumin nsan bu.

¹²Daandaan nan ki jiin ti na a big Apolosi paam: N balin u le ke u ma nin ti nabumin nnɔɔ dan ni ban, le waa ban un jo daandaan nan ni. Amaa ni ye u nan kan nsan ke u li jo.

¹³Ni li guu niba man, ki che ni yada li pɔɔu, ki li ye bininfob ban jɔɔ lipoobil nin npɔɔn.

¹⁴Ni li tun niwann biɛn nin njiɛma.

¹⁵Ni nyi Sitefanasi nin u niin yaab le nan ye chinchinn a ninfob ban kpenn bi binbem ki ŋa biwonjiɛm Akaya a tiŋin, bi ta biba le ki sei itoon nin ki tun ki tenn Uwonbɔr a ninfob. N nabum, n balin ni le,

¹⁶ni chee sei bininfob nmɔn a bosuu, nin bi toontunn nunman damin.

¹⁷N nan jɔɔ npopeen Sitefanasi nin Fotunatusi, nin Akakusi kaah nan foon nin, nan bu-n bi nan ŋa nan wee ni bi li ŋa seimin na.

¹⁸Bi pɔɔg min nin nim a sufuu. Man a ninfob kpaan nin ni gaa ba.

¹⁹Biwonjiɛm a laginn ban be Asiya a yerin nin poor ni. Akula nin Pirisila nin biwonjiɛm ban lagin ki jiɛn Uwonbɔr bi niin yin ni poor ni pam Uyudaan a yinlin.

²⁰N nabum ban biɛn be do nan poor ni. Ni li poor tab nin jilimau.

²¹Min Pɔɔl le ta n tɔɔl a nɔɔ ki sɔb ipoor nan.

²²Wan kaa ban ti Yudaau ke, limɔpool be u bu. Dan ti Yudaau.

²³Ti yudaau Yisa a nyunyunbasanl li be ni bu.

²⁴N ban ni biɛn Masiya[8] a yinl bu. Ibamɔn.